Handball-WMDäitschland nieft Frankräich fréizäiteg an der Halleffinall

An engem intensive Match konnt sech déi däitsch Ekipp e Méindeg den Owend knapp mat 22:21 géint Kroatien duerchsetzen.

Lassgaang war de Match fir déi Däitsch awer schlecht, well de Martin Strobel sech an der 9. Minutt blesséiert hat a fir de Rescht vun der WM, déi jo an Däitschland gespillt gëtt, ausfält.

Déi däitsch Ekipp huet gutt verdeedegt, hat awer Schwäche beim Ofschléissen. Doduerch sinn d'Kroaten zum Schluss nees erukomm. Ganz knapp sollt et awer net duergoe fir si.

Am anere Méindesmatch am Grupp 1 hat Spuenien Brasilien mat 36:24 iwwerrannt.

Am Grupp 1 si Frankräich an Däitschland uewenop an der Tabell an allebéid si fréizäiteg fir d'Halleffinall qualifizéiert.

Och am Grupp 2 gouf e Méindeg gespillt:

Schweden - Norwegen 27:30
Ägypten - Dänemark 20:26

Am Grupp 2 hunn Dänemark an Norwegen déi beschte Kaarten; d'Schweden hunn awer och nach Chancen op d'Halleffinall.

Déi lescht 6 Matcher vun der Haaptronn ginn all e Mëttwoch gespillt. Dann decidéiert sech, wie Gruppenéischten am Grupp 1 gëtt a wien et leschten Enns am Grupp 2 ënnert déi lescht 4 Ekippe packt.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.