Internationale Cyclocross LeidelengSascha Weber wënnt, Vincent Dias dos Santos Beschten am Skoda Cross Cup

Bei den Damme wënnt d'Hollännerin Puck Pieters, d'Elise Maes ka sech mat enger 14. Plaz de Skoda Cross Cup sécheren.

Internationale Cyclocross zu Leideleng (20.01.2019)
Um Enn gouf et eng Victoire vum Sascha Weber am Sprint virum Emil Hekele. Beschte Lëtzebuerger gëtt de Massimo Morabito als 14.
Bei der Elite bei den Häre konnt sech den däitsche Sascha Weber déi éischte Plaz sécheren, dëst ganz knapp virum Tschech Emil Hekele. Drëtte gouf de Belsch Wietse Bosmans mat 29 Sekonne Retard op de Vainqueur.
Beschte Lëtzebuerger war de Massimo Morabito op der 14. Plaz. Dem Vincent Dias dos Santos ass eng 18. Plaz duergaang, fir sech de Skoda Cross Cup ze sécheren.

Bei den Espoiren konnt de Nicolas Kess de Skoda Cross Cup wannen.

Bei den Damme war d'Puck Pieterse aus Holland déi Séiersten. D'Hollännerin hat bei der Arrivée eng Avance vu 36 Sekonne virum Helen Wyman aus Groussbritannien, dëst virum Niek van Alphen aus Holland, wat de Podium komplettéiere konnt. Aus Lëtzebuerger Siicht koum d'Elise Maes op déi 14. Plaz, wat um Enn awer d'Victoire am Skoda Cross Cup fir d'Lëtzebuergerin bedeite sollt.

Bei de Junioren huet sech de Belsch Yorben Lauryssen duerchgesat. Hien hat e Virsprong vun 9 Sekonnen op säi Landsmann Arno Baers an 19 Sekonnen op de Loïc Bettendorf. De Lëtzebuerger Champion gëtt domadder beschte Lëtzebuerger.
Och beim leschte Cyclocross vun der Saison huet de Mathieu Kockelmann sech d'Victoire bei den Debutante geséchert. De Lëtzebuerger Champion huet sech mat engem Virsprong vun 12 Sekonne virum Noé Ury an dem Alexandre Kess behaapt. De Kockelmann huet bis op de Cyclocross zu Konter dës Saison net manner wéi 13 Coursse gewonnen.

Bescht Meedche war op en Neits d'Marie Schreiber. Hat hat sech och de leschte Weekend de Championstitel geséchert.

E Méindeg den Owend ass dann d'Präisiwwerreechung vum Skoda Cross Cup an an deem Kader gëtt d'Federatioun och bekannt, wien Ufank Februar bei der Cyclocross-Weltmeeschterschaft an Dänemark mat dobäi wäert sinn.

Christine Majerus zu Pont-Château
Bei der Victoire vum Marianne Vos koum d'Christine Majerus um Enn op déi enttäuschend 16. Plaz.

RTL-Artikel: Cyclocross-Weltcup: Kee gudden Dag fir d'Christine Majerus zu Pont-Château

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.