VIDEO: Internationale Cyclocross ConterSoete wënnt, Dias dos Santos beschte Lëtzebuerger

Um Sonndeg war zu Conter den 1. internationale Cyclocross vun der Saison. D'Coursen zielen och fir de Skoda Cross Cup.

Daan Soete wënnt den internationale Cyclocross zu Conter (29.10.2017)
Aus Lëtzebuerger Siicht war de Vincent Dias Dos Santos als 10. de Beschten.
Internationale Cyclocross zu Conter / Reportage Lynn Kayser



De Belsch Daan Soete an den Hollänner Corne van Kessel hu sech vum Depart ewech vun hire 56 Konkurrenten ofgesat. Den Daan Soete huet der Saach awer net laang nogekuckt an am Agang vum zweeten Tour koum du schonn déi decisiv Attack. Den Hollänner konnt net nogoen. Den Daan Soete, deen de leschte Weekend beim Weltcup zu Koksijde de 6. gi war, huet de Corne van Kessel déi 60 Minutten iwwer op Distanz gehalen a gewënnt no enger ganz dominanter Course mat enger Avance vu 57 Sekonnen. Fir den Daan Soete ass alles wéi geplangt gelaf. Op de Podium fiert nach de Belsch Jonas Degroote.

De Felix Schreiber an de Vincent Dias Dos Santos kuerz no der Arrivée.© Lynn Kayser / RTL.lu


D'Lëtzebuerger Coureuren hate wéi erwaart näischt mam Ausgang vun der Course ze dinn, hu sech géint déi staark international Konkurrenz awer gutt geschloen. D'Decisioun ass hei eréischt ganz zum Schluss gefall. De Vincent Dias dos Santos an den 18 Joer jonke Felix Schreiber aus dem Préizerdaul hu sech nämlech e spannend Duell geliwwert. Den Téitenger ass ëmmer nees zeréck gefall, ënnert anerem wéinst technesche Problemer, mä am leschten Tour war den Dias dos Santos nees am Rad vum Schreiber. Déi Zwee sinn dunn an de Sprint gaangen an de Vincent dias dos Santos war hei méi séier. 

Dass et um Enn déi 10. Plaz ginn ass, op 4 Minutten an 39 Sekonne stellt den Téitenger gréisstendeels zefridden. De Felix Schreiber gëtt den 11. op 4 Minutten 42 Sekonnen.

Extrait Felix Schreiber



Helen Wyman wënnt den internationale Cyclcross zu Conter (29.10.2017)
D'Christine Majerus klasséiert sech op der 2. Plaz.


Bei der internationaler Dammecourse konnt sech d'Britin Helen Wyman an de Palmarès aschreiwen. D'Christine Majerus gëtt déi Zweet op 57 Sekonnen. D'Lëtzebuerger Championne huet am Ufank vun der Course versicht matzehalen, huet awer séier missen agesinn, dass d'Britin um Sonndeg zu Conter méi staark war.

Och wann de Cyclocross fir d'Christine Majerus dëst Joer nees eng reng Preparatioun op d'Stroosesaison ass, huet d'Lëtzebuerger Championne d'WM Enn Januar zu Valkenburg fest am Bléck.



Bei den Debutanten hu sech den Tschech Jan Zatloukal an de Belsch William Lecerf eng enk Course geleescht. Um Enn konnt sech den Tschech am leschten Tour ofsetzen an d'Victoire feieren, dat mat enger Avance vu knapp 5 Sekonnen op de Belsch. Op déi drëtte Plaz fiert de Fransous Tom Paquet. Beschte Lëtzebuerger gëtt als 4. den Alexandre Kess vu Käl. 5. gëtt de Philippe Reuter aus dem Préizerdaul. Bei de Meedercher gewënnt d'Marie Schreiber aus dem Préizerdaul.



An der Course vun Junioren ass d'Decisioun ëm Victoire am leschten Tour gefall. Nodeems sech de Milan Ziemerlink am zweetleschten Tour eng kleng Avance konnt erausfueren, konnt den Hollänner dës awer net bis op d'Arrivée halen. Hien huet um leschte Kilometer de Fransous Ugo Bertrand nach misse laanscht zéie loossen. Drëtte gëtt de Belsch Ryan Cortjens. Als beschte Lëtzebuerger klasséiert sech de Nicolas Kess vu Käl op 17 Sekonnen.



De Circuit zu Conter hat eng Längt vun 2600 Meter.

PDF: d'Resultater vum Cyclocross zu Conter

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.