De Servais-Präis 2019 vum Elise Schmit, neie Youtube-Channel vum CNL mat Liesunge fir Kanner a grouss Schrëftsteller am Portrait an der Arte-Mediathéik.

D'Kulturhaiser sinn zou, dofir muss een awer net op Konscht, Musek, Literatur, Theater asw. verzichten.

D'Kultur-Redaktioun versuergt Iech dofir mat Fudder fir Kapp, Häerz a Gemitt.

Elise Schmit: Stürze aus unterschiedlichen Fallhöhen

Si publizéiert hiert éischt Buch a kritt 2019 direkt de Servais-Präis. D’Elise Schmit iwwerzeegt d’Kritiker a Lieser mat hirem Band vu sechs Erzielungen, an dat mat Recht. Stürze aus unterschiedlichen Fallhöhen erzielt vu sechs ënnerschiddleche Charakteren, Mënschen a ganz verschiddene Kulissen. All kenne se d’Gefill vun Héichten an Déiften, vu „Fallhöhen“, a musse sech mat existenzielle Froen auserneesetzen

Hänke bléift do zum Beispill d‘Geschicht „Im Zug“, déi de Lieser net lassléisst. E Mann gëtt net vu senger Frëndin um Quai vum Zuch ofgeholl a stierzt sech an eng Irfaart (am iwwerdroenen, mä och am wuertwiertleche Sënn), duerchlieft Angschtgefiller, jo richteg Panikattacken, an hëlt een Zuch nom aneren, ganz ouni Zil.

Dem Elise Schmit hir Charaktere gi richteg gräifbar, si konkret a realistesch. Sou duerchlieft de Lieser d’Existenzkris vum Mann am Zuch richteg mat. An de Stil geet Hand an Hand mat den Emotiounen vun der Figur– wann hie keng Loft méi kritt, huet de Saz just Kommaen, mä kee Punkt. Wann de Mann Gedankespréng mécht, gëtt de Saz bewosst ënnerbrach, a wann hien hektesch gëtt, komme kuerz a knapp Sätz a keng laang Beschreiwungen…

An dat si nëmmen d’Impressioune vun enger vu sechs Geschichten. E literaresche Schatz, made in Lëtzebuerg!

Servais-Präis fir d'Elise Schmit
D'Elise Schmit gouf fir hiert Wierk "Stürze aus unterschiedlichen Fallhöhen" augezeechent.

Digital Liesunge fir Kanner a Jugendlecher

Endlech huet e mol erëm Zäit fir e Buch an eng Rees duerch d‘Literatur. Mä och déi Kléng musse matgeholl ginn, sollen d’Welt vun de Bicher entdecken a Spaass dru kréien. Well et nach eng ganz aner Saach ass, Bicher virgelies ze kréien, virun allem fir déi Jonk, déi nach net selbststänneg liese kënnen, huet den Nationale Literaturzenter e Youtube-Channel ageriicht. No an no ginn hei Videoe mat Liesungen fir Kleng (an och Grouss) publizéiert.

En éischte Schrëtt ass et, Kannerbicher virzestellen, en nächsten wier et, och d’Literatur fir Erwuessener matzehuelen. Ma hei bitt sech dann an engem éischte Schrëtt och mol d’Geleeënheet fir déi Grouss, d’Bicher fir déi Kleng kennenzeléieren.

Schrëftsteller am Portrait bei Arte

Dacks kennt en d’Bicher, mä wéi se entstane sinn oder wat d’Auteuren inspiréiert a beaflosst huet, bleift zweetrangeg. Dat ass schued, well den historeschen, politeschen, sozialen an artisteschen Hannergrond an der Weltliteratur léisst een d’Texter nach emol anescht liesen. Et entdeckt an erkennt een Allusiounen, Biller oder Symboler, déi engem soss entgaange wieren.

E gutt Beispill ass de Roman A Handmaid’s Tale vum Margaret Atwood. Bekannt ass d’Buch nach méi duerch d’Serie mam Elisabeth Moss, mä wat huet d’Autorin dozou beweegt, déi Geschicht ze erzielen?

Den Ament portraitéiert Arte (Mediathéik) ausgewielte Schrëftsteller mat engem Schwéierpunkt. Dorënner sinn d‘Margaret Atwood, de Mark Twain oder de Joseph Roth.

Eng flott an interessant Dokumentar-Rei fir all déi, déi och de Mënsch hannert de Bicher kenneléiere wëll.