Giro d'Italia: 12. EtappSam Bennett wënnt am Reen zu Imola op der Rennstreck

En Donneschdeg gouf et op der 12. Etapp vum Giro d'Italia eng Victoire am Sprint vum Irlänner Sam Bennett, dat bei ganz staarkem Reen.

© twitter/giroditalia
De Reen huet déi 12. Etapp vum Giro d'Italia ee gutt Stéck méi intressant gemaach, ewéi geduecht. Et gouf ëmmer nees Attacken aus dem Peloton eraus a Favoritten, déi a Gefor waren. Um Enn konnt de Peloton de Mohoric an de Betancur nach offänken, esou dass de Sam Bennett sech ganz souverän d'Victoire am Sprint séchere konnt, dat zu Imola um Autodromo Enzo e Dino Ferrari. Den Danny van Poppel gëtt en Donneschdeg den Zweeten, dat virum Bonifazio. Am General bleift de Simon Yates am Leader-Trikot. Kee vun de Favoritten huet un Zäit verluer.

De Jempy Drucker koum en Donneschdeg op der 12. Etapp op déi 15. Plaz an der nämmlechter Zäit, ewéi de Gewënner. Am General ass de Lëtzebuerger elo den 147. op 2 Stonnen, 12 Minutten an 19 Sekonnen.

Fir de Laurent Didier war et en Donneschdeg déi 92. Plaz, dat op 5 Minutten a 36 Sekonnen. Am General läit hien elo op der 91. Plaz op 1 Stonn, 34 Minutten an 19 Sekonnen.

© twitter/giroditalia

De Profil vun der Etapp

En Donneschdeg goung et iwwer 214 relativ flaach Kilometer vun Osimo op Imola. Um Enn geet et dann zu Imola iwwer déi bekannte Rennstreck, den Autodromo Enzo e Dino Ferrari. D'Streck ass virun allem bekannt duerch de Grousse Präis vu San Marino aus dem Joer 1994, wou an engem Weekend direkt zwee Formel 1-Piloten ëm d'Liewe komm waren, de Roland Ratzenberger an den dräifache Weltmeeschter Ayrton Senna.

Ronn 12 Kilometer virun der Arrivée steet dann ee Bierg vun der 4. Kategorie um Programm. D'Tre Monti huet eng duerchschnëttlech Steigung vu 4,2 Prozent a maximal vun 10 Prozent, dat iwwer eng Längt vu ronn 4 Kilometer. Dono geet et da biergof a Richtung Arrivée. Iwwregens de leschte Coureur, deen am Giro zu Imola gewanne konnt, war am Joer 2015 den Ilnur Zakarin.


Resumé vun der Etapp
Ee Spëtzegrupp vu 5 Coureuren hat sech en Donneschdeg séier gebilt. Dobäi waren awer direkt zwou Ekippen, déi zwee Coureure mat dobäi haten. De Marco Frapporti (Androni-Sidermec), de Mirco Maestri, de Manuel Senni (allebéid Bardiani CSF), de Jacopo Mosca an den Eugert Zhupa (allebéid Willier Triestina) haten eng maximal Avance vu 4 Minutten a 15 Sekonnen.




Am Peloton waren et d'Ekippe vun de Sprinter, déi fir den Tempo gesuergt hunn. Si wollten de Spëtzegrupp natierlech net ze wäit dovun zéieloossen, well si hunn op ee Massesprint gehofft. Esou huet Quick-Step Floors Tempo fir den Elia Viviani gemaach, Bora Hansgrohe fir de Sam Bennett an EF Foundations fir de Sacha Modolo. Dëst natierlech glécklech fir d'Ekipp Mitchelton-Scott, déi sech deemno net all ze vill midd hu misse maachen.

85 Kilometer virun der Arrivée hat d'Echappé schonn nëmme méi 2 Minutten a 25 Sekonnen Avance op de Peloton mat all de Favoritten an de Sprinter.

