Lëtzebuerger Sportler am AuslandKamil Rychlicki beschte Spiller bei Victoire géint Monza

An der zweeter Däitscher Basketball-Bundesliga hunn d'Gladiators Tréier e Freideg den Owend mat 81:87 zu Chemnitz verluer.

An der 2. Däitscher Bundesliga vum Handball gewënnt d'Tina Welter mat de Waiblingen Tigers mat 27:26 géint Werder Bremen. Mat 7 perséinleche Goler war d'Lëtzebuergerin bescht Golgetterin fir d'Tigers.

Mat Waremme konnt de Chris Zuidberg an der éischter Beslcher Liga am Volleyball mat 3:2 géint Prefaxis Menen gewannen.

De Kamil Rychlicki huet e Samschdeg an Italien mat Ravenna een nawell ganz spannende Match mat 3:2 géint Monza gewonnen. De Lëtzebuerger Nationalspiller huet 25 Punkte markéiert a gouf domat zum beschte Spiller vum Match gewielt.




An der éischter Liga am Basket an Holland gewënnt den Alex Laurent mat Den Helder mat 76:66 géint Leeuwarden. An der Tabell stinn se op der 6. Plaz vun 10 Ekippen.

Fir d'Gladiators Tréier an den Thomas Grün gouf et e Freideg den Owend an der zweeter Däitscher Basketball-Bundesliga keng Victoire zu Chemnitz. An enger enker Partie huet ee sech um Enn misse mat 81:87 (18:19, 25:23, 21:17, 17:28) géint de Leader geschloe ginn. De Lëtzebuerger huet 6 Punkte markéiert. No 18 Spilldeeg steet Tréier mat 18 Punkten an der Tabell op der 8. Plaz a géing den Ament de Sprong an d'Playoffs esou just packen.

D'Magaly Meynadier huet e Sonndeg mat de Wohnbau Angels 57:72 géint TK Hannover verluer. D'Lëtzebuergerin huet 2 Punkte markéiert a stoung 17 Minutte laang um Terrain.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.