Internationale Futtball Barcelona deklasséiert Real Madrid am El Clásico

An England koum Arsenal net iwwer een 2:2-Gläichspill géint Crystal Palace eraus, PSG wënnt géint OM, Roma an Napoli deelen d'Punkten.

© afp
Europäeschen Topp-Futtball gouf et och erëm um Sonndeg. Erausgestach huet den El Clásico, wou Real Madrid all in huet misse goen, fir dem Trainer Lopetegui säi Stull nach ze retten. Déi Kinneklech kommen zanter dem Ufank vun der Saison einfach net an d'Gäng. Awer och an England war et spannend, do huet Chelsea auswäerts näischt ubrenne gelooss, Arsenal koum net iwwer ee Gläichspill eraus.

Premier League
Crystal Palace - Arsenal 2:2

Arsenal schwieft den Ament op enger Well vum Erfolleg, dat no 11 Victoiren um Stéck - géint Palace war awer haut Schluss domat. D'Gunners sinn eréischt no 23 Minutten erwächt, wéi de Lacazette déi 1. Chance hat. Duerno hat Arsenal ëmmer nees Aktiounen no vir, ouni awer markéieren ze kënnen. Markéiert huet dunn awer de Milivojevic duerch een 11 Meter an der 1. Minutt vun der Nospillzäit vum éischten Duerchgang.
Deck 5 Minutten no der Paus konnt Arsenal duerch de Xhaka ausgläichen an de Match war relancéiert. D'Partie war gedréit, wéi den Aubameyang nëmme weider 5 Minutte nom Schwäizer sengem Gol op 2:1 fir seng Faarwe setze konnt. Crystal huet awer net nogelooss a wollt géint de d'Nord-Londoner op d'mannst ee Punkt retten. Dat sollt hinnen och geléngen an et war op en Neits de Milivojevic, deen no engem Eelefter de Kipper bezwénge konnt. 2:2 no 90 gespillte Minutten.

Burnley - Chelsea 0:4

Manner Problemer hat Chelsea mat Burnley. Hei stoung et schonn 1:0 fir d'Blues no 45 gespillte Minutten. Duerno hunn dem Sarri seng Männer nach dräi weider Goler dropgesat, esou datt et no 90 Minutten 4:0 aus Siicht vun Chelsea stoung. D'Goler fir d'Londoner hunn de Morata, de Barkely, de Willian an de Loftus-Cheek geschoss.

LINK: Den Iwwerbléck vun der Premier League

La Liga
Barcelona - Real Madrid 5:1

Eng ganz Batter Néierlag gouf et fir Real Madrid am El Clásico géint Barcelona. Et war quasi déi allerlescht Chance fir de Lopetegui, den Trainer vum Real, dee jo ferm ënner Kritik bei de Kinnekleche steet. Schonn no 11 Minutte konnt de Coutinho d'Katalane mat 1:0 a Féierung bréngen, ronn 20 Minutten drop war et de Suarez, deen no engem Eelefter op 2:0 erhéicht huet - mam 2:0 huet den Arbitter béid Ekippen fir d'Paus an d'Kabinne geschéckt.
5 Minutte nom Téi huet de Marcelo op 2:1 verkierzt an et koum Hoffnung bei de Madrilenen op. Dës Hoffnung war net vu laanger Dauer, well Barça an Zäit vu 25 Minutten dräi weider Goler markéiere konnt. Op en Neits war et den Uruguayer Suarez, dee fir seng Faarwe getraff huet an dat direkt zweemol. De Schlusspunkt huet de fréiere Bayern-Spiller Vidal gesat, esou datt d'Partie mat engem 5:1 op en Enn gaangen ass. Ze vermierken ass nach, datt et deen 1. El Classico ouni de Lionel Messi a Cristiano Ronaldo zanter 11 Joer war.

Getafe - Betis Sevilla 2:0

Éischter onspektakulär goung et an der Partie tëscht Getafe an dem Géigner vum F91 an der Europa League Betis Sevilla zou. An der Paus stoung et nach 0:0, ma tëscht der 60. an 62. Spillminutt konnten d'Haushären zwee Goler schéissen a Betis soumat d'Genéck briechen. D'Andalusier koumen nämlech net méi zeréck an de Match an hu schliisslech mat 2:0 auswäerts verluer.

LINK: Den Iwwerbléck vun der La Liga

Serie A
Genua - Udinese Calcio 2:2

Véier Goler sinn an der Partie Genua géint Udine gefall. An der Hallschecht waren d'Haushäre scho mat 1:0 a Féierung gaangen, dat an der 32. Spillminutt duerch de Romulo. Nom Téi goung et Schlag op Schlag an et sinn a 5 Minutten dräi Goler gefall - dat an der 65., 67. a schliisslech an der 70. Minutt. De Gol fir Genua huet de Romero geschoss, d'Goler fir Udinese Calcio hunn de Lasagna an de De Paul geschoss.

Milan - Sampdoria 3:2

Véier Goler si bei dësem Match eleng an den éischte 45 Minutte gefall. Milan war an der 17. Minutt duerch de Crutone a Féierung gaangen, d'Rossoneri hunn awer kuerz drop vum Saponara an dem Quagliarella zwee Goler kasséiert. Den Higuain hat awer eppes géint d'Féierung vun der Samp an huet an der 36. op 2:2 gesat. Mat dësem Score goung et an d'Paus. Am Giuseppe Meazza gouf du schliisslech an der 62. Minutt opgeotemt, dat wéi de Suso d'Lombarde mat 3:2 virbruecht huet. Duerno ass näischt méi geschitt, esou datt Milan déi éischt Victoire zanter längerer Zäit asäckele konnt.

Napoli - Roma 1:1

Relativ fréi am Match konnten d'Gäscht den 1. Gol vun der Partie markéieren. Et war den Ex-Mailand-Spiller El Shaarawy, deen de Ball op eng kuriéis Aart a Weis op 1:0 - mat grousser Hëllef vum réimeschen Defenseur Koulibaly - era konnt setzen. Insgesamt war et een temporäicht Spill, mat de gréissere Chance op neapolitanescher Säit. Déi Hellblo konnten awer bis zu der 1. Hallschecht kee Profit aus hire Méiglechkeete schloen. Déi 2. Hallschecht war méi zerfueren, well et eng Rei giel Kaarten an Auswiesslunge gouf - Napoli war awer nach ëmmer déi besser Ekipp. Schlussendlech konnten d'Neapolitaner sech an der 90. Minutt belounen, dat wéi de Belsch Mertens seng Faarwen duerch ee secke Schoss zeréck an de Match gejot huet. Dëse Gol koum awer ze spéit, well kuerz drop huet den Arbitter ofgepaff.

LINK: Den Iwwerbléck vun der Serie A

Ligue 1
Marseille - PSG 0:2

Laang stoung et am Topp-Duell an der franséischer Ligue 1 0:0 gläich tëscht dem OM an dem PSG. Bis an d'65. Minutt huet et gedauert, bis de PSG déi 1. Kéier hir staark Offensiv esou richteg ausspille konnt. De Choupo-Moting hat fir de jonken Mbappé gestart, dësen ass an der 62. Minutt agewiesselt ginn an huet just dräi Minutten drop well markéiert. Duerno waren et awer d'Haushären, déi onbedéngt an de Match hannescht wollte fannen - et sollt hinnen awer net geléngen. An der 95. Spillminutt war et dunn den Draxler, deen op 2:0 fir seng Faarwen erhéije konnt.

LINK: Den Iwwerbléck vun der Ligue 1

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.