VIDEO: Bommeleeër-EnquêteBis Enn dës Joers solle Conclusioune gezu ginn

Honnerte vun Analysen a Rapporten, 6 Enquêteuren, déi drop schaffen, an och um militäresche Volet gëtt enquêtéiert.

© RTL

E gutt Stéck weiderkomm wier d' Prozedur an der neier Bommeleeër–Enquête, seet de Procureur Georges Oswald am RTL-Interview.

Notamment de fréiere Gendarmerie-Offizéier Guy Stebens a 5 weider fréier Gendarmen hate sech am Bommeleeër-Prozess esou a Kontradiktioune verwéckelt, datt géint si enquêtéiert gëtt. Och aner Verdächteger aus der fréierer brigade mobile kéinten all Ablack an d'Prozedur erageholl ginn.

3 Enquêteure schaffe plein-temps op der Affär, 3 weider traitéiere bestëmmte Voleten. De Juge d'instruction Ernest Nilles krut vun hinne schonn 200 Rapporten a Synthèsen. Bis de Summer soll alles ofgeschloss sinn an da ginn bis Enn des Joers Conclusioune gezunn.


5 Joer nom Ufank vum Prozess, et geet weider

Bommeleeër: E Réckbléck op 177 Prozessdeeg (26.02.2018)
Viru genee 5 Joer huet de Prozess iwwer d'Affär Bommeleeër ugefaangen.


Jorelaang war et jo de Bommeleeër, dunn hu sech d' Enquêteure méi op e spezialiséierten an homogene Grupp konzentréiert – d' Brigade mobile vun der Gendarmerie, dunn - déck 10 Joer ass et hir - sinn de Marc Scheer an de Jos Wilmes verhaft ginn a souzen eng Nuecht laang an der Arrestzell vun der Police zu Hamm an de Procureur Robert Biever huet seng faméis Sonndegmuere-Pressekonferenz gehalen. An dunn huet et gedauert, bis genee viru 5 Joer de Prozess ugefaang huet, 177 Deeg voller Peripetien an onwahrscheinlechen Memoireslächer a Widderspréch.

5 Joer dono: Bommeleeër-Enquête / Reportage Nico Graf

D'Hären Harpes, Reuland, Bourg, Stebens a Schockweiler hu sech esou a Kontradiktioune verwéckelt, datt si, an och de Marcel Weydert aus der Brigade mobile, hir Qualitéit gewiesselt hunn, wéi de Procureur Georges Oswald sot.

De Georges Oswald (Extrait 1)



Aus den Zeie si Verdächteger ginn, vläicht futur Ugekloten. Genee dat ass den Enjeu vun deem, wat zanter dem Prozessofbroch am Gaang ass. Et muss erausfonnt ginn, ob déi 6 Mattäter oder Matwësser waren a sinn. An als éischt, seet de Procureur, muss d'Basis-Material analyséiert ginn, nämlech, wat ass gesot, bebaubst, gehouscht, ugedeit oder carrément verschweige ginn, am Prozess. E schwéieren Job fir d'Enquêteuren.

© Didier Weber/RTL

D'Sëtzunge goufe jo all opgeholl an all déi Opnamen hu misse nogelauschtert an analyséiert ginn. Déi Saache ginn dann net nëmmen niddergeschriwwen, mä och nach mat fréieren oder spéideren Aussoe vun den Zeien a Beschëllegte verglach. Déi ganz Aarbecht ass extrem opwänneg an déi kann een och net einfach esou dräi Stonnen um Stéck maachen.

An den technesch schwierege Procedé explizéiert deelweis, firwat et esou laang dauert, datt de Prozess, dee viru 5 Joer ugefaangen hat, deen elo jo zanter 3,5 Joer op Äis läit, datt deen nach ëmmer net weidergeet.

