FOTOEN A VIDEOENBob Jungels wënnt d'Stroossechampionnat

De Bob Jungels ka säi Championstitel verdeedegen. Um Sonndeg setzt de Jungels sech souverän virum Alex Kirsch an dem Ben Gastauer duerch.

Bob Jungels wënnt bei der Elite / Rep. Gilles Tricca



De Bob Jungels huet senge Konkurrente keng Chance gelooss. Hie setzt sech en solitaire am Championnat duerch.

Extrait Bob Jungels



Bei der Elite an den Espoiren
gouf et iwwer 155 Kilometer ee Circuit vun 19 Kilometer, deen 8 Mol ze fuere war. Schonns an der zweeter Montée huet sech d'Echappé forméiert. Et waren dat déi dräi Profie Bob Jungels, Ben Gastauer an Alex Kirsch. Donieft konnt sech den Espoir Ivan Centrone un den Tempo vun de Profien drunhänken. Ugefouert vum Bob Jungels haten déi véier Coureuren un der Spëtzt ganz séier eng remarquabel Avance vun 3 Minutten op de Verfolgergrupp erausgefuer.

No 3 Tier louch déi Avance schonns bei wäit iwwer 4 Minutten. Hannert deene 4 Coureuren an der Echappé huet sech e Grupp vun 3 Coureure forméiert, déi allerdéngs net a Fro koume fir déi Course mat ze decidéieren.

Am 4. Tour, bei knapp 80 Kilometer, huet de Bob Jungels eng gelongen Attack lancéiert. An engem ganz konstanten Tempo konnt den ale Champion sech eng confortabel Avance erausfueren, déi vun Tour zu Tour gewuess ass. Bei Kilometer 120 hat de Coureur vu Quick-Step Floors eng Avance vu 4 Minutten an 10 Sekonnen op seng dräi Poursuivanten, de Ben Gastauer, den Alex Kirsch an den Ivan Centrone. 
Beim leschte Passage hat de Bob Jungels 7 Minutten Avance.

Um Enn setzt sech de Bob Jungels mat enger Avance vu ronn 9 Minutte virum Alex Kirsch an dem Ben Gastauer duerch. Bei den Espoiren wënnt den Ivan Centrone de Championstitel, dat virum Jan Petelin an dem Tom Wirtgen.

Bei der Elite ouni Kontrakt konnt sech den Tim Diederich virum Lex Reichling an dem Alec Lang duerchsetzen.

Cyclissem: Bob Jungels verdeedegt säin Titel (25.06.2017)
Nieft dem Bob Jungels stoungen den Alex Kirsch an de Ben Gastauer um Podium.


Bei den Damme geet den Titel nees un d'Christine Majerus. Si hat eng däitlech Avance vu ronn 5 Minutten. D'Chantal Hoffmann war aus familiäre Grënn net mat um Depart, soudatt déi zweet Plaz ouni Konkurrenz un d'Elise Maes gaangen ass.

D'Christine Majerus um Mikro vum Jana Peters



Op deene 77 km ronderëm Remerschen hat am Ufank d'Elise Maes den Tempo diktéiert, ma zwou Ronne viru Schluss huet d'Christine Majerus dunn awer nach eemol en Zant zougeluecht an dem Elise Maes keng Chance méi gelooss. No der Victoire am Contre-la-montre war et deemno alt nees e perfekten Optrëtt bei den nationale Meeschterschafte vun dësem Joer fir d'Christine Majerus.

D'Elise Maes um Mikro vum Jana Peters



Bei den Espoirs Damme war den Titel fir d'Claire Faber. Bei de Juniorinne war d'Anne-Sophie Harsch déi Séierst.

Championnat am Cyclissem: Christine Majerus nees Championne (25.06.2017)
Coursë vun den Dammen a Junioren am Resumé!


An der Course vun de Junioren hat um Enn de Ken Conter d'Nues vir. Zweete gouf de Rick Stemper, dat virum Felix Schreiber, deen sech als Drëtte klasséiert.

© Jana Peters


D'Lëtzebuerger Championen op der Strooss am Iwwerbléck

Minimes: Jonathan Kalweit / Noa Langer
Cadets: Charel Dax / Caroline Reuter
Débutants: Jang Leyder / Nina Berton
Junioren: Ken Conter / Anne-Sophie Harsch
Dammen: Christine Majerus
Espoires: Claire Faber
Masters: Christian Poos
Elite: Bob Jungels
Espoirs: Ivan Centrone
Elite ouni Kontrakt: Tim Diederich

D'Championen op der Strooss an eisen Nopeschlänner

Andréck vun de Coursen um Samschdeg (Maya a Robert Straus)

Impressioune vun de Meeschterschaften am Cyclissem vum Roland Miny

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.