Mam Start an déi nei Saison erwaarden de Public dann nees ganz nei Wierker.

D'Vereenegung „Clervaux – Cité de l'image“ setzt zäitgenëssesch Fotografien am ëffentleche Raum a Zeen a verwandelt sou all Joers op e Neits Klierf an eng Fräiliichtgalerie. „Portrait hors cadre“ heescht déi aktuell Kollektioun, déi een op 6 verschiddene Statioune ronderëm d'Klierfer Schlass entdecke kann. Mam Start an déi nei Saison erwaart de Public dann och nees ganz nei Wierker. Wéi den Numm et scho verréit, weist déi aktuell Fotoserie Portraiten, déi aus der Rumm falen, also  net onbedéngt de bekannten, traditionelle Reegele vum Genre entspriechen.  „Portrait hors cadre“ ass also en Thema, wat déi verschiddensten Interpretatiounen zouléisst. Dem David Spero seng Serie „Settlements“ léisst sech op den éischte Bléck der Landschaftsfotografie zouuerdnen.

De franséische Fotograf Denis Dailleux huet eng grouss Leidenschaft fir Mënschen. Seng fotografesch Aarbecht zeechent sech virun allem duerch déi staark Verbindung aus, déi hien zu deenen opbaut, déi hie virun der Lëns huet. Dacks sinn dat Weltstaren, ma an der Serie  „Ma Tante Juliette“ riicht hien de Bléck op seng Grousstatta.

Enn September mécht de Groussdeel vun de Statioune Plaz fir eng ganz nei Thematik. Och d'Wierker vum David Spero an dem Dennis Dailleux kann ee nach bis am nächste Fréijoer an der Cité de l'image entdecken.

Den 11. September invitéiert d'“Cité de l'image“ op eng Renconter an eng  Visite guidée mat de Fotografen Susan Barnett, Peter Bialobrzeski, Isabelle Graeff, Denis Dailleux an David Spero.

www.clervauximage.lu