Internationale FuttballInter wënnt a leschter Minutt géint den AC Milan

Lazio bleift an der Tabell uewen dobäi, a Frankräich gouf et tëscht Saint-Etienne a Rennes kee Gewënner. Gladbach wënnt kloer géint Mainz.

Um Sonndeg war et am internationale Futtball ënnert anerem den Derby tëscht Inter Mailand an dem AC Mailand.

Bundesliga
Hertha BSC - Freiburg 1:1

Zu Berlin waren et d'Haushären, déi een excellente Start an d'Partie erwëscht haten. An der 7. Spillminutt spillt de Skjelbred de Ball an de Strofraum wou den Duda aus ronn 11 Meter no enger staarker Kontroll de Ball mat engem flotte Schoss an de laangen Eck schéisst an dem Schwolow keng Chance léisst.

An der 36. Minutt kann de Koch fir Freiburg ausgläichen, dëst mat engem stramme Schoss, deen nach vum Maier ofgefälscht gouf. De Jarstein hat bei dësem Schoss keng Chance.

D'Haushären hunn an der éischter Halschent zwar dominéiert, ma et war awer mat engem 1:1 an d'Paus gaangen.

No der paus war Freiburg méi stäerk ginn an d'Haushären aus Berlin konnten dem Spill hire stempel net méi opdrécken.

Nodeems de Videoassistent zum Asaz koum, huet den Arbitter, den Här Cortus dorop entscheet, dass d'Berliner keen Eelefmeter zougesprach kréien.

Gladbach - Mainz 4:0

Vun Ufank un huet ee gesinn, dass Gladbach an der Tabell well uewe mat dobäi bleiwen. An der 21. Minutt hunn d'"Fohlen" dann och d'Féierung geschoss. No enger staarker Pass vum Hazard hat den Hofmann d'Chance op den 1:0, a mat bësse Chance vum Potto kritt hien de Ball och am Gol vu Mainz ënnerbruecht.

No der Halbzeit huet et bis zur 53. Minutt gedauert, éier et zu enger Chance koum ass.  No engem Sprint vum Hazard kann de Belsch sech géint d'Defense duerchsetzen a gesäit den Hofmann um zweete Potto, dee säin zweete perséinleche Gol schéisse kann.

Gladbach wollt direkt noleeën, an dat ass hinnen och gelongen. Den Hazard konnt no enger Flank vum Plea fir d'Entscheedung suergen, dëst mat engem schéine Schoss bei dem de Müller am Gol vu Mainz keng Chance hat.

De Schlusspunkt setzt da erëm de Mann vum Dag, den Hofmann, deen laanscht de Müller dribbele kann an de 4:0 fir Gladbach mécht.

LINK: Den Iwwerbléck vun der Bundesliga

Ligue 1
Saint-Etienne - Rennes 1:1

Saint- Etienne hat an der franséischer Ligue 1 de bessere Start an d'Partie. De Khazri konnt an der 4. Minutt fir d'Féierung suergen, dëst duerch een Eelefmeter.

An der 34. Minutt geléngt et Rennes awer, den Ausgläich ze schéissen. De Sarr zitt mat engem stramme, flaache Schoss op de laangen Eck a kann de Ball am Filet ënnerbréngen.

An der zweeter Halschent hat de Ben Arfa d'Chance duerch een Eelefmeter d'Féierung fir seng Faarwen ze schéissen, ma hien kritt de Ball awer net iwwert Linn gedréckt.

LINK: Den Iwwerbléck vun der Ligue 1

Serie A
Bologna - Torino 2:2

Turin war besser an de Match komm a konnt an der 14. Spillminutt duerch de Falque a Féierung goen. Bis zur Halbzeit waren et weider d'Gäscht, déi déi besser Chancen haten, ma et ass awer bei der 1:0 Féierung bliwwen.

Nom Wiessel konnt de Baselli an der 54. Minutt fir Torino op 2:0 erhéijen, ma just 4 Minutte méi spéit war et de Santander, dee Bologna no engem Corner erëm zréck an de Match bruecht hat.

De Schlusspunkt vun der Partie war dann tatsächlech nach fir d'Haushären, bei deenen de Calabresi an der 77. Minutt den Ausgläich schéisse konnt.

Parma - Lazio 0:2

Lazio bleift wärenddeem an der Tabell uewe mat derbäi. Allerdéngs huet et géint Parma bis zur 81. Spillminutt gedauert, éier den Ciro Immobile mat engem Eelefmeter seng Faarwen erléise konnt.

An der Nospillzäit konnt de Correa nach op 2:0 erhéijen. No enger super Pass an de Strofraum, konnt de jonken Offensiven de Ball aus spatzem Wénkel am laangen Eck ënnerbréngen.

Inter - Milan 1:0

An engem vun den traditiounsräichste Matcher am europäesche Futtball war et um Sonndeg de Match tëscht Inter Mailand an dem AC Mailand.

Déi éischt Aktioun war fir d'Haushären, dëst an der 13. Spillminutt duerch den Icardi , deen de Ball och iwwert d'Linn kritt, ma säi Gol gouf awer net unerkannt, dëst well de Stiermer am Abseits stoung.

Inter war déi dominant Ekipp an hat duerch de Perisic an der 24. Minutt eng weider gutt Chance, säi Schoss gouf um Enn awer vum Donnarumma duerch ee super Reflex ofgewiert.

Nodeems de Vecino an der 34. Minutt de Ball un d'Lat schéisst, huet et bis déi 42. Minutt gedauert, bis den AC eng nennenswäert Chance hat. De Musacchio hat och markéiert, ma och hien stoung bei der Pass am Abseits a sou ass et mat engem 0:0 an d'Paus gaangen.

An der zweeter Halschent war Inter weider déi liicht besser Ekipp, ma richteg zwéngend Chancë sinn awer net dobäi erausgesprongen.

An der Nospillzäit fält dann awer nach den entscheedende Gol, dëst duerch de Mauro Icardi, dee sech no enger Flank vum Vecino an der Mëtt mam Kapp duerchsetze konnt a senge Faarwen domat d'Victoire séchere konnt.

Inter wënnt um Enn mat engem Last-Minut-Gol mat 1:0 géint den AC Milan.

LINK: Den Iwwerbléck vun der Serie A

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.