Ewéi et dunn ugefaangen huet ze reenen, konnten déi 5 Coureuren un der Spëtzt hir Avance nees liicht vergréisseren. De Peloton huet dunn awer richteg opgedréint a ronn 25 Kilometer virun der Arrivée goufen déi éischt dräi Coureuren aus dem Spëtzegrupp ageholl. Just nach de Maestri an de Mosca ware vir. Iwwerdeems ass och de Peloton explodéiert an do war et de beschte jonken, de Carapaz, deen den Uschloss verluer hat, genau sou wéi de Pozzovivo, de Miguel Angel Lopez an de Rohan Dennis.

20 Kilometer waren dunn och déi lescht zwee aus der Echappé ageholl a genau, ewéi e Mëttwoch huet den Tim Wellens a genau deem Moment ugegraff.

Am zweete Peloton hunn Astana, Movistar a Bahrain-Merida uerdentlech an d'Pedalle gedréckt, esou dass et nees zum Zesummeschloss vun deenen zwou Gruppe koum.

Et war awer elo eng ganz geféierlech Situatioun, den Tempo war héich, de Peloton war wäit auserneegezunn an d'Stroosse waren immens naass. Et sinn ëmmer nees grouss Lächer entstanen, tëscht verschiddene klenge Gruppen. Esou gouf och ee vun de Favoritten op d'Etappe-Victoire, den Elia Viviani ofgehaangen.

Ronn 10 Kilometer virun der Arrivée, an der leschter Steigung gouf de Wellens dunn nees ageholl an et gouf weider Attacken aus dem Peloton, ënnert anerem och nees vum Sergio Henao. De Kolumbianer konnt sech awer zu kengem Zäitpunkt wierklech wäit ofsetzen an esou huet hien nees Tempo erausgeholl.

Dono war et dunn de Rohan Dennis, deen eng Attack lancéiert huet, ma och de Coureur vu BMC ass net fortkomm. Den Diego Ulissi hat dunn awer eng staark Attack lancéiert an den Italiener konnt sech och kuerz Zäit ofsetzen, ma hie krut dunn awer mam Carlos Betancur ee Begleeder u seng Säit.

Dunn huet och nach de Matej Mohoric, deen déi 10 Etapp gewanne konnt, aus dem Peloton eraus ugegraff an hie konnt zum Duo opschléissen. Kuerz dono konnt allerdéngs den Ulissi den Tempo net méi matgoen an ass zeréckgefall.

De Mohoric an de Betancur goufen dunn awer nëmmen e puer honnert Meter virun der Arrivée vum Sam Bennett am Sprint iwwerholl an de Coureur vu Bora Hansgrohe ka sech iwwer d'Victoire freeën.




Resultat vun der Etapp
1 Bennett Sam BORA - hansgrohe
2 van Poppel Danny Team LottoNL-Jumbo
3 Bonifazio Niccolo Bahrain Merida Pro Cycling Team
4 Planckaert Baptiste Team Katusha - Alpecin
5 Roelandts Jurgen BMC Racing Team
6 Mørkøv Michael Quick-Step Floors
7 Belletti Manuel Androni - Sidermec - Bottecchia
8 Venturini Clément AG2R La Mondiale
9 Sénéchal Florian Quick-Step Floors
10 Battaglin Enrico Team LottoNL-Jumbo
11 Lammertink Maurits Team Katusha - Alpecin
12 Venter Jaco Dimension Data
13 Modolo Sacha Team EF Education First-Drapac p/b Cannondale
14 Pantano Jarlinson Trek - Segafredo
15 Drucker Jean-Pierre BMC Racing Team

Generalklassement
1 Yates Simon Mitchelton-Scott 20 51:57:55
2 Dumoulin Tom Team Sunweb 0:47
3 Pinot Thibaut Groupama - FDJ 1:04
4 Pozzovivo Domenico Bahrain Merida Pro Cycling Team 1:18
5 Carapaz Richard Movistar Team 1:56
6 Bennett George Team LottoNL-Jumbo 2:09
7 Dennis Rohan BMC Racing Team 2:36
8 Bilbao Pello Astana Pro Team 2:54
9 Konrad Patrick BORA - hansgrohe 2:55
10 Aru Fabio UAE-Team Emirates 3:10
11 Lopez Miguel Angel Astana Pro Team 3:17
12 Froome Christopher Team Sky 3:20
13 O'Connor Ben Dimension Data 3:25
14 Betancur Carlos Movistar Team 3:29
15 Oomen Sam Team Sunweb 3:40




Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.