VIDEO: RIPCyclist Jempy Schmitz am Alter vu 85 Joer gestuerwen

Aus dem Cyclissem ass et déi traureg Nouvelle, dass de Jempy Schmitz en Dënschdeg de Moien am Alter vu 85 Joer gestuerwen ass.

Cyclist Jempy Schmitz am Alter vu 85 Joer gestuerwen (14.11.2017)
Aus dem Cyclissem ass et déi traureg Nouvelle, dass de Jempy Schmitz en Dënschdeg de Moien am Alter vu 85 Joer gestuerwen ass.

Noruff Jempy Schmitz / Reportage Jeff Kettenmeyer



De fréieren Vëlosprofi huet ee grousse Palmarès a war och een exzellente Co-Equipier. De 15. Februar 1932 gouf de Jean-Pierre, genannt "Jempy", Schmitz zu Huldang gebuer. Seng sportlech Karriär ass am Alter vun 20 Joer am Amateurberäich sou richteg un d'Rulle komm.

De Jempy Schmitz um Bord vum Tour de Luxembourg am Joer 2011.© pressphoto (Archiv)


1954, also 2 Joer duerno, gouf hien du Profi a konnt direkt iwwerzeegen. Eng Etappevictoire am Critérium du Dauphiné Libéré an déi zweete Plaz am General. Donieft och nach d'Schlussvictoire virun eegenem Public am Tour de Luxembourg.

An et ass och duerno genee sou gutt viru gaangen, wéi et ugefaangen hat. 1955 koum d'Sëlwermedaile op der Weltmeeschterschaft an Italien an d'Vitrinn dobäi. 1956 gouf dunn am Tour de France de Lëtzebuerger Fändel ganz héich gehaangen, de Jempy Schmitz hat déi 12. Etapp gewonnen an am General koum déi 36. Plaz eraus.

© RTL Télé Lëtzebuerg


Och 1958 beim Tour de France Succès vum Charly Gaul war de Jempy Schmitz mat dobäi an huet zesumme mat Ernzer a Bolzan eng zolidd Hand mat ugepak, fir datt de Charly Gaul den Titel an de Grand-Duché konnt bréngen. Am selwechte Joer huet de Jempy Schmitz fir d'zweete Kéier den Tour de Luxembourg gewonnen.

An och nieft der Strooss war hien ee richtege gudde Coureur, well 1960 koum nach de Championstitel am Cyclocross an de Palmarès. Zanter 1993 gëtt et hei am Land och d'Randonnée Jempy Schmitz, déi dëst Joer schonns fir d'25. Kéier organiséiert gouf.

Um Dënschdeg ass de Jempy Schmitz am Alter vu 85 Joer vun eis gaangen.

D'RTL-Sportredaktioun dréckt der Famill hiert Bäileed aus.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.