Race across America: 2. DagGestäerkt mat enger Glace geet et fir den Dizzy a Richtung Utah

Zanter en Dënschdeg den Owend um 22.21 Auer eiser Zäit ass den "Dizzy" bei der der Race across America am Asaz.

© Media-Team Dizzy
Bei der Race across America geet et um Vëlo iwwer 4.935 Kilometer vun der Westküst queesch duerch d'USA bis un d'Ostküst. De Ralph Diseviscourt ass fir d'zweete Kéier um Depart a muss déi komplett Streck eleng absolvéieren. Am Hannergrond ass eng Ekipp vun 13 Leit, déi sech ëm hie këmmeren.

De Startschoss ass den 12. Juni gefall. De Ralph Diseviscourt huet sech virgeholl, déi komplett Streck an ënner 10 Deeg ze fueren an eng Plaz um Podium ze realiséieren.

E puer Fakten: D'Längt vun der RAAM: 4.935km, d'Héichtemeter: iwwer 52.000, Temperaturen: vun iwwer 40°C bis op 0°C, Flëssegkeets-Verloscht: 15-24 Liter/Dag, Kaloriëverbrauch: ronn 12.000 kcal/Dag.

Dag fir Dag kënnt Dir op RTL.lu suivéieren, wou de Lëtzebuerger drun ass a wéi et him a senger Ekipp geet.

DOSSIER: Fotoen, Infoen, Livetracker: All d'Infoen zum "Dizzy" bei der "RAAM"


Wou ass de Ralph Diseviscourt drun?
En Donneschdeg de Moien um 8.30 Auer eiser Zäit.© Screenshot


Den Iwwerbléck vum 2. Dag



Och no iwwer 24 Stonne rullt et beim Ralph Diseviscourt nach ëmmer gutt. En Donneschdeg de Moien um 8.20 Auer eiser Zäit war de Lëtzebuerger ënnerwee op Flagstaff. D'Streck bis dohinner war ganz schwéier an et goung deels Kilometerwäit biergop. Tëscht Congress a Prescott waren et bal 80 Kilometer. 

An der Nuecht op en Donneschdeg (eiser Zäit) hat de Ralph Diseviscourt nach eng weider Paus gemaach. Hei gouf et eppes ze iessen, ze drénken, eng Massage an d'Been goufen am Schiet e bëssen héich geluecht.




En Donneschdeg de Moien um 8.30 Auer hat de Ralph Diseviscourt 846 Kilometer hanneru sech bruecht. Déi éischt 1.000 Kilometer vun den 4.935 Kilometer waren domadder gläich gepackt.

De Lëtzebuerger loung weider op der zweeter Plaz hannert dem Christoph Strasser, dee mëttlerweil bei Kilometer 1.065 ukomm war. Och dëst Joer schéngt kee Kraut géint de 4-fachen RAAM-Gewënner gewuess ze sinn.

© Media-Team Dizzy


En Donneschdeg um 14 Auer ass de Ralph Diseviscourt zu Flagstaff ukomm. De Lëtzebuerger hat um Wee dohinner tëschenduerch Problemer. Den "Dizzy" ass op eemol am Zickzack gefuer, sou datt d'Leit am Follow-Car decidéiert hunn, fir hie vum Vëlo ze huelen. Hien huet dunn zwou Pause gemaach, eng vun 30 Minutten an eng vun 1 Stonn. Duerch d'Schlofpausen huet de Ralph Diseviscourt sech nees erholl an et ass duerno nees gerullt. Um 15 Auer waren déi éischt 1.000 Kilometer du gepackt.

Extrait Ralph Diseviscourt



En Donneschdeg den Owend um 19 Auer eiser Zäit ass den Ultracycliste bei 1.116 Kilometer ukomm. Fir de Lëtzebuerger kënnt elo de schéinsten Deel vun der RAAM. Am Utah geet et duerch de Monument Valley. Et leeft erëm gutt an de Ralph Diseviscourt ass nach ëmmer op der zweeter Plaz. Vir un der Spëtzt vun der RAAM fiert de Christoph Strasser a senger eegener Liga. 




Wat ass bis elo geschitt?
RTL-NEWS: Race across America: 1. Dag: No 24h um Vëlo: 30min Schlof fir de Ralph Diseviscourt

RTL-NEWS: Race across America: Lescht Preparatioune vum "Dizzy" sinn ofgeschloss, den Depart ass gefall

RTL-NEWS: Race across America: D'Ekipp hannert dem Ralph Diseviscourt

RTL-NEWS: Race across America: Ralph Diseviscourt ass prett a wëllt onbedéngt op de Podium

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.