OVO Energy Women's TourVictoire a Leadermaillot fir d'Coryn Rivera, 3. Plaz fir Christine Majerus

En Donneschdeg konnt sech d'Coryn Rivera op der 2. Etapp duerchsetzen a konnt sech esou och de Giele Maillot sécheren.

© twitter/thewomenstour
En Donneschdeg goung et op der 2. Etapp vum OVO Energy Women's Tour iwwer 145 Kilometer vu Rushden op Daventry.

Et war een nervöse Start, well et stounge fréi zwou Sprintwäertungen um Programm an do wollten d'Favoritinne sech natierlech d'Bonifikatiounssekonne sécheren. Esou konnt sech beim éischte Sprint d'Coryn Rivera virum Lotta Lepistö an dem Amy Pieters duerchsetzen. Nëmme 5 Kilometer méi spéit, beim zweete Sprint hat awer eng aner Damm d'Nues vir. Dani Rowe war hei am séiersten, dat virum Coryn Rivera an dem Marianne Vos.

No dësem Sprint konnt sech dunn awer eng Cyclistin ofsetzen. D'Maaike Boogaard huet direkt nom Sprint attackéiert a si konnt och ee Lach opmaachen. D'Cyclistin vun der Ekipp BTC City Ljubljana konnt sech séier eng Avance vun iwwert 1 Minutt erausfueren.




Hir maximal Avance louch bei 4 Minutten, deen ass dunn awer relativ séier gefall, esou dass d'Boogaard bei Kilometer 89 nees ageholl gouf.

Dëst ass och dem Christine Majerus entgéint komm, well esou konnt si déi éischt Biergwäertung vum Dag gewannen an esou weider Punkte sammelen, fir hir Avance auszebauen.

35 Kilometer virun der Arrivée gouf et dunn eng Attack aus dem Peloton eraus. Et hate sech mam Marianne Vos, Dani Rowe, Elisa Longo Borghini a Kasia Niewiadoma 4 Cyclistinnen aus dem Stëbs gemaach. Si konnte kuerz drop awer nees ageholl ginn, ma duerch deen héijen Tempo am Peloton waren hei nëmme méi ronn 30 Cyclistinnen am éischte Grupp.

Ewéi et dunn den Newnham Hill eng éischte Kéier eropgaangen ass, hat d'Christine Majerus awer hier Problemer, fir matzehalen. D'Elisa Longo Borghini war als Éischt uewen um Sommet. Dëse Bierg huet méi spéit nach eemol missen absolvéiert ginn an dono waren et nach 2,3 Kilometer bis op d'Arrivée.

Et gouf do virdrun awer weiderhin nach vill Attacken, et war immens onroueg am Peloton, ma richteg fortkomme sollt keen.

D'Entscheedung ass eréischt an de leschte Kilometer gefall an um Enn konnt sech d'Coryn Rivera géint d'Marianne Vos duerchsetzen, dat ëm nëmmen e puer Zentimeter. D'Christine Majerus kënnt um Enn op déi gutt 3. Plaz.

Am General iwwerhëlt d'Rivera elo och d'Féierung. Si huet 15 Sekonnen Avance op d'Dani Rowe a 16 Sekonnen Avance op d'Marianne Vos. Hei ass d'Christine Majerus elo déi 5. op 19 Sekonnen.

Am Biergklassement ass d'Christine Majerus elo déi 2. hannert dem Elisa Longo Borghini.

D'Klassement vun der 2. Etapp
1 RIVERA Coryn 21 Team Sunweb 04:08:06
2 VOS Marianne 101 Waowdeals Pro Cycling Team ST
3 MAJERUS Christine 14 Boels Dolmans Cyclingteam ST
4 ROWE Danielle 105 Waowdeals Pro Cycling Team ST
5 ELVIN Gracie 74 Mitchelton Scott ST
6 FERRAND PREVOT Pauline 5 Canyon // Sram Racing ST
7 CONFALONIERI Maria Giulia 161 Valcar Pbm ST
8 BUJAK Eugenia 141 Btc City Ljubljana ST
9 BUURMAN Eva 91 Trek - Drops ST
10 LONGO BORGHINI Elisa 55 Wiggle High5 ST

Generalklassement no der 2. Etapp
1 RIVERA Coryn 21 Team Sunweb 07:22:22
2 ROWE Danielle 105 Waowdeals Pro Cycling Team 15
3 VOS Marianne 101 Waowdeals Pro Cycling Team 16
4 PIETERS Amy 15 Boels Dolmans Cyclingteam 17
5 MAJERUS Christine 14 Boels Dolmans Cyclingteam 19
6 LONGO BORGHINI Elisa 55 Wiggle High5 21
7 BUJAK Eugenia 141 Btc City Ljubljana 23
8 BUURMAN Eva 91 Trek - Drops ST
9 CONFALONIERI Maria Giulia 161 Valcar Pbm ST
10 FERRAND PREVOT Pauline 5 Canyon // Sram Racing ST

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.