Tour de MoselleTom Wirtgen huet no Chute missen opginn

Kee gudden Dag war et e Sonndeg fir den Tom Wirtgen. De Lëtzebuerger ass op der leschter Etapp vum Tour de Moselle gefall a koum an d'Klinik.

© RTL Télé Lëtzebuerg
Op der leschter Etapp vum Tour de Moselle ass et iwwer 174 Kilometer vun Terville op Thionville gaangen. Den Tom Wirtgen ass wärend der 3. Etapp an enger Descente mat iwwer 80 km/h gefall an huet mussen opginn. De jonke Lëtzebuerger ass duerno fir eng Kontroll an d'Spidol komm. Eng méi schwéier Blessur ass zum Gléck ausbliwwen, ma den Tom Wirtgen huet um ganze Kierper Wonnen. En vue vun der Weltmeeschterschaft déi nächst Woch zu Innsbruck ass dat net gutt.

Déi lescht Etapp vum Tour de Moselle gouf e Sonndeg iwwerdeems vum Aaron van Poucke gewonnen. Op d'Plazen zwee an dräi sinn den Henok Mulueberhan an den Nicolas Debeaumarché gefuer. Beschte Lëtzebuerger war de Luc Wirtgen als 19. op 1 Minutt a 7 Sekonnen.

D'Schlussvictoire ass fir den Geoffrey Bouchard. De franséische Champion wäert vun der nächster Saison u fir Ag2r, d'Ekipp vum Ben Gastauer, fueren. Beschte Lëtzebuerger gëtt de Luc Wirtgen als 5..