Volleyball3:2-Erfolleg fir Fenteng iwwer Stroossen

Mam 8. Spilldag am Lëtzebuerger Volleyball-Championnat gouf e Samschdeg d'Réckronn vun der aktueller Spillzäit am Dammen- an am Härechampionnat agelaut.

E Samschdeg den Owend war am Lëtzebuerger Volleyball-Championnat bei den Hären an den Dammen den Optakt vun der Réckronn.

Häre-Volleyball
Fenteng - Stroossen 3:2

Am Spëtzematch hat de VC Fenteng Stroossen op Besuch. Ganz serréiert war well den 1. Saz, deen de Gaascht mat 25:23 decidéiere konnt. Am 2. Set war et een Erfolleg fir d'Lokalekipp, déi och ee spannenden 3. Saz mat 29:27 knapp fir sech entscheede konnt. Et war een Hin an Hier, well de 4. Saz konnt erëm de Gaascht kloermaachen, ier et am 5. Set zu engem 15:12-Avantage fir d'Haushäre koum.

Luerenzweiler - Dikrech 0:3

Dem Serge Karier, Coach vum Chev Dikrech, seng Formatioun wollt auswäerts géint de VC Luerenzweiler den Erfolleg. Um Enn konnt d'Ekipp aus der Brauerei-Stad mat 3:0 behaapten. Am 1. Saz stoung eng 25:20 Victoire um Tableau an och den 2. Saz goungt mat 25:21 zu Gonschte vun den Dikrecher op een Enn. Am 3. Saz huet de Chev dunn de Sak mat 25:19 zougemaach.

Esch - Bartreng 2:3

Serréiert goung et am Duell tëscht Esch a Bartreng zou. Déi éischt zwee Sätz gounge mat 25:20 an 25:15 zwar relativ kloer un de Gaascht, ma am 3. an am 4. Saz huet d'Lokalekipp de Schalter ëmgeluecht. Si wannen dës Sätz mat 25:22 a 26:24. Beim Stand vun 2:2 goung et an de 5. Saz, dee mat 15:13 fir Bartreng ausgaangen ass.

VC Belair - Walfer 3:0

D'Lokalekipp vum Belair ass gutt géint den RSR Walfer an de Match komm an huet den 1. Saz mat 25:22 fir sech entscheet. Och d'Sätz 2 an 3 si fir d'Lokalformatioun mat 25:23 an 25:20 op een Enn gaangen.

LINK: Den Iwwerbléck vum Häre-Volleyball

Damme-Volleyball
VB Iechternach - Walfer 0:3

Keng Chance hat de VB Iechternach géint d'Damme vun der Residence. Den 1. Saz konnt Walfer mat 25:19 fir sech entscheeden an och den 2. hat d'Residence mat 25:20 d'Nues vir. Den 3. Saz ass mat 25:17 zu Gonschte vun de Walfer Dammen ausgaangen.

Péiteng - Stroossen 3:1

Saz fir Saz gouf an der Partie tëscht Péiteng a Stroossen ëm d'Victoire gekämpft. Mat 25:18 ass den 1. Saz fir d'Lokalformatioun op een Enn gaangen, ier Stroossen den 2. Saz mat 25:20 fir sech entscheede konnt. Ganz serréiert goung den 3. Saz mat 25:24 aus, Péiteng hat dunn och am 4. Saz mat 25:21 deen néidege sang froid, fir d'Victoire esou kloerzemaachen.

Mamer - Dikrech 1:3

Mat 100% Motivatioun ass de Chev an d'Partie géint Mamer gestart, esou konnte sech déi Dikrecher Dammen den 1. Saz mat 25:15 sécheren. Ma am 2. Saz war awer Mamer mat 25:23 eng Grimmel vir, ier Dikrech am 3. Saz erëm opgedréint an de Set mat 25:13 dominéiert huet. 25:20 ass de 4. Saz zu Gonschte vum Chev ausgaangen.

Stengefort - Gym 3:1

Stengefort ass gutt an de Match gestart an huet déi éischt 2. Sätz mat 25:19 a 25:19 konnte gewannen. Duerno huet de Gaascht ee Liewenszeeche vu sech ginn an huet den 3. Saz mat 25:16 fir sech entscheet. Et ass an de 4. Saz gaangen, deen d'Lokalformatioun um Enn mat 26:24 knapps gewënnt.

LINK: Den Iwwerbléck vum Damme-Volleyball

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.