Wéinst der Pandemie gouf de bekannte Festival ofgesot.

De Frank Rippinger organiséiert den e-Lake Festival zënter 24 Joer. Ma wéinst der Corona-Pandemie huet dëst Joer eng Alternativ missen hier. Dowéinst hunn de Frank Rippinger a seng Ekipp decidéiert, 2 Concerte bei der Orangerie zu Iechternach z'organiséieren. Domadder gouf sech virun allem méi Visibilitéit erwaart.

De Festival, dee ganz beléift an der Groussregioun ass, huet déi leschte Joer tëscht 20.000 a 25.000 Leit ugezunn. Wéinst de sanitäre Mesurë waren e Samschdeg den Owend nëmme 70 Leit bei deenen 2 Live-Concerte mat dobäi.

Programm

Um 20 Auer goung et op enger geheimer Plaz mat der Hip-Hop-Band Freshdax lass. D'Lëtzebuerger Band ass schonn 2014 um Iechternacher Séi opgetrueden. Si hunn de Lockdown genotzt, fir nei Musek ze prouwen.

Duerno ass de Serge Tonnar opgetrueden, deem seng Lidder och virop elo an der Corona-Zäit ganz aktuell sinn.

Zum Schluss gouf een DJ-Set vum weltbekannten hollänneschen DJ Mark Sixma gewisen. Hien ass schonn op ville Bünen opgetrueden an huet wärend senger Vakanz am Grand-Duché ee Live-Set virbereet. Dee gouf am Virfeld opgeholl an den 8. August iwwerdroen.

Den nächsten e-Lake Festival ass fir den zweete Weekend am August 2021 ugekënnegt.

Preparative vum e-Lake Festival 2020

Digital Editioun vum e-lake 2020
De Festival, dee ganz beléift an der Groussregioun ass, huet déi leschte Joer tëscht 20.000 a 25.000 Leit ugezunn.