Volleyball: Challenge-CupStroossen verléiert den Allermatch mat 1:3 géint Sofia

E Mëttwoch den Owend war de VC Stroossen an der zweeter Ronn vum Challenge Cup géint Levski Sofia gefuerdert.

© Screenshot
Stroossen verléiert géint Sofia / Reportage Marc Burelbach



Stroossen muss sech am Allermatch géint Levski Sofia mat 1:3 (25:22, 16:25, 20:25 an 20:25) geschloe ginn.

Stroossen huet gutt géint déi jonk Equipe aus Bulgarien ugefaangen. Den éischte Saz konnt de Lëtzebuerger Champion no 27 Minutte mat 25:22 fir sech entscheeden.

De Start an den zweete Saz war net esou gutt. Séier lounge Lentz a Co. mat 1:5 hannen. Dëse Réckstand konnt Stroossen am Verlaf vum Saz net méi gutt maachen a muss dëse mat 16:25 u Sofia ofginn.

Am drëtte Saz loung ee beim éischten techneschen Time-out nach mat 8:7 a Féierung, duerno hunn d'Gäscht méi konstant gespillt a konnte sech op 3 Punkten ofsetzen. Bei 14:15 war een nees op 1 Punkt drun, ma fir u Sofia laanscht ze zéien ass et net duergaangen. Beim Tëschestand vu 24:20 haten d'Bulgare 4 Sazbäll, si konnten direkt den éischten notzen, fir de Saz mat 25:20 ze gewannen a mat 2:1 an de Sätz a Féierung ze goen.

Den Ufank vum véierte Saz war tëscht Stroossen a Sofia ausgeglach. Duerno konnte sech d'Gäscht tëschenduerch op 11:7 ofsetzen, ma d'Lokalequipe konnt sech erukämpfen an op 11:11 ausgläichen. De Stroossener ass et allerdéngs net gelongen, laanscht Sofia ze zéien. Si verléieren och dëse Saz mat 20:25 a musse sech mat 1:3 geschloe ginn.

De Retourmatch vun der 1/16-Finall tëscht Stroossen a Sofia gëtt e Mëttwoch zu Sofia a Bulgarien gespillt.



© Screenshot


Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.