BasketD'Sparta léisst géint d'Etzella wichteg Punkte leien

Fir d'Sparta geet et am Championnat nach ëm déi leschte Plaz am Titelgrupp. E Freideg den Owend huet ee géint de Leader awer mat 69:86 verluer.

Bei den Dammen an den Häre gouf e Freideg den Owend schonn ee Match vum 16. Spilldag an der Total League gespillt. A béide Partië stounge sech d'Sparta Bartreng an d'Etzella Ettelbréck géigeniwwer. Bei den Häre konnt sech de Leader vun Ettelbréck behaapten a bei den Damme gouf et eng Victoire fir d'Sparta.

Häre-Basket
Sparta Bartreng - Etzella Ettelbréck 69:86

Fir d'Sparta geet et nach ëm déi 6. an domadder leschte Plaz am Titelgrupp vum Championnat. 3 Spilldeeg viru Schluss gouf et e Freideg den Owend awer eng Defaite géint de Leader Etzella Ettelbréck. Um Enn huet ee sech misse mat 69:86 geschloe ginn.

Nom éischte Véierel louch d'Lokalekipp mat 20:29 hannen, bis d'Paus ass dëse Réckstand weider gewuess an esou ass ee beim Tëschestand vu 34:50 an d'Kabinn gaangen. No der Paus ass et deene Bartrenger gelongen de Retard liicht ze verkierzen an esou louch een 10 Minutte viru Schluss mat 52:64 hannen. Am leschte Véierel ass et der Lokalekipp och net gelongen d'Partie nach eng Kéier spannend ze maachen an esou verléiert een um Enn verdéngt mat 69:86. Duerch dës Defaite kéinten d'Musel Pikes e Samschdeg duerch eng Victoire géint de Racing an der Tabell mat der Sparta gläichzéien.

Bei der Sparta war de Rodgers mat 21 Punkten de beschte Spiller, bei der Etzella huet de Mc Nutt 27 Punkte markéiert.   

LINK: Den Iwwerbléck vum Häre-Basket

LINK: Den Iwwerbléck vun der Nationale 2

Damme-Basket
Klickt op d'Foto, fir d'Galerie ganz ze gesinn.© Maya a Robert Straus


Sparta Bartreng - Etzella Ettelbréck 86:75

D'Sparta Bartreng konnt sech e Freideg den Owend duerch eng besser zweet Hallschent knapp mat 86:75 géint d'Etzella Ettelbréck behaapten. Et war eng enk Partie tëscht béiden Ekipp an esou war et bis zum Schluss spannend. No 10 Minutte louchen déi Bartrengerinne mat 20:18 am Avantage. Duerno hunn d'Gäscht e bësse besser getraff, sou datt si an der Paus mat 49:45 a Féierung louchen. D'Sparta konnt am drëtte Véierel de Match nees dréinen a sech e Virsprong vun zwee Punkten erausspillen. An de leschten 10 Minutten huet d'Lokalekipp et fäerdeg bruecht, de Géigner op Distanz ze halen, de Virsprong weider auszebauen an de Match mat 86:75 ze gewannen.

Bei der Sparta huet d'Hernandez mat 30 Punkte am Beschte markéiert. Bei der Etzella war et d'Montgomery mat 22 Punkten. 

LINK: Den Iwwerbléck vum Damme-Basket

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.