Frankräich klappt Dänemark an zitt an d’Aachtelsfinall an

Am Grupp C huet Polen géint Saudi-Arabien gewonnen an Argentinien ass déi wichteg Victoire géint Mexiko gelongen. Am Grupp D konnt Australien sech géint Tunesien duerchsetzen, wärend Frankräich Dänemark geklappt huet.

Grupp C

Polen - Saudi-Arabien 2:0
1:0 Zielinski (39’), 2:0 Lewandowski (82’)

Am éischte Match vum Grupp C ass Polen op Saudi-Arabien getraff, déi um éischte Spilldag iwwerraschend géint Argentinien gewonnen haten. Och géint d’Polen huet Saudi-Arabien gutt an de Match fonnt an hat no 13 Minutten déi éischt grouss Geleeënheet, ma de Szczesny konnt dem Kanno säi Schoss paréieren. D’Saudie si weider déi besser Ekipp bliwwen, ma an der 39. Minutt war et den Zielinski, deen d’Polen no engem séiere Spillzuch konnt a Féierung bréngen. Kuerz virun der Paus gouf et dunn duerch en Eelefmeter déi nächst Occasioun fir Saudi-Arabien, ma de Szczesny huet dem Al-Dawsari säi Versuch an och de Noschoss vum Al-Breik staark paréiert, soudass et mat engem ongléckleche Réckstand fir d’Asiaten an d’Paus gaangen ass.

D’Formatioun vum franséischen Trainer Hervé Renard huet och am zweeten Duerchgang weider eng gutt Leeschtung gewisen, an der 55. Minutt ass den Al-Dawsari awer eemol méi um staarken Szczesny hänke bliwwen. An der Suite hunn d’Polen dunn ëmmer méi Akzenter no vir gesat, a bannent 3 Minutte hunn de Milik an de Lewandowski de Ball un d’Aluminium geschoss. D’Europäer sinn ëmmer besser ginn an hu sech an der 82. Minutt mam 2:0 duerch de Lewandowski belount. No engem katastrophale Feeler vum Al-Malki war de Stiermer vu Barcelona eleng virum Gol an huet sech säin éischte Gol bei enger WM net huele gelooss. Mat dëser Victoire behält Polen d’Chance op d’Aachtelsfinall, ma och fir Saudi-Arabien ass nach alles méiglech.

Argentinien - Mexiko 2:0
1:0 Messi (64’), 2:0 Fernandez (87’)

An deem fir béid Formatiounen enorm wichtege Match huet sech am éischten Duerchgang vill am Mëttelfeld ofgespillt. Et war eng ganz ëmkämpfte Partie mat ganz wéinegen Aktiounen am Strofraum, dofir awer mat 16 Fouls no 45 Minutten, wouduerch kaum Spillfloss zustane komm ass. Just de Vega an de Messi hu jeeweils mat engem Fräistouss de géigneresche Golkipp konnten testen.

Och am zweeten Duerchgang ass net vill Spillfloss opkomm, ma no 64 Minutte war et natierlech de Messi, dee seng Faarwen duerch een Distanzschoss a Féierung bruecht huet. Mexiko war elo gefuerdert, ma d’Mëttelamerikaner sinn awer weider net geféierlech virun de Gol komm. An der 87. Minutt war et dunn den agewiesselte Fernandez, dee mat engem schéinen Ofschloss fir d’Entscheedung gesuergt huet. Argentinien huet domat weiderhi Chancen op d’Weiderkommen an op déi éischt Plaz an der Tabell, Mexiko steet dogéint virun der Eliminéierung an ass um leschte Spilldag op Hëllef vun Argentinien oder Polen ugewisen.

Grupp D

Tunesien - Australien 0:1
0:1 Duke (23')

D'Australier sinn e Samschdeg besser an de Match komm an haten an den éischten 20 Minutten de Match ënner Kontroll. An der 23. Minutt hunn d'Socceroos sech du fir hiert Engagement belount, wéi den Duke Australien mat engem Kappball-Gol a Féierung bruecht huet. An der Suite sinn d'Tunesier dunn awer wakereg ginn a si konnte sech däitlech steigeren. Bis zur Paus haten d'Nordafrikaner a Persoun vum Dräger an Mskani nach zwou gutt Chancen, fir auszegläichen. Béid hu si awer net genotzt, deemno goung et beim Stand vun 0:1 aus tunesescher Siicht an d'Paus.

Och déi zweet 45 Minutte waren immens ëmkämpft. Béid Formatioune hunn aggressiv agéiert, vill geféierlech Golaktioune gouf et awer net. D'Tunesien hunn offensiv alles probéiert, bei hire Schëss huet allerdéngs dacks déi néideg Prezisioun gefeelt. Um Enn ass et bei der knapper Victoire fir Australien bliwwen, deemno stinn d'Tunesier schonns kuerz virum Aus bei dëser WM.

Frankräich - Dänemark 2:1
1:0 Mbappé (61’), 1:1 Christensen (68’), 2:1 Mbappé (86’)

Donieft krut Frankräich et am Spëtzematch vum Grupp mat Dänemark ze dinn. D’Fransouse ware vun Ufank un déi spillbestëmmend Ekipp an haten och e puer gutt Occasiounen, fir a Féierung ze goen, ënner anerem duerch de Rabiot an den Mbappé. Zwar goufen et och ëmmer Phasen, an deenen d’Dänen de Ball haten, ma am Géigesaz zu de Fransouse si si kaum geféierlech virun dem Lloris säi Gol komm.

An der zweeter Hallschent huet de franséische Gol dunn net méi laang op sech waarde gelooss. No engem exzellente Spillzuch vum Theo Hernandez a vum Mbappé war et de jonke Superstar vu PSG, deen d’”Équipe Tricolore” verdéngt a Féierung brénge konnt. Déi dänesch Äntwert huet allerdéngs net laang op sech waarde gelooss. Bei engem Corner ass de Ball verlängert ginn an den Andreas Christensen stoung goldrichteg, fir zum Ausgläich anzekäppen. Doropshin ass Frankräich nees méi offensiv ginn, ma Dänemark huet sech net verstoppt an hat duerch de Lindstrøm an de Braithwaite zwou gutt Chancen zur Féierung. Um Enn hunn d’Fransousen awer nees hir individuell Klass bewisen an hunn no enger schaarfer Flank vum Griezmann op den Mbappé op 2:1 gestallt. Déi dänesch Formatioun hat deem näischt méi entgéintzesetzen, soudass d’Ekipp vum Didier Deschamps sech als éischt Ekipp virzäiteg fir d’Aachtelsfinall qualifizéiert. Fir Dänemark geet et um leschte Spilldag géint Australien ëm d’Weiderkommen.

D'Tabellen am Iwwerbléck