VIDEO: Bommeleeër-AffärDe Guy Stebens gouf an der Bommeleeër-Enquête ofgelauschtert

An der Bommeleër-Affär gëtt elo schonn zanter iwwer 3 Joer hannert zouenen Diere géint 6 héich Polizisten enquêtéiert.

De Guy Stebens gouf an der Bommeleeër-Enquête ofgelauschtert (27.10.2017)
An der Bommeleër-Affär gëtt elo schonn zanter iwwer 3 Joer hannert zouenen Diere géint 6 héich Polizisten enquêtéiert.

Guy Stebens, Ecouten/Reportage Nico Graf



Am Dossier Bommeleeër gëtt et den Ament also Bewegung: ee vun de verdächtegen fréiere Gendaarmen, de Guy Stebens, ass ofgelauschtert ginn a virun e puer Wochen vun den Enquêteure gehéiert ginn.

Vill Präzises ass net gewuer ze ginn, iwwer dat, wat mam Guy Stebens lass ass. Mä dat, wat gewosst ass, dat ass derwäert.

Am Fong sinn et 4 Wierder, dës: Telefons-Ecouten, Perquisitioun, Saisie a Verhéier.

Der Rei no: de Bommeleeër-Prozess war knapps ugehale ginn, ugangs Juli 2014, dunn ass de Guy Stebens op Ecoute gesat ginn, säin Handy, säin Telefon doheem. Dat huet vu Ufank Juli bis an de September gedauert. A wann dem Guy Stebens säin Telefon ofgelauschtert ginn ass, da muss een dervun ausgoen, datt och déi aner verdächteg 5 fréier Gendaarmen Harpes, Bourg, Reuland, Schockweiler a Weydert op Ecoute waren. Vun 2014 bis haut sinn et iwwer 3 Joer an tëschenduerch huet de Procureur Georges Oswald jo ëmmer erëm emol gesot, et kéint deemnächst eng Informatioun iwwer d'Enquête kommen. Komm ass ni eppes. Geschafft ass awer ginn: den 20. Juli 2017 war beim Guy Stebens doheem eng Perquisitioun an do sinn och Saache saiséiert ginn an annerhallef Woch duerno gëtt de Guy Stebens geruff, vun de Bommeleeër-Enquêteuren. Déi hate no Ecouten, Perquisitioun a Saisie wuel Froen un de fréiere Gendaarm.

Mä firwat eigentlech de Guy Stebens? Dat huet direkt mat senger Aarbecht am Bommeleeër-Joer 1985 ze dinn. De jonken Offizéier war viru genee 32 Joer Chef genannt ginn vum GOR, vum Groupe d'observation et de recherche, Uerder vum Colonel Harpes. De GOR sollt d' Attentats-Serie opklären. Notamment mat enger Observatioun op den deemools Verdächtege Ben Geiben. Deen de 19. Oktober op Lëtzebuerg komme sollt, hat de Jos Steil, den 2. Mann aus der Brigade mobile, den Enquêteure gesot. Dunn huet et geheescht, de Ben Geiben kéim net, en ass awer komm, ouni datt een et wosst, d' Bomm um Geriicht ass explodéiert, de Ben Geiben ass erëm vum SREL observéiert ginn, och wéi hien aus der Villa Chomé Blummestéck erausgeholl huet, och wéi hien am Reckendall um Schéissstand mam Jos Steil diskutéiere gaang ass, och wéi hien à toute allure op Bréissel gefuer ass. De Ben Geiben war déi Woch erduerch déi beschte Pist vun den Enquêteuren a nom Attentats-Weekend war déi Pist an de PJ-Kreesser dout. Ouni datt et duerfir bis haut eng beweisbar Explicatioun gëtt.

An eben ronderëm dat Attentat ass am Prozess gekierpt a gekéiert ginn. Ouni datt de Guy Stebens iergendeppes valabeles ze soe gehat hätt. Hien huet sech – schwätze mer Lëtzebuergesch – vum Procureur, vun der Riichterin a vun der Defense no alle Noute vun der Konscht d Panz rappe gelooss, well hie säi Verhale vun deemools net explizéieren konnt. Oder wollt. Enquêteuren ass am Geriicht virop opgefall, datt de Guy Stebens ausgerechent säi Calepin aus dem Joer 1985 verluer huet. Wat do wuel dra stoung - An ee Saz vun him ass an Erënnerung bliwwen, deen hei: et ass immens schwéier als éischten en Numm ze nennen. Méi präzis ass de Guy Stebens awer net ginn; duerfir awer d' Riichterin Sylvie Conter: si sot: et gëtt nëmmen eng Erklärung: verschidde Leit wossten, wien et wier. Wollt soen: Et gëtt an de Forces de l'ordre Matwësser a wahrscheinlech och Mattäter, Terroristen an Uniform.

De Guy Stebens hat sech am Prozess als Klengen, als Jonken, als Naiven presentéiert. Et war awer och hien, deen op eppes opmierksam gemat hat: dem Colonel Harpes war proposéiert ginn, et misst een och enger Piste militariste nogoen. De Colonel hat déi Piste einfach gestrach. Protestéiert hat dogéint keen. Gefollegt hu se all.

An duerfir elo Ecouten, Perquisitiounen, Saisien a Verhéier.


Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.