Race across America: 1. DagNo 24h um Vëlo: 30min Schlof fir de Ralph Diseviscourt

En Dënschdeg den Owend um 22.21 Auer eiser Zäit huet den "Dizzy" déi 4.935km vun der Race across America an Ugrëff geholl.

© Media-Team Dizzy
Bei der Race across America geet et um Vëlo iwwer 4.935 Kilometer vun der Westküst queesch duerch d'USA bis un d'Ostküst. De Ralph Diseviscourt ass fir d'2. Kéier um Depart a muss déi komplett Streck eleng absolvéieren.

De Ralph Diseviscourt huet sech virgeholl, déi komplett Streck an ënner 10 Deeg ze fueren an eng Plaz um Podium ze realiséieren.

E puer Fakten: D'Längt vun der RAAM: 4.935km, d'Héichtemeter: iwwer 52.000, Temperaturen: vun iwwer 40°C bis op 0°C, Flëssegkeets-Verloscht: 15-24 Liter/Dag, Kaloriëverbrauch: ronn 12.000 kcal/Dag.

Dag fir Dag kënnt Dir op RTL.lu suivéieren, wou de Lëtzebuerger drun ass a wéi et him a senger Ekipp geet.

DOSSIER: Fotoen, Infoen, Livetracker: All d'Infoen zum "Dizzy" bei der "RAAM"


Wou ass de Ralph Diseviscourt drun?
© Screenshot


Den Iwwerbléck vum 1. Dag
D'Ekipp gleeft un de Ralph Diseviscourt (14.06.2018)
Kuerz virum Depart en Dënschdeg war den "Dizzy" liicht nervös. D'Ekipp déi huet grouss Erwaardungen un de Lëtzebuerger.


Zanter en Dënschdeg den Owend um 22.21 Auer ass de Ralph Diseviscourt ënnerwee bei der RAAM. Déi éischt 10 Stonnen um Vëlo si gutt Verlaf. Nom Depart zu Oceanside ass et relativ séier fir de Lëtzebuerger a Richtung Borreo Springs an d'Wüst gaangen, wou et wéi erwaart iwwer 40°C waren. E Mëttwoch de Moien um 8.30 war den "Dizzy" 283 Kilometer gefuer. An den USA ass et dunn an d'Nuecht era gaangen an do sinn d'Temperaturen e bësse gefall an et war méi einfach, ze fueren.

Op den éischte Kilometer hat de Ralph Diseviscourt de Christoph Strasser nach am Genéck hänken, well de 4-fachen RAAM Gewënner kuerz nom Lëtzebuerger gestart war. Bei Kilometer 205 huet den Éisträicher de Lëtzebuerger dunn awer iwwerholl a vun do u konnt sech den "Dizzy" op der zweeter Plaz komplett op sech konzentréieren.  

RAAM: Reaktioun vum Martin Bäumler






E Mëttwoch de Mëtteg um 15.30 Auer hat de Ralph Diseviscourt 482 Kilometer gepackt. Eng länger Paus hat hie bis dohinner nach net gemaach. Just eng kleng Schlofpaus vun 20 Minutten. Donieft hat hie gutt giess a krut eng Massage. Sou lues ass an den USA d'Sonn nees opgaangen an d'Temperaturen, déi och an der Nuecht net richteg gefall waren, sinn nees op iwwer 40°C geklommen. De Christoph Strasser war bei Kilometer 534. 

© Media-Team Dizzy


E Mëttwoch den Owend um 18.15 Auer ass de Ralph Diseviscourt bei der Time Station 5 (542km), vun am Ganze 54, zu Salome ukomm. Vun der Ekipp war et d'Réckmeldung, datt hien och no 20 Stonnen um Vëlo nach ëmmer gutt drop ass.

Bei der Time Station 6 bei Kilometer 634 huet de Lëtzebuerger e Mëttwoch den Owend um 21.30 Auer eng éischt länger Paus gemaach. Hien huet sech no enger Portioun Räis mat Geméis a Fleesch fir 30 Minutte schlofe geluecht. Souverän un der Spëtzt läit weiderhin de Christoph Strasser, deen um 22 Auer 740 Kilometer absolvéier hat.




Géint 22.30 ass et fir de Ralph Diseviscourt nees op de Vëlo gaangen.

Opgrond vun deen héijen Temperaturen huet een an der Ekipp decidéiert, datt een elo wou d'Temperaturen esou héich sinn e puer méi Pause mécht, fir da méi spéit vun der RAAM nach méi Reserven ze hunn.

Dag 1: Reaktioun Ralph Diseviscourt



De Bilan no 24 Stonnen (13.06.2018)
Den Ufank vun der RAAM war net einfach, ma bis elo ass een zefridden.


Wat ass bis elo geschitt?
RTL-NEWS: Race across America: Lescht Preparatioune vum "Dizzy" sinn ofgeschloss, den Depart ass gefall

RTL-NEWS: Race across America: D'Ekipp hannert dem Ralph Diseviscourt

RTL-NEWS: Race across America: Ralph Diseviscourt ass prett a wëllt onbedéngt op de Podium

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.