VIDEO - Cyclocross zu PéitengChristine Majerus fir d'3., Marcel Meisen fir d'4. noeneen

Zu Péiteng gouf op Neijoerschdag traditionell Vëlo gefuer - an zwar Cyclocross.

Internationale Cyclocross Péiteng / Reportage Lynn Kayser



An et war dann och nees richtegt Cyclocross-Wieder: fiicht, kal, ongemittlech.

PDF: Déi komplett Resultater.

Cyclocross zu Péiteng: Christine Majerus a Marcel Meisen (01.01.2019)
D'Lëtzebuergerin konnt ewell fir d'drëtt noenee gewannen, fir den Däitsche war et ewell déi 4. Victoire um Stéck.


Bei den Häre konnt den Däitsche Marcel Meisen gewannen a seng 4. Victoire noenee feieren. Den däitsche Champion, deen aktuell d'Nummer 13 op der Welt ass, hat sech vum Depart ewech un d'Spëtzt gesat. Hie huet sech séier eng Avance vun iwwer 30 Sekonnen erausgefuer an dës bis zum Schluss gehalen.



34 Sekonnen hannert him op Plaz 2 den Tschech Emil Hekele an Drëtten op 1 Minutt 31 Sekonnen de Fransous Lucas Dubau. Den Dubau hat am leschten Tour nach de Belsch Arno Debeir iwwerholl a konnt sech esou nach iwwert eng Podiumsplaz freeën.

Beschte Lëtzebuerger op Plaz 7. war de Sören Nissen op 3 Minutten 41. No engem schwaachen Depart hat sech de Lëtzebuerger vu Ronn zu Ronn no vir geschaaft. Fir hien ass et déi éischt Top10-Plazéierung zu Péiteng.



Bei den Damme konnt sech d'Christine Majerus direkt e Virsprong vun 30 Sekonnen erausfueren an dësen dann och bis zum Schluss geréieren. De Podium:

1. Christine Majerus
2. Yara Kastelijn (Holland)
3. Puck Pieterse (Holland)



D'Christine Majerus ass um Mëttwoch schonn nees am Asaz. D'Lëtzebuerger Championne start beim Cyclocross zu Meilen an der Schwäiz. No hirer 8. Plaz e Sonndeg zu Diegem beim Superprestige an derr Belsch an der Victoire op Niejierschdag zu Péiteng huet d'Lëtzebuerger Champione elo nees Confiance a sech selwer a weess, datt hir Form stëmmt. An de leschte Wochen haten d'Resultater nämlech net ganz gestëmmt, sou d'Christine Majerus.

Bei de Junioren hat de William Lecerf direkt vum Depart un d'Course am Grëff. De jonke Belsch huet sech direkt un d'Spëtzt gesat an huet säi Virsprong op seng Konkurrenz permanent ausgebaut, fir um Enn kloer ze gewannen. Op der zweeter Plaz loung bis zwee Tier viru Schluss de Lëtzebuerger Loïc Bettendorf.

De Podium bei de Junioren© Lynn Kayser


Wéi et dunn an de leschten Tour gaangen ass, ass den Ugo Ananie nach bäikomm. De Fransous konnt sech op de leschte Metere knapp déi zweete Plaz sécheren. De Loïc Bettendorf gëtt den Drëtten an domadder beschte Lëtzebuerger. Si haten e Réckstand vu ronn 30 Sekonnen op de Lercerf. Fir hie war et déi 2. Victoire dës Saison zu Lëtzebuerg, dat no Waarken.

Cycloscross zu Péiteng: d'Course vun de Junioren.© Lynn Kayser


Bei den Debutantë gouf et eng weider souverän Victoire fir de Mathieu Kockelmann. De jonken Déifferdenger dominéiert dës Saison bei de Cyclocrossen zu Lëtzebuerg an huet schonn 11 Coursse gewonnen.

© Lynn Kayser


Um Podium stoungen nach den Arno Wallenborn an den Noé Ury.

Bescht Meedche war d'Liv Wenzel.

D'Gewënner bei den Debutanten.© Lynn Kayser


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.