VIDEO a FOTOEN: Cyclocross-WMExcellent 4. Plaz fir d'Christine Majerus

Zu Valkenburg an Holland hunn um Samschdeg d'Cyclocross-Weltmeeschterschaften ugefaangen. Bei den Damme geet de Weltmeeschtertitel un d'Sanne Cant.

Cyclocross-WM: Excellent 4. Plaz fir d'Christine Majerus (03.02.2018)
Zu Valkenburg an Holland hunn um Samschdeg d'Cyclocross-Weltmeeschterschaften ugefaangen. Bei den Damme geet de Weltmeeschtertitel un d'Sanne Cant.
FOTOGALERIE: Vill flott Fotoe vun der Cyclocross-WM op pressphoto.rtl.lu.

Bei den Dammen huet d'Christine Majerus d'Erwaardungen iwwertraff a koum no der 7. Plaz bei der WM zejoert zu Bieles elo zu Valkenburg an Holland op déi excellent véiert Plaz. Nodeems d'Christine Majerus e ganz gudde Start gelongen ass an no den éischte Meteren op der éischter Plaz louch, huet et laang no enger Plaz um Podium ausgesinn. Zum Schluss ass et knapp net duergaangen.

Gewonne gouf d'Course vum Sanne Cant virum Katherine Compton an dem Lucinda Brand.

Déi lescht Medail op enger Weltmeeschterschaft konnt de Claude Michely 1985 zu München feieren.

Bei de Juniore war den Arthur Kluckers de beschte Lëtzebuerger op der 18. Plaz. Hien hat e Réckstand vun 2 Minutten a 24 Sekonnen op de Weltmeeschter Ben Tulett aus Groussbritannien.

Cyclocross-WM: Arthur Kluckers den 18. bei de Junioren (03.02.2018)
De Weekend ass zu Valkenburg an Holland d'Cyclocross-Weltmeeschterschaft.


Dammen
Um Samschdeg ass dem Christine Majerus e super Depart gelongen a si louch an der 1. Ronn op der éischter Plaz. No der 1. Ronn konnt déi aktuell Weltmeeschterin aus der Belsch, d'Sanne Cant, d'Lëtzebuergerin awer iwwerhuelen an hat e Virsprong vu 9 Sekonnen. Nom 2. Tour huet d'Christine Majerus weider Buedem verluer a war hannert dem Katherine Compton an dem Sanne Cant mat 32 Sekonne Réckstand déi Drëtt. Am Duell mat der Hollännerin Brand huet d'Christine Majerus weider ëm déi drëtt Plaz gekämpft. Am Schluss vum drëtten an am Ufank vum leschten Tour, konnt d'Lëtzebuergerin eng kleng Avance op d'Hollännerin erausfueren. Dono konnt d'Brand awer nees ophuelen, e Virsprong erausfueren an esou gëtt d'Christine Majerus déi Véiert mat engem Retard vun 55 Sekonnen op d'Gewënnerin Sanne Cant. Zweet gëtt d'Amerikanerin Katherine Compton op 12 Sekonnen. D'Lucinada Brand kritt Bronz an hat e Réckstand vun 26 Sekonnen.

© pressphoto


Junioren
Op der Cyclocross-WM zu Valkenburg an Holland sinn um Samschdeg de Moien d'Junioren fir d'éischt op d'Streck geschéckt ginn. Duerch d'Wieder an de leschte Wochen war dës ganz déif. 4 Tier hunn d'Juniore misse fueren. Um Enn konnt sech de Brit Ben Tulett virum Tschech Tomas Kopecky an dem Hollänner Ryan Kamp de Weltmeeschtertitel sécheren. Beschte Lëtzebuerger gëtt den Arthur Kluckers als 18..

© Screenshot


An der Mëtt vum zweeten Tour konnt sech de Ben Tulett un d'Spëtzt setzen. De Brit konnt sech eng Avance vun 15 Sekonnen erausfueren. Hannert him war et e Grupp vun 9 Coureuren, déi an der Verfolgung waren. Am drëtten Tour ass et dem Tschech Tomas Kopecky gelongen bei de Brit opzeschléissen. Béid Coureure sinn dunn zesummen an de leschten Tour gaangen. Hei konnt de Brit nach eng Kéier den Tempo erhéijen a sech vum Tschech nees ofsetzen. De Ben Tulett konnt den Tempo bis zum Schluss halen a gewënnt um Enn de Weltmeeschtertitel bei de Junioren. Sëlwer geet un den Tomas Kopecky, hien hat e Réckstand vun 22 Sekonnen. Um Podium stoung nach den Hollänner Ryan Kamp op 30 Sekonnen.




Als beschte Lëtzebuerger huet sech den Arthur Kluckers op der 18. Plaz klasséiert. Hien hat e Réckstand vun 2 Minutten a 24 Sekonnen. Den Nicolas Kess hat als 25. e Réckstand vun 3 Minutten an 21 Sekonnen. De Loïk Bettendorff gëtt den 41. op 4 Minutten a 47 Sekonnen, de Cedric Pries den 51. op 5 Minutten a 36 Sekonnen an de Mik Esser ass als 66. op ronn 10 Minutten iwwert d'Arrivée gefuer.


Virschau op d'Cyclocross-WM
Virschau Cyclocross-WM / Reportage Rich Simon



Hei kann d'Christine Majerus nees eng gutt Plazéierung erausfueren. Genee wéi virun 12 Méint zu Bieles. Do koum d'Lëtzebuerger Championne op déi ganz gutt 7. Platz. Bei der leschter Course virun der WM ass fir d'Christine Majerus e Sonndeg zu Hoogerheide an Holland och eng 7. Plaz erausgesprongen. Dat heescht also, dass d'Form do ass. D'Sportlerin vum Joer wëll sech awer net ze wäit aus der Fënster leeë mat d'Prognosen. Si hofft op eng Top-15-Plazéierung, wann et nach e bësse méi no vir sollt goen, wat besser, eng Garantie kann d'Christine Majerus dofir awer net ginn a si wëll sech och net ënner Drock setzen.

D'Christine Majerus geet e Samschdeg de Mëtten um 15 Auer un den Depart. E Samschdeg de Moien um 11 Auer sinn d'Juniore schonns am Asaz. Hei si mam Loïc Bettendorf, dem Mik Esser, dem Nicolas Kess, dem Arthur Kluckers an dem Cédric Pries direkt 5 Lëtzebuerger mat derbäi.

E Sonndeg de Moien um 11 Auer ass den Depart vun der Espoircourse. Hei ass mam Felix Schreiber just een FSCL-Coureur mat derbäi. 

E Sonndeg de Mëtteg um 15 Auer ass dann d'Course vun der Elite. Mat aus Lëtzebuerger Siicht dem Trio Vincent Dias Dos Santos, Scott Thiltges a Gusty Bausch. Fir hien ass et schonns déi 20 Weltmeeschterschaft.

Cyclocross-WM: Lëtzebuerg mat 10 Coureure gutt vertrueden (31.01.2018)
Den 3. a 4. Februar ginn zu Valkenburg an Holland d'Medaile bei der Cyclocross-Weltmeeschterschaft verdeelt.


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.