Den Held vun der Geschicht huet een Häerz aus Steen. Oder mengt et op alle Fall.

Den Erik Steenhäerz, esou heescht een neie Kannerfilm op Lëtzebuergesch. E Familljefilm mat Fantasyelementer vum estnesche Regisseur Ilmar Raag.
Am Ganze ware 6 Länner dorunner bedeelegt. Dorënner Estland, Lëtzebuerg, Finnland, Litauen, Lettland an d'Ukrain.

De Paul Thiltges vu Paul Thiltges Distributions (PTD) erkläert, wat dorunner am Grand-Duché gedréit gouf: "Zu Lëtzebuerg sinn déi Saachen am Studio gemaach ginn. Dat sinn d'Zeene bannen am Schëff. Déi sinn am Studio 1 vum Filmland gedréit ginn. An d'Schlass Meesebuerg war den Dekor vum Haus, dat dem Erik seng Famill ierft vun der Tatta Brunhilda, déi gestuerwen ass."

D'Geschicht fänkt domadder un, dass dem Erik seng Famill an dat neit Haus plënnert. Si ierwen et vun der Tatta Brunhilda (gespillt vum Claire Johnston). Dat gefält dem Erik iwwerhaapt net an do wunnen och schonn d'Maria a säi Papp. Déi zwee Kanner kënne sech op den éischte Bléck net leiden. Den Erik ass een Eenzelgänger, seet vu sech selwer, hien hätt een Häerz aus Steen a léisst keen u sech erun. Scho guer keng Emotiounen. D'Maria ass de Contraire, ee Fräigeescht, dat den Dram huet, op Séi ze stiechen, fir seng Mamm, déi als Ozeanologin schafft, ze fannen. Den Erik an d'Maria mierke schnell, dass si, obwuel si esou ënnerschiddlech sinn, dat selwecht Ziel hunn: Si wëllen, dass dem Erik seng Famill nees fortplënnert. Dofir schléisse si sech zesummen a gerode ganz séier an hir éischt grouss Aventure. Si maache sech op d'Sich nom Maria senger Mamm a landen an enger onheemlecher Tëschewelt, an där Piraten an aner Geforen op si waarden.

Déi zwee Kanner gi vun estnesche Schauspiller gespillt. Dem Maria säi Papp gëtt vum Lëtzebuerger Acteur Jules Werner gespillt. Et ware vill verschidden Nationalitéiten um Set.

Dofir goufen och verschidde Sprooche geschwat, och virun der Kamera. Réischt an der Postproduktioun sinn dann déi eenzel Acteuren iwwersat ginn. Eng Kéier op Estnesch fir déi estnesch Versioun an eng Kéier op Lëtzebuergesch.

De Michel Dimmer war responsabel fir d'Post-Produktioun: "Bei enger Synchronisatioun gëtt fir d'éischt iwwersat. Aus der estnescher Versioun gëtt et op Englesch iwwersat als Tëschesprooch an dann op Lëtzebuergesch. Dat muss och esou gemaach ginn, wéi d'Leit schwätzen. Dat heescht do gëtt schonn op d'Mondbeweegungen opgepasst. Deemno wéi muss dat Lëtzebuergescht och ugepasst ginn. Dann ass et och d'Auswiel un de Schauspiller, déi aschwätzen, wichteg. Do ass dann och ee Regisseur dobäi, deen d'Leit guidéiert. Et ass kloer, dass een do och puer mol schwätze muss, fir, dass een déi Gefiller an déi Stëmmung rauskritt."

Hannert dem Film stécht e groussen Opwand, grad duerch d'Fantasyselementer hu vill Spezialeffekter missten agesat ginn. Dobäi kënnt net just den techneschen Aspekt, mee och dat Ganzt ronderëm. Den Dréi ass voll an d'Coronapandemie gefall an huet misse fir e puer Méint pauséiert ginn. Dat ka fir Problemer suergen, grad dann, wann ee mat Kanner schafft, déi da gäre mol e gutt Stéck wuessen.

"Dat huet awer alles herno geklappt. Mee dat war ee Moment net einfach, déi Produktioun ass duerch ganz vill Saache gaangen, déi vu bausse komm sinn: Hackeren, Covid, … Dat war net einfach. Mee herno hu mir et gepackt alles iwwert Bün ze kréien", erkläert de Produzent Paul Thiltges.

Wéi de Film bei den ukrainesche Partner fir d'Spezialeffekter war, sinn déi vu russeschen Hacker gehackt ginn. Och dat konnt dunn awer geléist ginn. Grad esou wéi d'Maria an den Erik am Film gouf et also och fir d'Produzenten e puer Erausfuerderungen.

Ma, ob elo an der Geschicht am Film oder bei der Produktioun vun engem grousse Projet. Um Enn geet et dorëms, alleguerten d'Erausfuerderungen ze meeschteren an da gëtt et wann alles gutt geet: En Happyend.

Zanter dem 30. November leeft en a Lëtzebuerger Kinoen. Den Trailer fënnt een hei.