Tour de France

Tour de FranceGaviria wënnt am Sprint, Jungels 15., Froome verléiert Zäit

Op der 1. Etapp vun der 105. Editioun vum Tour de France ass et iwwert 201 Kilometer vun Noirmoutier-en-l'île op Fontenay-le-Comte gaangen.

© pressphoto
Um éischten Dag vum Tour de France 2018 ass d'Decisioun wéi erwaart am Massesprint gefall. De Fernando Gaviria huet sech um Enn d'Victoire geséchert a kritt domadder de Giele Maillot. Op Plazen zwee an dräi sinn de Peter Sagan an de Marcel Kittel gefuer. De Bob Jungels huet sech als 15. klasséiert.

De Chris Froome, de Richie Porte an den Adam Yates hunn 51 Sekonne verluer, si goufen op de leschte Kilometer an enger nervöser Finall ofgehaangen. Den Titelverdeedeger war och gefall. Den Nairo Quintana hat 3,4 Kilometer virun der Arrivée e Platten an huet doduerch 1 Minutt a 15 Sekonne verluer.

Am General huet de Gaviria als Leader e Virsprong vu 4 Sekonnen op de Sagan an der 6 op de Kittel. De Bob Jungels ass de 16. op 10 Sekonnen.

De Fernando Gaviria wënnt den Optakt vum Tour de France (07.07.2018)
De Bob Jungels gouf de 15. Op der 1. Etapp hunn awer och aner Coureuren Zäit leie gelooss, de Chris Froome, den Adam Yates an den Nairo Quintana.


FOTOGALERIE: Andréck vun der 1. Etapp op pressphoto.rtl.lu

Tour de France


Presentatioun vun der Etapp


Op der éischter Etapp hunn 201 flaach Kilometeren op d'Coureure gewaart. Fir d'Leaderen aus den Ekippe war et wichteg opzepassen, fir net duerch méiglech Borduren oder Chuten onnéideg Zäit ze verléieren. Fir d'Sprinter goung et um Samschdeg ëm déi éischt Etappevictoire.

Bei Kilometer 173 stoung dann och déi éischt Biergwäertung vum Tour de France 2018 um Programm. Et war dat d'Côte de Vix, ee Bierg vun der 4. Kategorie, deen iwwer 700 Meter am Duerchschnëtt 4,2% géi ass. Hei huet sech dann och decidéiert, wien als 1. Coureur an dësem Tour de Maillot vum beschte Grimpeur undoen dierf.

RTL-NEWS: Virschau op déi 1. Etapp

Resumé vun der Etapp
Op der 1. Etapp vun der 105. Editioun vum Tour de France ass et iwwert 201 Kilometer vun Noirmoutier-en-l'île op Fontenay-le-Comte gaangen. Direkt nom Depart hu sech dräi Leit aus dem Peloton ofgesat. De Kevin Ledanois (Fortuneo-Samsic), de Yoann Offredo (Wanty-Groupe Gobert) an de Jérôme Cousin (Direct Energie) konnte sech séier e Virsprong erausfueren an hunn d'Echappée vum Dag forméiert.



No 20 Kilometer haten déi 3 Leit un der Spëtzt eng Avance vu 4 Minutten. Duerno huet sech de Virsprong tëscht 3 a 4 Minutten agependelt, méi wäit fort, wollt de Peloton d'Spëtzeleit net fortfuere loossen.

Op den éischten 100 Kilometer gouf eng Moyenne vu 44 km/h gefuer. D'Echappée hat deen Ament nach 2 Minutten an 30 Sekonnen op de Chris Froome a Co.



Wat d'Arrivée méi no komm ass, wat de Réckstand vum Peloton och méi kleng ginn ass. D'Sprinterekippen hu lues awer sécherer den Tempo ëmmer weider ugezunn. 50 Kilometer virun der Arrivée haten déi dräi Mann un der Spëtzt nach e Virsprong vu ronn 1 Minutt.

28 Kilometer virun der Arrivée stoung dunn déi eenzeg Schwieregkeet vum Dag um Programm. De Kevin Ledanois ass am Sprint als éischten iwwert d'Côte de Vix gefuer, huet sech d'Punkte geséchert a kritt domadder de Maillot vum beschte Biergfuerer. 




10 Kilometer virun der Arrivée gouf dunn dee leschte Coureur aus der Echappée vum Dag agefaangen. Den Tempo am Peloton war elo héich an duerch d'Nervositéit gouf et och Chutten. De Bob Jungels huet sech awer aus allem erausgehalen, well de Lëtzebuerger Champion war wäit vir placéiert. De Chris Froome war dat net. De Brit ass gefall a gouf mat anere Coureuren ofgehaangen. 

© AFP


3 Kilometer virun der Arrivée hat dunn den Nairo Quintana e Platten, huet misse stoe bleiwen an ass aus dem Peloton zeréckgefall an och de Grupp vum Froome huet hie passéiert.

Am Sprint huet sech um Enn de Fernando Gaviria d'Victoire geséchert. Op Plazen zwee an dräi sinn de Peter Sagan an de Marcel Kittel gefuer. De Bob Jungels huet sech als 15. klasséiert. De Chris Froome, de Richie Porte an den Adam Yates hunn 51 Sekonne verluer. Den Nairo Quintana huet 1 Minutt a 15 Sekonne verluer.

Klickt Iech duerch d'Fotoen op pressphoto.rtl.lu.© pressphoto


Am General huet de Gaviria als Leader e Virsprong vu 4 Sekonnen op de Sagan an der 6 op de Kittel. De Bob Jungels ass de 16. op 10 Sekonnen. De Chris Froome ass den 91. op 1 Minutt an 1 Sekonn.



De Gaviria huet och de Grénge Maillot op senge Schëlleren. Bescht Ekipp ass Quick-Step Floors. De Kevin Delanois huet den Trikot vum beschte Biergfuerer op senge Schëlleren an de beschte jonken ass och de Gaviria.

© pressphoto


Klassement vun der Etapp


General


Den Tour de France op Twitter
Twitter TDF


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.