„La fée cabossée“ ass dat eenzegt franséischsproochegt Buch, dat an der Kategorie „Kannerbicher“ fir de Buchpräis nominéiert gouf.

D'Fée ass an dësem Fall eng Bei. Am Buch geet et net nëmmen ëm eng fiktiv Geschicht, mä och dorëms, méi iwwert d'Welt vun de Beien ze léieren. Dem Fée seng Aufgab ass et, de Bëbeeën ze hëllefen, fir anzeschlofen. Wärend hirem éischten Asaz ass si awer selwer nieft dem klenge Gaspard ageschlof. A wou d'Mamm moies erankënnt an d'Bei gesäit, fänkt si direkt u mat blären:

Même encore dans les brumes du sommeil, elle me fixa un instant, puis se mit à hurler de toutes ses forces. Voilà qui avait fini par me réveiller complètement ! Paniquée, je me mis à voleter dans tous les sens essayant de trouver une cachette.
Elle cria :
- Chéri, une abeille ! Sur l'oreiller de Garspard !
Je stoppai aussitôt ma course pour leur expliquer d'une part, que je n'étais pas une abeille, et d'autre part, que ces insectes étaient tout à fait inoffensifs!

La Fée cabossée / Rep. Monica Camposeo (25.10.19)

D'Ariette ass harmlos, an awer schéisst d'Mamm mat enger Schlapp op et, an esou erkläert sech och den zertéitschte Flillek vun der „fée cabossée".

Nom éischten Deel vun der Geschichte mam Ariette a Gaspard, erkläert d'Schrëftstellerin Béatrice Ruffié Lacas an enger Zort Dossier, wisou d'Beien net geféierlech sinn: „Ech wollt am Buch iwwert d'Beie schwätzen an och erklären, wisou si fir eisen Ecosystem esou wichteg sinn. Et huet een oft d'Tendenz, de Kanner ze soen, dass si missten oppassen, wa si eng Bei gesinn. An dann huet een net onbedéngt Zäit, fir och z'erklären, dass Beien awer net wierklech geféierlech sinn."

D'Kanner ënnerhalen, mä hinnen och eppes bäibréngen, dat steet bei dësem Buch am Virdergrond. D'Geschicht vum Ariette an den Dossier iwwert d'Beie kënne getrennt vunenee gelies ginn. Fir d'Schrëftstellerin Béatrice Ruffié Lacas an den Illustrator Baptiste Boulanger, war et besonnesch wichteg, den Dossier esou opzebauen, dass sech d'Kanner doranner och erëmfannen.

„Mir hunn versicht, op enger Duebelsäit op Froen ze äntweren, déi Kanner sech kéinte stellen. Mir wollten net vun engem erwuessenen Denkmuster ausgoen, mee wierklech vun Froen, déi kënne vun Kanner kommen", sou d'Béatrice Ruffié Lacas.

Mat ville Biller gëtt erkläert, wéi d'Beie liewen, wéi den Hunneg hiergestallt gëtt a wisou et wichteg ass, Beien ze schützen. E pedagogescht Buch, wat awer de Kanner och Spaass mécht, a vun deem och d'Erwuessener eppes léiere kënnen.

D'Buch „La fée cabossée" ass beim Verlag KIWI E.L.G. erauskomm.