Klassiker Mailand-San RemoNibali rett sech viru Sprinter als Éischten an d'Zil

E Samschdeg war den Optakt vun der Klassiker-Saison. No 294 km gëtt de Jempy Drucker de 56., de Mark Cavendish ass 10km virun der Arrivée uerg gefall.

© afp (Archiv)
Bei ganz schwéiere Meteoskonditiounen hunn d'Coureuren net manner ewéi 294 Kilometer missen hannert sech bréngen. Mat um Start war och de Lëtzebuerger Jempy Drucker. Um Enn gëtt et eng Victoire vum Vincenzo Nibali.




De Jempy Drucker gëtt de 56. op 1 Minutt an 2 Sekonnen.

Eng 10 Kilometer virun der Arrivée gouf et awer och e Schreckmoment. De Mark Cavendish war no engem Rond-Point mat ronn 50 km/h an een Hindernis gerannt, hat sech iwwerschloen a war um Réck gelant. Iwwer méiglech Blessure vum Brit ass nach näischt gewosst.



Fir de Cavendish ass et dës Saison schonn déi drëtt méi uerg Chute. Eréischt virun e puer Deeg war de Brit bei der Course Tirreno Adriatico gefall an hat sech eng Rëpp gebrach.

De Resumé vun der Course

De Profil vu Mailand-San Remo


D'Editioun vun 2018 ass ganz nervös lassgaangen. Direkt beim Start hunn sech néng Leit ofgesat. Dëst waren de Mirco Maestri, de Lorenzo Rota ( Bardiani-CSF), de Evgeny Kobernyak (Gazprom-RusVelo), de Matteo Bono (UAE), de Guy Sagiv, de van Winden ( Israel Cycling Academy), de Sho Hatsuyama (Nippo Vini-Fantini), de Charles Planet (Team Novo Nordisk) an de Jacopo Mosca (Wilier Triestina).



Dës Echappé huet de ganzen Dag iwwer d'Course animéiert a konnt sech deelweis eng Avance vu siwe Minutten erausfueren. Ronn 80 Kilometer virun der Arrivée huet de Peloton awer decidéiert dësem Spill een Enn ze setzen an de Virsprong vun de Léit un der Spëtzt vun der Course ass ëmmer méi kleng ginn. Bei nach 30 Kilometer, déi ze fuere waren, war dunn definitiv Schluss fir déi néng Leit un der Spëtzt an d'Course war nei lancéiert. 

Direkt huet Groupama FDJ Tempo un der Spëtzt gemaach an de Peloton ass explodéiert. 10 Kilometer virun der Arrivée gouf et eng ganz schro Chute vum Marc Cavendish, deen de Peloton nach eng Kéier an zwee gerappt huet. Zwee Kilometer méi spéit huet de Jempy Drucker dunn säi Gléck en solitaire probéiert. De Lëtzebuerger sollt ee Kilometer méi spéit awer vun enger ganz staarker Attack vum Vincenzo Nibali erëm agefaange ginn.

Den Italiener huet seng Attack dunn och duerchgezunn an ass eleng a Richtung San Remo gefuer. Hannendrunner gouf zwar reagéiert, mee d'Avance vum Nibali huet sech konstant bei 10 Sekonnen agependelt.

An de leschte Kilometer huet de Peloton nach eng Kéier alles erausgeholl, mee et sollt net méi duergoen, sou dass de Vincenzo Nibali sech ganz knapp virum Caleb Ewan an dem Arnaud Démare duerchsetzt. De Jempy Drucker gëtt um Enn de 56. op 1 Minutt an 2 Sekonnen.



Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.