Mat Despicable Me 4 ass dee komeschsten a wuel léifste Gangster aus der Kinoswelt nees um groussen Ecran ze gesinn.

Nieft dem Gru duerfen och an dësem neie Volet déki geckeg Minions net feelen.

De fréiere Gangster an aktuelle Geheimagent Gru huet et no etleche Joren endlech fäerdegbruecht sengem groussen Äerzfeind aus senge Lycéesjoren d’Handwierk ze leeën an hanner Gitter ze bréngen. Ma de megalomane Maxime Le Mal léisst sech net laang aspären, brécht aus dem Prisong aus a schwiert seng Revanche ze huelen an dem Gru säin nei gebuerene Bouf ze entféieren. Fir sech a Sécherheet ze bréngen, muss de Gru mat senger ganzer Famill an enger klenger Stad ënnert enger anerer Identitéit en neit Liewen opbauen. E Liewen, an deem si net sollen opfalen. Eng Aufgab, dé idem Gru a senge Minions net einfach fält.

De 4. Volet vun der Despicable-Me-Saga ass genee wéi seng Virgänger vollgepaakt mat Witz, Slapstick an enger gudder Portioun Action, déi mat ganz héijer Vitess um groussen Ecran defiléieren. Wann d’Witzer net ëmmer esou gelonge sinn, sou sinn et Personnagen ëm de Gru a virun allem d’Minions, déi hei fir flott a liicht Ënnerhalung suergen. Despicable Me 4 ass puere Fan Service, dee versicht eng immens rentabele Filmrei weider um Liewen ze erhalen. Mat bis ewell iwwert 760 Milliounen Dollar, déi de Film weltwäit agespillt huet, ass dëse Volet op der drëtter Plaz vum internationale Boxoffice vun dësem Joer vertrueden. Hei am Land ass dësen Animatiounsfilm op englesch, däitsch a franséisch ze gesinn.