Futtball InternationalCoupe: Lyon verléiert géint Stroossbuerg, Tottenham klappt d'Chelsea

Um Dënschdeg goufen a Frankräich, England a Spuenien Matcher vun der Coupe gespillt. An a Spuenien gouf et do eng kleng Iwwerraschung.

© AFP
Frankräich
An der Coupe de la Ligue krut Lyon et mat dem Racing vu Stroossbuerg ze dinn. An hei war et Stroossbuerg, déi no 28. Minutte konnten a Féierung goen, dat, nodeem dem Tete mat engem Feeler en Eelefmeter verursaacht hat. Den Ajorque huet sech dunn dës Geleeënheet net huele gelooss, fir den éischte Gol am Match ze schéissen. Lyon hat e bësse Pech, well e Gol vum Fekir gouf wéinst Abseits ofgepaff, den Terrier an den Depay hu just de Potto getraff an an der Nospillzäit vun der éischter Hallschent huet de Fekir e Penalty laanscht de Gol geschoss.

No der Paus huet den Traore et da besser gemaach an déi gutt Virlag vum Depay verwäerten. Ma d'Freet huet net laang gedauert, well 3 Minutte méi spéit, an der 52. Minutt, huet de Kone Stroossbuerg no engem Corner nees a Féierung bruecht. Béid Ekippen hunn nach weider no Vir gespillt, ma e Gol ass dobäi net erauskomm, esou datt Stroossbuerg auswäerts zu Lyon sech an der Coupe konnt mat 2:1 duerchsetzen.

An den anere Véierelsfinalle trëfft Rennes op Monaco, de PSG empfänkt Guingamp a Le Havre muss op Bordeaux.

© AFP


Da gouf et nach zwee Matcher an der Ligue 1. Hei konnt sech Nantes mat 2:0 géit Montpellier duerchsetzen, dat duerch Goler vum Majeed (62') a Pallois (81'). Tëscht Amiens an Angers si keng Goler gefall.

England
An England war et dann e Match vum EFL Cup, aktuell och bekannt als Carabao Cup oder League Cup. Hei spillen d'Ekippen aus den véier héchsten Englesche Ligue géinteneen an de Gewënner qualifizéiert sech fir d'Uefa Europa League.

Um Mëttwoch stounge sech hei Tottenham an Chelsea géintiwwer. Am d'Heemekipp konnt no 27 Minutten a Féierung goen. No engem Foul vum Arrizabalaga huet den Arbitter op de Punkt gewisen an de Kane huet sech net huele gelooss, fir de Ball eranzeschéissen. An der 40. Minutt hat den N'Golo Kanté dann eng gutt Chance op den Ausgläich, ma hie konnt no enger gudder Flank just de Potto treffen. Esou geet et mat 1:0 fir Tottenham an d'Paus.

No der Paus hat wuel och Tottenham seng Chancen, ma Chelsea hat der méi an de Christensen eng ganz grouss, déi knapp laanscht de Potto gaangen ass. Pech hat d'Chelsea dann och nach, well an der 57. Minutt hat et no Handspill an Eelefmeter ausgesinn, ma den Arbitter huet dëst net esou interpretéiert. Och d'Awiesselspiller hunn net de wichtege Gol geschoss, esou datt Tottenham um Enn de Match mat 1:0 fir sech entscheet.

Nächste Mëttwoch gëtt et dann nach de Retourmatch tëscht béiden Ekippen. An der anerer Halleffinall spillt Burton Albion aus der League One (drëtt englesch Liga) géint Manchester City.

Spuenien
Am eenzege Match an der Copa del Rey ass de Sporting Gijon aus der zweeter spuenescher Liga op den FC Valencia getraff. An der 34. Minutt war den Aussesäiter duerch den Noblejas a Féierung gaangen, ma an der Nospillzäit vun der éischter Hallschent huet de Parejo ausgeglach.

Laang hat et no engem 1:1 ausgesinn, ma den Trainer vu Gijon huet dunn eng glécklech Hand bewisen. An der 78. Minutt huet hien de Blackman agewiesselt, deen eng Minutt méi spéit seng Faarwen nees a Féierung bruecht huet. Valencia konnt dorobber net méi reagéieren esou datt Gijon iwwerraschend den Allermatch géint Valencia ka gewannen.

Déi aner Matcher vun der 16tels Finall ginn um Mëttwoch an Donneschdeg gespillt, d'Retourmatcher sinn déi nächst Woch.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.