HandballBierchem klappt d'Red Boys mat 30 op 29

De Match vum Mëttwoch war dee leschte Match vun der Qualifikatiounsronn. An et war spannend bis déi lescht Minutt! Ausserdeem: Arber Qerimi op Bierchem.

Bierchem klappt d'Red Boys mat 30 op 29 (14.02.2019)
De Match vum Mëttwoch war dee leschte Match vun der Qualifikatiounsronn. An et war spannend bis déi lescht Minutt! Ausserdeem: Arber Qerimi op Bierchem.
E Mëttwoch den Owend war am Handball déi wichteg Nodrospartie Red Boys Déifferdeng géint Bierchem. No 60 ganz spannende Minutte stoung et 30:29 fir Bierchem.

Red Boys - Bierchem: De Reportage vum Serge Olmo



Bei Bierchem ass et jo schonn eng länger Zäit gewosst, datt de Lé Biel de Rescht vun der Saison wäert ausfalen.

Bei de Red Boys hunn 3 Spiller gefeelt: den ugeschloene Joe Faber, de Keeper Sedin Zuzo, deen an der Vakanz ass, an de Nationalspiller Yann Hoffmann, dee seriö un der Schëller blesséiert ass a riskéiert ganz laang auszefalen.

Déi Bierchemer, déi de Weekend Coupe d'Europe gespillt haten, ware séier am Rhythmus dran. No ronn 23 Minutte waren si och 3 Goaler vir bei 11:8.

D'Säite goufe mam Resultat 14-13 fir déi Réiserbänner gewiesselt. No der Paus hunn déi Bierchemer phaseweis midd gewierkt an d'Red Boys sinn als Ekipp ganz zolidd opgetrueden.

No 44 Minutte waren d'Red Boys 6 Goaler vir.

7 Minutten drop haten déi Réiserbänner awer de Match gedréint a si ware mat 27:26 am Avantage. Si haten och 2 Mann méi um Terrain fir 2 Minutten.

Allgemeng war de Gäscht e 6:0 gelongen.

D'Schlussphas war extrem spannend. Den entscheedende Goal ass eng 30 Sekonne viru Schluss gefall.

No den Aller- a Retourmatcher huet den Handball Esch 23 Punkte viru Käerjeng mat 21 Punkten. Den HC Bierchem ass op der 4. Plaz mat 19 Punkten. Am Playoff ginn d'Punkten duerch 2 gedeelt.

No enger klenger Paus geet et de 27. Februar weider mam Final Four vun der Coupe. Dono eréischt fänkt de Playoff un.

Interessanten Transfert
Déi Bierchemer hu mam Arber Qerimi, dem 28 Joer ale Kapitän vun der belscher Nationalekipp e staarke Mann engagéiert.

Déi talentéiert Mëtt kënnt aus Direktioun Zagreb a krut emol bis d’Enn vun der Saison e Kontrakt.

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.