Giro d'Italia: 6. EtappEsteban Chaves wënnt Etapp, Simon Yates neie Leader

Den Esteban Chaves war an der Echappée vum Dag vertrueden an huet et um Enn gepackt, fir sech den Etna erop d'Victoire ze sécheren.

© AFP
Op der Etapp 6. Etapp vum Giro d'Italia konnt sech den Esteban Chaves d'Victoire no 169 Kilometer sécheren. De Kolumbianer war an der Echappée vum Dag vertrueden, dat mat 25 weidere Coureuren. Op de leschte Kilometer de Vulkan Etna erop krut de Chaves nach Besuch vu sengem Co-Equipier, dem Simon Yates, dee sech aus dem Grupp vun de Favoritte konnt ofsetzen.

Béid Coureure ware sech eens an de Chaves huet als Éischten dierfen iwwert de wäisse Stréch fueren. De Yates gëtt um Enn den Zweeten an ass elo den neie Leader am General. De Grupp vun de Favoritten mat ënnert anerem Pinot, Froome, Dumoulin, Pozzovivo, Lopez an Aru hat e Réckstand vu 26 Sekonnen.




Am General huet de Brit Simon Yates eng Avance vu 16 Sekonnen op den Hollänner Tom Dumoulin.

De Laurent Didier huet op der 6. Etapp als 94. 17 Minutten an 53 Sekonne verluer, de Jempy Drucker ass um Donneschdeg als 169. op 26 Minutten a 26 Sekonnen iwwert de wäisse Stréch gefuer.

Am General läit de Laurent Didier mat engem Réckstand vun 32 Minutten a 14 Sekonnen op der 103. Plaz, de Jempy Drucker ass den 152. op 45 Minutten an 1 Sekonn.

De Profil vun der Etapp
© Screenshot


Op der 6. Etapp huet op d'Coureure vum Giro d'Italia déi éischt richteg Biergetapp gewaart, mat Arrivée um Sommet. Iwwer 169 Kilometer ass et um Donneschdeg vu Caltanissetta bei den Etna gaangen. Zum Schluss huet eng Montée vun der éischter Kategorie op d'Cycliste gewaart. Iwwer 15 Kilometer ass et de Vulkan Etna eropgaangen. De Bierg hat am Schnëtt eng Steigung vu 6,5 Prozent. Tëschenduerch hu bis zu 16 Prozent op d'Coureure gewaart.   

Resumé vun der Etapp
Op der 6. Etapp vum Giro d'Italia war den Tempo vun Ufank un héich an et gouf ëmmer nees Attacken, bis sech e Grupp vu 26 Coureuren no 50 Kilometer konnt ofsetzen. An der Echappée vum Dag waren e puer ganz staark Coureuren, déi och um Enn am General e Wuert dierfte mat rieden, vertrueden. Mat dobäi waren ënnert anerem: Haga, Oomen (Sunweb), Tonelli an Ciccone (Bardiani Csf), Cherel, Jauregui an Denz (Ag2r), De La Cruz an Henao (Sky), Frapporti a Gavazzi (Androni), Mori, Polanc an Ulissi (UAE), Zardini (Wilier), Gesink (Lotto Jumbo), Hermans a Plaza (Israel), Reichenbach a Roy (Groupama), Haig an Chaves (Mitchelton), Eg (Trek) a Quintana (Movistar).




Am Peloton hu BMC, fir de Leader am General Rohan Dennis, den Tempo gemaach an och Astana war ëmmer nees vir ze gesinn. D'Ekipp aus dem Kasachstan war net vir an der Echappée vertrueden an donieft hu si fir hire Leader geschafft. Beim Lopez ass et bis ewell nämlech alles anescht ewéi gutt gelaf am Giro. Hie loung virun der 6. Etapp am General knapp 2 Minutten hannert dem Rohan Dennis, um Mëttwoch hat hien duerch eng Chute an der Finall vun der Etapp 43 Sekonne verluer. 

50 Kilometer virun der Arrivée hat d'Echappée nach e Virsprong vun 2 Minutten a 47 Sekonnen.

D'Tempo-Aarbecht vu BMC an Astana huet sech lues awer sécher bemierkbar gemaach an den Ecart vun der Echappée ass ëmmer méi kleng ginn. 35 Kilometer virun der Arrivée loung en nach bei 2 Minutten. Doduerch, datt ënnert anerem de Chaves et an d'Echappée gepackt hat, haten d'Ekippen hannendrun och all Interêt ze schaffen, well de Kolumbianer zielt zu de Favoritten dëst Joer.  

Um Fouss vum Etna, 15 Kilometer virun der Arrivée, waren nach 19 Coureuren an der Echappée vertrueden, dorënner och de Chaves. Si haten elo nach e Virsprong vun 1 Minutt an 19 Sekonnen op de Peloton.




10 Kilometer virun der Arrivée ware mam Ulissi, Reichenbach, Henao, Gesink, Chaves, Hermans, Oomen, De Marchi an Ciccone nach 9 Coureuren an der Echappée, dat mat engem Ecart vun 45 Sekonnen op de Peloton.

Am Grupp vun de Favoritten gouf et ëmmer nees Attacken, ma et konnt kee sech ofsetzen. De Leader am General Rohan Dennis hat awer seng Problemer dem Tempo ze Folgen, huet a méi géie Passagen ëmmer nees misse lassloossen, ier en 2,5 Kilometer virun der Arrivée definitiv zeréckgefall ass.

De Yates konnt sech 1,5 Kilometer virun der Arrivée aus dem Grupp vun de Favoritten ofsetzen an huet um leschte Kilometer mam Chaves och de leschte Coureur aus der Echappée agefaangen. Um Enn huet de Chaves d'Etapp gewonnen an säi Co-Equipier Yates ass den Zweete ginn. De Grupp vun de Favoritten hat e Réckstand vu 26 Sekonnen. De Chris Froome hat hei ëmmer nees Problemer drun ze bleiwen huet um Enn awer keng weider Zäit verluer.

No der 6. Etapp iwwerhëlt de Yates d'Féierung am General.

Resultat vun der Etapp
1. Esteban Chaves (Col) Mitchelton-Scott 4:16:10
2. Simon Yates (GBr) Mitchelton-Scott
3. Thibaut Pinot (Fra) Groupama-FDJ 0:00:26
4. George Bennett (NZl) LottoNL-Jumbo
5. Domenico Pozzovivo (Ita) Bahrain-Merida
6. Miguel Angel Lopez (Col) Astana Pro Team
7. Richard Carapaz (Ecu) Movistar Team
8. Tom Dumoulin (Ned) Team Sunweb
9. Fabio Aru (Ita) UAE Team Emirates
10. Chris Froome (GBr) Team Sky

Generalklassement

1. Yates (Mitchelton)
2. Dumoulin (Sunweb, +0:16)
3. Chaves (Mitchelton, +0:26)
4. Pozzovivo (Bahrain, +0:43)
5. Pinot (Groupama, +0:45)
6. Dennis (BMC, +0:53)
7. Bilbao (Astana, +1:03)
8. Froome (Sky, 1:10)
9. George Bennett (LottoNL-Jumbo, 1:11)
10. Fabio Aru (UAE Team Emirates, 1:12)




Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.