Basket-CoupeSteesel wënnt zu Zolwer, Hiefenech klappt Hesper

En Donneschdeg goufen am Härebasket déi 2 lescht Véierelsfinallen an der Coupe gespillt.

Do stounge sech den Telstar Hesper an Hiefenech géintiwwer, grad wéi Zolwer a Steesel.

LINK: Alleguerten d'Resultater aus der Coupe am Iwwerbléck

Basket Zolwer - Amicale Steesel 78:86
Mat 10 Punkten Avance ass de Basket vun Zolwer an de Match gaangen, wou si d'Amicale Steesel doheem empfaangen hunn. Den Titelverdeedeger huet sech beim Veräin aus der Nationale 2 e bësse schwéier gedoen a konnt hei net ganz iwwerzeegen. Zum Schluss sprengt dann eng knapp Victoire vun 8 Punkten eraus, dat mat 78:86.

© Ant Deister


FOTOGALERIE: Zolwer - Steesel

Telstar Hesper - US Hiefenech 74:82
© Maya a Robert Straus


Als leschte Match vun de Véierelsfinalle stounge sech zwou Ekippen aus der Nationale 2 géintiwwer. Hiefenech hat sech fir dës Ronn qualifizéiert, andeem si sech iwwerraschend géint den T71 Diddeleng 103:102 duerchsetze konnten. Ma och am Duell mat enger Ekipp aus der eegener Divisioun haten déi Hiefenecher um Schluss d'Nues vir. Si konnte sech mat 82:74 beim Telstar duerchsetzen.

FOTOGALERIE: Hesper - Hiefenech

Schonn um Mëttwoch

Musel Pikes - Sparta Bartreng 62:75

Bei de Musel Pikes war deen neien Amerikaner Wright blesséiert a konnt net spillen. D'Pikes haten deemno just ee Profi géint d'Sparta.

D'Sparta hat dann och dee besseren Depart a konnt deen éischte Véierel kloer mat 23 op 16 fir sech entscheeden. Och an deenen dräi Véierelen duerno hat si ëmmer d'Nues vir, wann och just knapp: 21:18 am zweeten, 17:16 am drëtten a 14:12 am véierten.

Um Enn war et awer eng kloer 75:62-Victoire fir déi Bartrenger, déi domat an der Halleffinall vun der Coupe stinn.

Etzella Ettelbréck - Basket Esch 84:67

D'Etzella géint de Basket Esch© Robert Straus


3 Deeg, nodeems d'Etzella am Championnat géint de Basket Esch gewonnen hat, wollten d'Gäscht et e Mëttwoch an der Coupe besser maachen. Vun deem Virsaz war am Ufank net vill ze gesinn, well no 5 Minutte war Ettelbréck 13:0 vir. Géint eng aggressiv Defense vum Géigner huet Esch net zu sengem Spill fonnt a louch nom 1. Véierel 8:26 hannen!

Am 2. Véierel hunn dunn den Jordan Hicks an de Clancy Rugg méi Responsabilitéit iwwerholl. Allebéid hu vun der Dräierlinn getraff an esou ass den Ecart op 11 Punkte geschmolt, bei 41-30. Mä Ettelbréck huet reagéiert a bei 49-32 an der Paus war deen ale Virsprong erëm do.



Wéi Esch déi 2. Hallschecht erëm 5. Minutte laang kee Kuerf geschoss huet an Ettelbréck mat engem 11:0 de Score op 58:32 erhéicht huet, huet et scho ferm no Virentscheedung ausgesinn.

Allerdéngs hat den Ettelbrécker Coleman 3 Feeler an huet sech defensiv mussen e bëssen zréckhalen. Dovun huet Esch profitéiert, fir bei 47:62 nach eng Kéier ze hoffen?

D'Etzella huet awer net panikéiert, huet weider hiert Spill opgezunn, fir sech um Schluss däitlech mat 84:67 fir d'Halleffinall vun der Coupe ze qualifizéieren (26:8, 23:24, 13:15 an 22:20).

© Robert Straus


FOTOGALERIE: Etzella Ettelbréck - Basket Esch

Basket Coupe: De Reportage vum Guy Seyler



Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.