FOTOEN a VIDEO: Vuelta a EspañaTrentin wënnt lescht Etapp, Froome Schlussgewënner

E Sonndeg war déi 21. a leschten Etapp vun der Vuelta 2017. Nom Tour de France gewënnt de Chris Froome och d'Vuelta.

Iwwer 117 Kilometer ass et vun Arroyolominos op Madrid gaangen. Den Ufank vun der Etapp hunn d'Coureuren et ganz gemittlech ugoe gelooss. De Chris Froome huet scho mol mat senge Co-Equipiere vu Sky op d'Victoire vun der Vuelta 2017 ugestouss.




Och den Alberto Contador huet de luesen Tempo genotzt fir senge Fans Äddi ze soen. Fir de Spuenier ass et de leschte groussen Tour, hien hänkt jo bekanntlech de Vëlo an Zukunft un den Nol. Hien hat dann och d'Éier fir virum Peloton als éischte Coureur a Madrid eranzefueren.




Zu Madrid ass um Schlusscircuit den Tempo awer an d'Luucht gaangen, schliisslech goung et jo nach ëm d'Victoire vun der leschter Etapp. 30 Kilometer virun der Arrivée konnte sech 3 Coureuren ofsetzen. Mat dobäi den Alessandro de Marchi (BMC), de Rui Costa (UAE Team Emirates) an den Nicholas Schultz (Caja Rural-Seguros RGA). Si haten eng maximal Avance vu 15 Sekonnen op de Peloton. De Nicholas Schultz ass vun den 3 un der Spëtzt fir d'éischt agefaange ginn. 5 Kilometer virun der Arrivée war dunn och Schluss fir den Alessandro de Marchi an de Rui Costa.

Op de leschte Kilometer hunn d'Sprinter-Equippen den Tempo extrem héich gehalen an et war eng hektesch Finall. Um Enn war et de Matteo Trentin dee sech seng 4. Etappevictoire konnt sécheren.




De Chris Froome wënnt nom Tour de France och d'Vuelta 2017, nom Jacques Anquetil (1963) an dem Bernard Hinault (1978) ass de Coureur vu Sky den drëtte Cyclist deem dat geléngt. Fir de Brit ass et iwwregens déi éischte Victoire bei der Vuelta. Bis elo war et och nach kengem Coureur a Groussbritannie gelongen zwee grouss Tier ze gewannen. Um Podium stoungen nach den Italiener Vincenzo Nibali an de Russ Ilnur Zakarin. Si haten e Retard vun 2 Minutten a 15 Sekonnen respektiv 2 Minutten an 51 Sekonnen.

Nieft dem rouden Trikot vum Leader krut de Chris Froome e Sonndeg och nach den Trikot vum Coureur mat de meeschte Punkten iwwerreecht. Beschte Grimpeur gëtt bei der Vuelta 2017 den Italiener Davide Villella. Astana wënnt d'Equippewäertung.

De Bob Jungels gëtt op der leschter Etapp den 113. op 58 Sekonnen. Am Schlussklassement steet de Lëtzebuerger op der 42. Plaz mat engem Retard vun 1 Stonn 58 Minutten a 17 Sekonnen.

Vuelta: Trentin wënnt lescht Etapp, Froome Schlussgewënner (10.09.2017)
E Sonndeg den Owend ass d'Vuelta op en Enn gaangen. De Matteo Trentin konnt seng 4. Etappevictoire feieren. De Froome huet Geschicht geschriwwen.


Klassement vun der 21. Etapp
1
TRENTIN Matteo QUICK - STEP FLOORS 3h 06' 25''
2
MANZIN Lorenzo FDJ + 00' 00''
3
ANDERSEN Søren Kragh TEAM SUNWEB + 00' 00''
4
VAN ASBROECK Tom CANNONDALE DRAPAC PROFESSIONAL CYCLING TEAM + 00' 00''
5
GARCIA Ivan BAHRAIN - MERIDA + 00' 00''
6
NIELSEN Magnus Cort ORICA - SCOTT + 00' 00''
7
VANBILSEN KENNETH COFIDIS SOLUTIONS CREDITS + 00' 00''
8
MODOLO Sacha UAE TEAM EMIRATES + 00' 00''
9
SCHWARZMANN Michael BORA - HANSGROHE + 00' 00''
10
HOELGAARD Daniel FDJ + 00' 00''


Schlussklassement
1
FROOME Christopher TEAM SKY 82h 30' 02''
2
NIBALI Vincenzo BAHRAIN - MERIDA + 02' 15''
3
ZAKARIN Ilnur TEAM KATUSHA ALPECIN + 02' 51''
4
KELDERMAN Wilco TEAM SUNWEB + 03' 15''
5
CONTADOR Alberto TREK - SEGAFREDO + 03' 18''
6
POELS Wouter TEAM SKY + 06' 59''
7
WOODS Michael CANNONDALE DRAPAC PROFESSIONAL CYCLING TEAM + 08' 27''
8
LOPEZ MORENO Miguel Angel ASTANA PRO TEAM + 09' 13''
9
KRUIJSWIJK Steven TEAM LOTTO NL - JUMBO + 11' 18''
10
VAN GARDEREN Tejay BMC RACING TEAM + 15' 50''


© afp


Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.