Handball-WMFrankräich, Däitschland, Kroatien, Dänemark a Schweden ouni Néierlag weider

Déi éischt Gruppephas bei der Handball-WM an Däitschland an Dänemark ass zanter en Donneschdeg den Owend eriwwer.

© AFP
Et gouf an enger éischter Phas a 4 Gruppe mat allkéiers 6 Ekippe gespillt, woubäi déi éischt dräi aus all Grupp sech fir den nächsten Tour qualifizéiere konnten.

An enger zweeter Phas, gëtt et elo nach eemol eng weider Gruppephas, déi Kéier sinn et zwou Gruppe mat jeeweils 6 Natiounen. Déi éischt zwee aus all Grupp qualifizéiere sech spéider fir d'Halleffinallen.

Am Grupp A konnt sech den amtéierende Weltmeeschter Frankräich déi éischt Plaz sécheren. Bis op ee Remis géint Däitschland konnt een all Match gewannen. Déi zweete Plaz geet dann och un Däitschland, déi och nach géint Russland gläichgespillt haten. Op d'Plaz dräi kënnt d'Ekipp aus Brasilien, dat mat 3 Victoiren an zwou Néierlagen. Net méi ëm de Weltmeeschtertitel kämpfen domat Russland, Serbien a Korea.

Kroatien kënnt am Grupp B op déi éischte Plaz, dat virum Europameeschter Spuenien. Kroatien huet all hir fënnef Partië gewonnen, esou och en Donneschdeg den Owend mat 23:19 géint Spuenien. Hannert de Spuenier op déi drëtt Plaz kommen d'Handballer aus Island, déi 3 Matcher gewanne konnten a sech zweemol hu misse geschloe ginn. Fir Mazedonien, Bahrain a Japan ass den Dram vum Weltmeeschtertitel eriwwer.

Dänemark konnt am Grupp C all Match gewannen a geet domat och als Gruppenéischten an déi nächst Ronn. D'Dänen hunn en Donneschdeg den Owend mat 30:26 géint Norwegen gewonnen, déi domat op déi zweete Plaz kommen. Als 3. sinn och d'Tunesier een Tour virun. Net duergaangen ass et hei fir Chile, Éisträich a Saudi-Arabien.

Am Grupp D kënnt Schweden souverän op déi éischte Plaz. Si konnten och all hir Matcher gewannen. Déi zweete Plaz ass fir Ungarn, dat mat 2 Victoiren, 2 Remis an enger Néierlag. Déi drëtt Plaz geet un Egypten, déi 2 Matcher gewonnen, 2 verluer an 1 gläichgespillt hunn. Fir de Vizeweltmeeschter vun 2015 Katar, Argentinien an Angola sollt et net duergoen.

An der nächster Phas spillen am Grupp I elo Kroatien, Däitschland, Frankräich, Spuenien, Island a Brasilien géinteneen. Am Grupp II spillen Dänemark, Schweden, Norwegen, Ungarn Egypten an Tunesien géinteneen. Hei ginn awer déi Punkten, déi ee schonn an enger éischter Gruppephas géint eng Ekipp kritt huet, iwwerholl a géint dës Ekippe spillt een dann net méi.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.