VIDEOEN a FOTOEN: Internationale Cyclocross KonterMisch Leyder beschte Lëtzebuerger, Victoire fir Van Kessel

E Sonndeg de Mëtteg gouf zu Konter Internationale Cyclocross gefuer - hei waren d'Debutanten, d'Junioren, d'Dammen an d'Elite mat den Espoiren am Asaz.

No den éischten dräi regionale Courssen, bei deenen de Vincent Dias do Santos, Luc Turchi a Misch Leyer jee d'Nues virhaten, gouf um Sonndeg bei den Häre fir de Kont vum internationale Skoda-Cross-Tour gefuer. Hei ass kee Wee laanscht den Belsche Van Kessel gaangen. Um 2.600 Meter laange Parcours, deen et gegëllt huet 11 mol hannert sech ze bréngen, hat de Belsch mat enger Zäit vun 1 Stonn 2 Minutten an 52 Sekonnen d'Nues vir. Op déi 2. Plaz um Podium ass den Andreas Goemann mat engem Réckstand vu 14 Sekonne gefuer. Den 3. gouf den Emil Hekele, dat 29 Sekonnen hannert dem Van Kessel. Beschte Lëtzebuerger gouf de Misch Leyder - seng Zäit louch bei 1 Stonn 55 Minutten a 5 Sekonnen. Do dohannert ass de Vincent Dias do Santos mat engem Réckstand vun 3 Minutten an 42 Sekonnen op déi 17. Plaz gefuer a just 19 Sekonnen drop ass de Lex Reichling iwwer d'Ligne d'Arrivée gefuer.

Internationale Cyclocross Konter (28.10.2018)
E Sonndeg de Mëtteg gouf zu Konter Internationale Cyclocross gefuer - hei war d'Victoire fir de Corne Van Kessel. Beschte Lëtzebuerger gouf de Misch Leyder.


Bei den Damme war d'Virjoresgewënnerin Helen Wyman aus Groussbritannien net um Depart. Villes huet dofir no enger Victoire vum Suzanne Verhoeven ausgesinn, déi d'lescht Joer nach déi 3. zu Konter gouf. Um Enn ass et awer d'Loes Sels aus der Belsch, wat déi séierst war. Dat ronn 1 Minutt virun den Hollännerinne Puck Pieterse op der 2. an dem Shirin Van Anrooij op der 3. Plaz. Aus Lëtzebuerger Siicht ass no siwen Tier Course d'Nathalie Lamborelle mat engem Réckstand vu 5 Minutten a 16 Sekonnen op déi 13. an d'Elise Maes 7 Minutten a 34 Sekonnen nom Sels op déi 15. Plaz gefuer.

Cyclocross Konter: Nowuesskategorien an Dammen (28.10.2018)
D'Loes Sels gewënnt bei den Dammen. Bescht Lëtzebuergerin gëtt d'Nathalie Lamborelle. Bei den Juniore gëtt den Loïc Bettendorff de 5.


Bei de Juniore gouf et eng Victoire fir den Théo Thomas, dat virum Hugo Jot an dem Yorben Lauryssen. Si haten e Réckstand vu 4 respektiv 8 Sekonnen. Beschte Lëtzebuerger war de Loïc Bettendorf. Hien hat e Réckstand vun 1 Minutt a 16 Sekonnen op de Gewënner.

Beschten Debutant war de Paul Anchain. Hien hat e Virsprong vun 43 Sekonnen op den Zweeten Matéo Jot. Drëtten an domadder beschte Lëtzebuerger war de  Matthieu Kockelmann op 1 Minutt an 3 Sekonnen. Bescht Meedche war d'Marie Schreiber.

PDF: Resultater vum internationale Cyclocross

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.