Giro d'Italia: 14. EtappDe Christopher Froome wënnt déi 14. Etapp

De Christopher Froome konnt sech op der leschter Montée, dem Monte Zoncolan, virum Simon Yates behaapten. De Yates bleift awer weiderhin Leader am General.

De Christopher Froome hat op de leschte Kilometer vum Monte Zoncolan attackéiert, de Simon Yates loung knapp hannendrun. Kuerz virun der Arrivée war et nach eng Kléier richteg spannend ginn, wéi de Yates probéiert hat zum Froome opzeschléissen, mee um Enn sollt et awer net méi duergoen. De Simon Yates fiert mat 6 Sekonnen Retard als zweeten hannert dem Froome iwwert de wäisse Strëch. Den Domenico Pozzovivo an de Miguel Lopez fueren mat 23 Sekonnen Réckstand als drëtten, respektiv véierten iwwert d’Arrivée



De Laurent Didier gëtt um Enn den 76. op 18 Minutten an 5 Sekonnen an de Jempy Drucker den 123. op 26 Minutten an 58 Sekonnen.



De Simon Yates bleift weider de Leader, dat mat enger Avance vun 1 Minutt a 24 Sekonnen op den Tom Dumoulin an 1 Minutt 37 op den Domenico Pozzovivo. Den Thibaut Pinot läit op der 4. Plaz op 1 Minutt 46 an de Christopher Froome ass de 5. op 3 Minutten an 10 Sekonnen.



De Laurent Diddier läit am General op der 82. Plaz op 1 Stonn 52 Minutten an 22 Sekonnen an de Jempy Drucker ass den 123. op 2 Stonnen 38 Minutten an 29 Sekonnen.

De Profil vun der Etapp

E Samschdeg stoung wuel eng vun de schwéiersten Etappe vun dësem Giro um Programm. Et goung iwwer 186 Kilometer vu San Vito al Tagliamento erop op de Monte Zoncolan. Um Wee Richtung Zoncolan stounge schonns 3 Bierger vun der 3. Kategorie um Programm an ee vun der 2. Kategorie.

Um Enn stoung dunn nach déi gréissten Hürd um Programm, de Monte Zoncolan, dee wuel schwéierste Bierg, deen ee fuere kann. En ass ronn 10 Kilometer laang an ass bis zu 22 Prozent géi. Déi éischt zwee Kilometer gëtt et schonns géi mat enger duerchschnëttlecher Steigung vun 9%, ma dono gëtt et da richteg batter. 4 Kilometer mat 15,4% am Duerchschnëtt. Am Ganzen ass den Zoncolan 10,1 Kilometer laang, dat bei enger duerchschnëttlecher Steigung vun 11,9%.



Resumé vun der Etapp

Op den éischten 30 Kilometer hunn d’Fuerer et méi roueg ugoen gelooss an et koum et zu kengen gréisseren Attacken. No 43 Kilometer stoung mam Monte di Ragogna e Bierg vun der 3. Kategorie a bis zu 10,2 % Steigung um Programm. Hei hunn de Valerio Conti (Team UAE), de Mads Pedersen (Trek Segafredo), den Enrico Barbin (Bardianai) an de Francesco Gavazzi (Androni Sidermec) aus dem Feld eraus attackéiert an sech vum Peloton ofgesat. Kuerz drop konnte sech mam Laurent Didier (Trek-Segafredo), dem Matteo Montaguti (AG2R La Mondiale) an dem Jacob Mosca (Willier Triestina) 3 weider Fuerer sech dësem Spëtzegrupp uschléissen.

No 60 Kilometer loung d’Avance vum Spëtzegrupp schon bei iwwer 4 Minutten. De Francesco Gavazzi konnt sech den Zwëschensprint zu Forgaria nel Friuli sécheren. Ronn 80 Kilometer virun der Arrivée koum mam Avaglio de nächste Bierg vun der 3. Kategorie. De Matteo Montaguti konnt dësen fir sech entscheeden an sech domat uewen 7 Punkten sécheren.  

De Peloton huet et hannendrun weiderhin roueg ugoen gelooss, sou dass den Ecart op de Spëtzegrupp mëttlerweil schonn bei iwwer 6 Minutten loung. De Jacopo Mosca (Wilier Triestina-Selle Italia) konnt sech de nächste Zwëschensprint sécheren. Kuerz dorop goung et dann de Passo Duron erop, e Bierg vun der 2. Kategorie an enger Steigung vun bis zu 18%. De Valerio Conti (Team UAE) war den Éischten uewen um Passo Duron. De Mads Pedersen an de Jacopo Mosca haten och uerg ze kämpfen a konnten net méi am Spëtzegrupp mathalen. De Laurent Didier an de Rescht vum Spëtzegrupp haten weiderhin iwwer 3 Minutten Avance op de Peloton.

30 Kilometer virun der Arrivée koum mam Sella Valcalda-Ravascletto nach eng Kéier e Bierg vun der 3. Kategorie. Dëse Bierg war 7,6 Kilometer laang an hat eng duerchschnëttlech Steigung vun 5,6. De Spëtzegrupp mam Laurent Didier hat hei uerg ze kämpfen. Den Ecart op de Peloton ass ëmmer méi kleng ginn. Kuerz drop huet de Laurent Didier den Tempo net méi konnten matgoen an huet sech zeréckfalen gelooss. De Valerio Conti konnt sech uewen um Sella Valcalda-Ravascletto déi 7 Punkten huelen.

Op de leschten 10 Kilometer goung et dunn de Monte Zoncolan erop mat bis zu 22% Steigung. Un der Spëtzt vun der Course loungen elo nëmmen nach de Valerio Conti an den Enrico Barbin, allebéid goufen awer awer kuerz dorop ageholl. Duerno hat de Michael Woods (EF Education First) eng Attack lancéiert, gouf awer och nees schnell ageholl. De Poels an de Froome hunn duerno den Tempo uginn, nëmmen de Yates, Pozzovivo a Lopez konnten nach mathalen.

De Froome war awer nach net fäerdeg an huet nach eng Kéier den Tempo erhéicht a konnt 12 Sekonnen Avance op de Yates, de Pozzovivo an de Lopez erausfueren. De Yates hat probéiert nach eng Kéier opzeschléissen, mee de Froome hat ronn 1,5 Kilometer virun der Arrivée nach ëmmer 10 Sekonnen Avance. Kuerz virun der Arrivée sollt et dunn awer nach eng Kéier spannend ginn, de Yates koum ëmmer méi no, mee um Enn sollt et awer net méi duergoen.

De Christopher Froome setzt sech um Enn um Sommet vum Monte Zoncolan souverän duerch, knapp hannendrun de Simon Yates. De Pozzovivo an de Lopez fueren mat 23 Sekonnen Réckstand als drëtten, respektiv véierten iwwert d’Arrivée.



Resultat vun der Etapp


Generalklassement
1. Simon Yates (Mitchelton)
2. Tom Dumoulin (Sunweb, +1:24)
3. Domenico Pozzovivo (Bahrain-Merida, +1:37)
4. Thibault Pinot (Groupama-FDJ, +1:46)
5. Christopher Froome (Sky, +3:10)




Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.