Gëtt et esou eppes wéi Bestëmmung am Liewen? "Liebende", déi Koreanesch Fabel iwwert Léift ass e Buch mat ganz ville Messagen

D'Blauperlenauge, de Kaarp vun enger Tempelgläckelchen ka säi Gléck bal net gleewe wéi et dem Schwarzperlenauge begéint: Et ass Léift op den éischte Bléck.
Mat de Joren ass awer am Liewe vun deenen zwee Fësch op eemol alles zimmlech monoton ginn. D'Blauperlenauge langweilt sech a fillt sech eleng. Dat kann dach net alles gewiescht sinn? D'Léift ass eng Gewunnecht ginn an dat geet net duer. Dofir mécht d'Blauperlenauge sech op de Wee fir déi richteg Léift wierklech mol ze fannen. Als Lieser mécht een sech natierlech mat op de Wee an et gëtt en Zeie vun zum Deel ganz subtille Konversatiounen iwwert d'Thema Léift. Op senger Rees mécht de Fësch vill Bekanntschaften an entdeckt nei Plazen. "Das Leben ist ein Mosaik aus Begegnungen und Abschieden"
Mee kann den onrouege Wanderer wierklech säi Gléck op enger anerer Plaz fannen? Dat musst der scho selwer erausfannen.
Schon no e puer Zeilen huet dat kleng Buch et fäerdeg bruecht mech ze faszinéieren. D'Geschicht, déi ee ganz gutt op déi mënschlech Realitéit iwwerdroe kann, sief et déi éischt grouss Léift, d'Hochzäit, de Stot an iergendwann de Punkt wou een deem aneren näischt méi ze soen huet, an dass et engem iergendwann och esou ka goe wéi dem Fësch, deen sech op d'Sich no der wierklecher Léift mécht, erënnert haiansdo un d'Wäisheete vum klenge Prënz. Dass fir déi Fabel zwee Fësch geholl goufen hat wahrscheinlech och de Grond, dass an Asien d'Kaarpen ganz héich ugesi sinn.
Bei senge Beschreiwunge verléiert den Auteur sech net an enger kitscheger Sprooch, wéi een dat elo vläicht kéint unhuelen, d'Sprooch bleift voller Biller a poetesch. Op verschiddene Plaze klénge philosophesch Usätz duerch, déi een iergendwou nodenklech maachen. Et kann e quasi dem Blauperlenauge derbäi nokucke wéi et mat senger Schwanzfloss wackelt, oder duerch d'Welt reest, e puer Aventuren iwwersteet an op Péng, Léift an Dout trëfft. Et erkennt wourop et am Liewe wierklech ukënnt a wat d'Liewe liewenswäert mécht. 
De Cover ass Faarweg mat zwee Fësch am Yin/Yang Muster an doduerch gëtt nach emol däitlech dass et am Liewen dat eent ouni dat anert net gëtt. Keng Léift ouni lassloossen, keng Hoffnung ouni Trauer a keng Zouversiicht ouni Zweiwel. E klenge Bonbon sinn dann och d'Zeechnunge bannen am Buch, déi an den Text gestreet sinn. eraus koum hei e wonnerbart klengt Buch wat ureegt iwwer Léift a Frëndschaften nozedenken. Déi schéi Geschicht an och de Stil vum Auteur invitéieren een dozou all Saz op sech wierken ze loossen an en ze hannerfroen.

Buch vun der Woch: Liebende vum Jeong Ho-Seung

Den Jeong Ho-Seung ass ee vun de bekanntsten Dichter a sengem Land an huet 1982 säin éischte Bestseller publizéiert, op deen der nach vill nokoumen. Liebende ass 2008 a Korea erauskomm an d'Buch ass entretemps an der 32. Editioun mat iwwer zwou Milliounen Exemplairen déi weltwäit verkaf goufen.