Futtball-NationalekippHoltz: Déi nächst Jore réckelt net vill aus der FLF-Jugend no

An der A-Ekipp gëtt et aktuell e Stack vu Spiller. Wat de Nowuess aus der Futtballschoul zu Monnerech ugeet, ass d'Decke relativ dënn.

© pressphoto Archiv

Den 18. November hat déi Lëtzebuerger Futtballnationalekipp hire leschte Match. Et war den 1:1 an der Nations League a Moldawien.

D'FLF-Formatioun hat duerno kee Rendezvous méi. De Franky Hippert huet beim Nationaltrainer Luc Holtz nogefrot, ob deen dann elo zanterhier Congé hat: Nee, dat war kloer net de Fall, esou de Concernéierten. Fir d'éischt gouf emol d'Analys vun der Nations League gemaach. Dono hat de Luc Holtz d'Méiglechkeet, fir op London ze goen, wou e sech mat deenen aneren Nationaltraineren austausche konnt. Da war hien och nach zu Dublin bei der Auslousung vun der EM-Qualifikatioun an dann ass hien och nach permanent am Kontakt mat de Spiller.

Futtball-Nationalekipp/Reportage Franky Hippert

D'Enttäuschung iwwert d'Defaite géint Wäissrussland an domat d'Net-Qualifikatioun fir d'Halleffinalle vun der Nations League war grouss. Et ass een natierlech gespaant, wat no der detailléierter Analys d'Conclusioune vum FLF-Nationaltrainer sinn. De Luc Holtz ass der Meenung, dass et gréisstendeels Klengegkeete waren, déi den Ënnerscheed gemaach hunn.

Dat neit Joer huet ugefaangen a bis virun e puer Joer gouf et dunn ëmmer den traditionelle Stage am Januar fir d'Rout Léiwen. Deen ass awer och dëst Joer nees net, dozou sot de Luc Holtz, dass d'BGL-Ligue-Veräiner alleguerte selwer eng Preparatioun maachen an dass ee se net aus där Preparatioun wéilt erausrappen.

Virschau op d'Joer 2019

Virschau op d'Futtballjoer 2019 / Rep. Franky Hippert



2019 steet fir d'Lëtzebuerger Futtballnationalekipp d'Europameeschterschaftsqualifikatioun um Programm, déi am Mäerz ufänkt. Mat Portugal Serbien an der Ukrain kruten d'Rout Léiwen richteg sauer Géigner zougeloust. Just géint Litauen, ass realistesch gesinn, e bësse méi dran. An dat ass dann och direkt deen éischte Match an dëser Campagne, den 22. Mäerz heiheem am Stade Josy Barthel. Fir den FLF-Nationaltrainer ass dat e Match, wou ee kéint an d'A faassen, fir Punkten ze kréien, och wann een net de Favorit wäert sinn. Géint déi aner Géigner wäert et dogéint ganz schwéier ginn, fir sportlech gesinn e Resultat ze maachen, sou de Luc Holtz.

Beim leschten duebele Rendezvous an der Nations League géint Wäissrussland a géint Moldawien, war de Vincent Thill jo scho virun de Matcher nees bei säi Veräin op Pau gereest, an de Christopher Martins ass tëscht deenen zwou Partien op Troyes zeréckgaangen. D'Fro stellt sech natierlech wéi den Nationaltrainer dat an Zukunft wëll geréieren, wann esou jonk Spiller, déi nach net richteg am Profimilieu etabléiert sinn, de Spagat tëscht Veräin an Nationalekipp ze maachen hunn. Bis ewell hat de Luc Holtz nach ni d'Gefill, datt ee Spiller net wollt kommen, wann dat emol de Fall wär, da géing dësen och net méi vun him selektionéiert ginn. A béide rezente Fäll wär et esou gewiescht, datt béid Spiller ugeschloe waren an dat wär entscheedend gewiescht, sou de Luc Holtz. Den Nationaltrainer geet dovunner aus, datt dës Problematik net ginn ass, wann d'Spiller fit sinn.  

An der A-Ekipp gëtt et aktuell e Stack vu Spiller. Wat de Nowuess aus der Futtballschoul zu Monnerech ugeet, ass d'Decke relativ dënn, wat do mëttelfristeg eng Chance huet, fir eropzeréckelen.

Interessant dierft et sinn, wéi et an den Dossiere vun den 3 Spiller Ryan Johansson vu Bayern München, Vahid Selimovic vum FC Metz, an Dany Mota vun Entella aus der drëtter Divisioun an Italien, weider geet. Vun deenen zwee leschtgenannten erwaart sech den Nationaltrainer Luc Holtz, virum éischte Qualifikatiounsmatch eng Äntwert, ob si fir Lëtzebuerg wëlle spillen oder net.

 

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.