Ofgesi vun der Auswäertung vun den Zeien-Aussoen haten déi 3 Enquêteuren, déi vun 3 Polizisten ënnerstëtzt ginn, och nach weider Aarbecht. Parquet an Defense haten hinne sougenannten Devoiren, also Hausaufgaben, ginn, notamment och déi, der militärescher, der "Stay Behind"-Pist nozegoen. Dowéinst goufen, notamment zu Dikrech, Perquisitiounen ugefrot, méi Detailer konnt de Procureur awer net ginn. Eng ronn 200 Schrëftstécker goufe vun den Enquêteure verfaasst, ma konkret Aussoen oder eng Foto, déi op eng Persoun hindeit, esou datt een déi kéint veruerteelen, huet een awer net. Et sinn awer Elementer dobäi, déi méi e kloert Bild nach ginn, wéi virdrun. Dat nach ëmmer an d'Richtung vun der Brigade mobile.

Fréier Gendaarmen waren et also, oder si wëssen op d'mannst, wien et war. Dat reprochéiert hinnen de Parquet. Virop geet och ëm deen, deen zanter Joren duerch den Dossier geeschtert, de Ben Geiben, de fréiere Chef vun der Brigade mobile.

De Procureur schéngt och unzedeiten, datt et Elementer géint de fréiere Chef vun der Brigade mobile, grad esou wéi géint weider 6 Beschëllegter, gëtt.

Georges Oswald

Et héiert een et: nach ëmmer ass de Secret de l'instruction Tromp. Och wann heiansdo eppes erauskënnt aus der Enquête, zum Beispill iwwer de Guy Stebens, deen jo am Prozess ugedeit hat, hie wéisst Nimm ze nennen an awer keng genannt huet.

Nom Bommeleeër-Prozess war ugangs Juli 2014 säin Telefon op Ecoute gesat ginn. Dat huet vu Ufank Juli bis an de September gedauert. An den 20. Juli 2017 war beim Guy Stebens doheem eng Perquisitioun an do sinn och Saache saiséiert ginn an annerhallef Woch duerno gëtt de Guy Stebens an de Verhéier geruff, vun de Bommeleeër–Enquêteuren. De Georges Oswald seet, datt un den Dossiere vun de Leit geschafft gëtt, wat een an dësem Fall géif gesinn. Am Fall vum Guy Stebens gouf dann e Rapport verfaasst, wou all déi Elementer dra stinn, déi iwwer hien zesummegesicht goufen. D'Prozedur ass also do och e gutt Stéck weider komm, a Richtung vum Här Stebens mä och nach vun anere Leit.

Opfälleg war an der Lescht, datt Leit, déi sech mam Dossier Bommeleeër beschäftegen, ëmmer méi dacks ze héiere kréien, déi Attentater wier net esou schlëmm gewiescht an hätten engem gudden Zweck gedéngt. De Georges Oswald ass do awer och guer net d'Accord. Och wann dat Ganzt laang zeréckläit, do si ganz grave Faite geschitt, zum Beispill war een Zaldot deemools verongléckt.

De Georges Oswald (Extrait 2)

An dobäi huet de Georges Oswald nach kee Wuert gesot iwwer d'Leit vun Hollerech, déi nuets evakuéiert gi sinn, a kee Wuert iwwer dem Ingenieur seng futtis Hand wéint dem Booby Trap, der trucéierter Täscheluucht um Findel.

Egal wéi, an am Laf vum Joer solle Conclusioune geholl ginn. Et geet also lues, mä et geet weider.

5 Joer nom Prozess / Reportage Nico Graf



Wéi geet et weider?
Affär Bommeleeër: Wéi geet et virun? (26.02.2018)
E Gespréich mam Procureur adjoint Georges Oswald


Wann et dem Untersuchungsriichter no geet, hunn d'Enquêteuren, esouwäit dat méiglech ass, bis dëse Summer alles ofgeschloss, wat nach aussteet. Am zweeten Deel vum Joer muss den Untersuchungsriichter da kucken, wéi eng Suitten hien deenen Dossieren an domadder och der Affär gëtt. Dat heescht, datt och d'Chambre du conseil gefrot gëtt, ze decidéieren, wat a wéi engem Fall ze maachen ass, non-lieu oder Inculpatioun.

 

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.