VIDEO - Frisbee-AffärPlainte vum fréiere Geheimdéngschtchef verworf

Géint déi Decisioun huet de Marco Mille awer Appell gemaach. Déi ëmstridden Ecoute wier vum Jean-Claude Juncker autoriséiert gewiescht.

Frisbee-Affär: Plainte vum Ex-Geheimdéngschtchef verworf (09.03.2018)
Géint déi Decisioun huet de Marco Mille awer Appell gemaach. Déi ëmstridden Ecoute wier vum Jean-Claude Juncker autoriséiert gewiescht.
Et gëtt Neies an der sougenannter Frisbee-Affär! Am November hate mer Iech gemellt, dass de Marco Mille Plainte gemaach hätt wéinst engem manipuléierte Verbatim vum ominéisen Auere-Gespréich tëscht dem fréiere SREL-Chef an dem Ex-Premier Jean-Claude Juncker: Déi Plainte gouf elo vum zoustännegen Untersuchungsriichter verworf, mam Argument, et wär kee sougenannten Ecrit protégé, wougéint de Me Laurent Niedner, Affekot vum Marco Mille, Appel gemaach huet.

Ë.a. doriwwer goung e Freideg de Moien an engem exklusiven Hannergrondgespréich rieds, dat RTL mam fréiere Geheimdéngschtchef a mam Me Laurent Niedner gefouert huet. E Mikro an eng Kamera waren net zougelooss fir dat Gespréich.

Interview mam Marco Mille: Resumé vum Eric Ewald



E Gespréich, an deem de Marco Mille e ganz rouegen a ganz selbstsécheren Androck gemaach huet. Iwwer zwou an eng hallef Stonn huet hie verzielt an op Froe geäntwert, well et wär him dru geleeën, d'Fakten um Dësch leien ze hunn. Hien hätt ëmmer zouginn, wat hien net richteg gemaach hätt; d'Ecoute op den Elektronikfachmann Loris Mariotto - deen erkläert hat, et géif eng kryptéiert CD ginn, op där de Jean-Claude Juncker an de Grand-Duc Henri iwwert d'Attentater vun de Bommeleeër schwätzen -, déi Ecoute wär legal gewiescht, well de Jean-Claude Juncker se autoriséiert hätt. Deen hätt Saache mëssverständlech ausgedréckt, fir dass se kéinten ausgeluecht ginn, a kloer net d'Wourecht gesot; de Jean-Claude Juncker hätt net wëllen zouginn, dass hien dem Marco Mille d'Ecoute op de Loris Mariotto autoriséiert hätt.

2005 wär de Jean-Claude Juncker ausgeflippt, nodeems hie gewuer gouf, dass dee Loris Mariotto eppes vun engem Gespréich tëscht dem Ex-Premier an dem Grand-Duc Henri gewuer gi wär. Wéi iwwer eng Implikatioun vum Prënz Jean an d'Attentater rieds war, hätt de Jean-Claude Juncker de SREL opgefuerdert, Beweiser dofir ze liwweren; zwee Méint drop hätt en Alibi fir de Prënz virgeleeën. Wéi d'Fra vum Loris Mariotto no laangem Hin an Hier mat enger verschlësselter CD koum, hätt de Marco Mille de Jean-Claude Juncker opgeholl, fir seng Reaktioun ze dokumentéieren. De Marco Mille wéisst net, ob e Gespréich op der CD drop wär, géif awer dovun ausgoen, dass dat net de Fall ass; woubäi dat, wann eppes drop wär, extrem wichteg Beweiser am Bommeleeër-Dossier wären. De fréiere SREL-Chef wéisst och net, ob nach op där CD geschafft gëtt!



De Loris Mariotto wär sengerzäit op Ecoute gesat ginn, fir ze kucken, mat wiem hien no engem Gespréich mam SREL-Mann André Kemmer schwätze géif. De Marco Mille hätt mam Jean-Claude Juncker doriwwer geschwat, de SREL dunn ebe probéiert, eppes vum Loris Mariotto gewuer ze ginn, wat awer net gegléckt ass, an dunn huet de Marco Mille nees mam Jean-Claude Juncker geschwat, fir d'Ecoute geneemegt ze kréien. An deem zweete Gespréich hätt hien d'mëndlech Autorisatioun fir eng voll ëmfänglech Ecoute kritt, soudass déi vum Jean-Claude Juncker guttgeheescht gi wär. Deen hätt sech zwar net un dat Gespréich erënnere kënnen, wuel awer dorun, keng Autorisatioun ginn ze hunn!

Wéinst där net autoriséierter Ecoute an dem Klaue vun enger Kopie vun der CD soll de Marco Mille viru Geriicht kommen; béid Uklopunkte bestreit hien awer vehement. Déi sougenannt illegal Ecoute wär keng illegal, mä op Autorisatioun hi vum Ex-Premier zustane komm, soudass géint kee Gesetz verstouss gi wär. De Jean-Claude Juncker géif mat sengem Saz aus dem net manipuléierte Verbatim "déi zwee Deeg, wou mer gelauschtert hunn" kloer beleeën, dass hie wousst, dass eng Ecoute op de Loris Mariotto gemaach géif ginn. Woumat mer nees bei den zwee Verbatimme wären, deem richtegen an deem manipuléierten.

Fir d'Diskussiounen an der parlamentarescher Geheimdéngscht-Kontrollkommissioun hätt de falsche Verbatim virgeleeën, an deen hätt d'Prozedur influenzéiert. Dee falsche Verbatim wär wuel ëm de 4. Dezember 2012 verfaasst ginn, woubäi sech d'Fro stelle géif: vu wiem? Duerch déi falsch Fakte wär de Kommissiounspresident an haitege Minister François Bausch an der Reunioun vum 5. Dezember a senger Meenung ëmgedréint ginn, wouropshin et zu de Poursuitte géint de Marco Mille komm ass!




Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.