Dat stëmmt esou net, well nohalteg Investitiounen eng wichteg Roll spillen bei der Transitioun zu enger méi nohalteger Welt. Fir déi international Nohaltegkeetsziler, wéi e bessere Klima- an Ëmweltschutz ze erreechen, sinn enorm Investitioune vu Milliarden Euro néideg. Esou ginn ëmmer méi Finanzprodukter lancéiert, déi den Nohaltegkeetsufuerderunge vun der Europäescher Unioun entspriechen.

De Gilles Klein vun der CSSF erkläert an engem Interview, wéi ee feststellen kann, ob e Finanzprodukt nohalteg ass, wat ënner Greenwashing ze verstoen ass an op wat een oppassen soll, wann een an nohalteg Produkter investéiert.

Interview mam Gilles Klein

Den EU Kader fir nohalteg Finanzen

Den Iwwergang an eng méi nohalteg Welt erfuerdert bedeitend finanziell Investitiounen, dofir déi grouss Relevanz vum Thema nohalteg Finanzen. D'Europäesch Unioun huet Moossnamen am Kader vun den nohaltege Finanzen geholl fir d'Kredibilitéit vun de nohaltege Finanzen ze erhéijen an den Investisseuren méi Transparenz ze garantéieren.

D'Europäesch Unioun huet eng Lëscht vun ekologesch nohaltege wirtschaftlechen Aktivitéiten opgestallt, déi als Taxonomie bezeechent gëtt. Dës Taxonomie erlaabt Firmen, Investisseuren a Politiker op eng gemeinsam Definitioun vun der ekologescher Nohaltegkeet zeréck ze gräifen. D'Taxonomie verfollegt déi sechs folgend Ëmweltziler:

  • Ofschwäche vum Klimawandel;
  • Adaptatioun un de Klimawandel;
  • Nohaltege Gebrauch a Schutz vu Waasser- a Mieresressourcen;
  • Iwwergang zu enger circulaire Wirtschaft;
  • Präventioun a Reduktioun vun der Verschmotzung;
  • Schutz a Restauratioun vun der Biodiversitéit an den Ökosystemer.

Ausserdeem schreift d'Europäesch Unioun den Acteuren vun den Finanzmäert Transparenzregele vir, mat dem  Zil d'Informatioun iwwer de Nohaltegkeetsgrad vu Finanzprodukter ze verbesseren. Dëst erlaabt et Greenwashing ze bekämpfen an Investitiounen a Richtung wierklech nohalteg Investitiounen ze dirigéieren.

Finanzdéngschtleeschter mussen och uginn, ob eng Investitioun déi wichtegst negativ Auswierkunge berücksichtegt (wéi Zäregasemissiounen, Waasserverschmotzung, Zwangsaarbecht, asw.) a falls jo, präziséieren, wat gemaach gëtt fir dës Auswierkungen ze reduzéieren.

En anert Element vum EU-Kader fir nohalteg Finanzen si Benchmarks, Normen an Labels. Dës Tools sollen hëllefen d'Finanzéierung op méi nohalteg Aktivitéiten a Geschäftsmodeller ze riichten an den Investisseure méi Transparenz a Kredibilitéit an dësem Beräich ze bidden.

D'Roll vun der CSSF am Beräich vun nohaltegen Finanzen

D'CSSF, als Regulateur, encadréiert déi iwwerwaachten Entitéiten, fir de Finanzsecteur aktiv bei der  Integratioun vun den ESG Faktoren ze guidéieren. Si waacht  iwwer eng effektiv Ëmsetzung vun de Reglementer mat Hëllef vun enger risikobaséierter Iwwerwaachungsapproche. Ausserdem, am Kader vun hirer Missioun am Beräich vun der Finanzbildung,  ënnerstëtzt  CSSF d’Konsumente bei hire Reflexiounen an bei der Sensibiliséierung zum Thema nohalteg Finanzen.

Wat kann een maachen, wann een un nohaltegen Investitiounen interesséiert ass?

Et soll een sech mat dem Thema vertraut maachen an erausfannen, wat Nohaltegkeet fir sech  selwer bedeit. Dës Bewäertung kann variéieren, jee no de Standpunkter an den Iwwerzeegungen vun all eenzelnen. Während fir déi eng zum Beispill d'Klimaneutralitéit vu Aktivitéiten en entscheedend Element ass, steet fir anerer e fairen a sozial gerechte Produktiounsprozess am Virdergrond. Et ass also wichteg iwwer seng eegen Ziler vun  Investitiounen an nohalteg Produkter nozedenken.

Zënter dem August 2022 hunn déi Professionell am Finanzsecteur d’Verflichtung Nohaltegkeetspreferenzen, also d’Wënsch a punkto nohalteg Investitiounen, vun de Clienten ze berücksichtegen. D’Analyse vun den Nohaltegkeetspreferenzen vun de Clienten erlaben et dem Finanzberoder  gëeegent Investitiounen ze recommandéieren, déi zu dem Profil vun hire Clienten passen.

Wéi kann ech mech versécheren, dass e Produkt wierklech nohalteg ass?

Wann déi perséinlech Nohaltegkeetsziler kloer sinn, sollt een d'Offeren analyséieren an op  folgend Aspekter oppassen:

  • Wéi eng Nohaltegkeetsziler gi konkret ernimmt?
  • Wéi ee Critère gëtt benotzt fir d'Nohaltegkeet ze moossen (ass de Produit allgemeng nohalteg oder nëmme par rapport zu ähnlechen Produkter)?
  • Ginn aner Nohaltegkeetsziler, déi fir mech wichteg sinn, vernoléissegt (wéi z.B. klimaneutral Produktioun, déi awer ënner net adäquaten Bedingungen duerchgefouert gëtt)?
  • Wéi eng Beweiser gi geliwwert fir ze weisen datt d'Ziler tatsächlech erreecht ginn?
  • Kënnen d'Beweiser kontrolléiert ginn? Gëtt d'Erreeche vun den Nohaltegkeetsziler vun engem onofhängege Instanz bestätegt?

Et ass wichteg déi richteg Froen ze stellen an sech net duerch Begrëffer wéi "nohalteg", "ESG" oder "gréng" verféieren ze loossen.

Wéi bei all Investissement, ass et unzeroden sech am Viraus gutt ze informéieren a sech vu  Fachleit beroden ze loossen.

Méi gitt Dir gewuer op:

www.letzfin.lu

https://www.abbl.lu/en/professionals/key-topics/sustainability