Iwwer 400 Joer ass et hier, datt de Shakespeare d’Stéck "Midsummer Night’s Dream" geschriwwen huet.

Ma och haut ass de Shakespeare nach ëmmer e beléiften Auteur am Theater an dat net ouni Grond. Seng Geschichten, seng Sprooch a seng Visiounen hunn en universellen Charakter, déi een op eis Zäit projezéieren kann. Genau dat beweist den Ament d’Regisseurin Myriam Muller an huet de Shakespeare an Disko bruecht.

D’Myriam Muller inzenéiert gären déi grouss Klassiker op eng zäitgenëssesch Manéier. Fir de «Songe d’une nuit d’été» stinn 13 Schauspiller op der Bün. Eng Bün, di sech iwwerall ofspillt. De Studio am Groussen Theater ass nämlech quasi ganz eidel gemaach ginn an de Publikum sëtzt matten am Bünebild:

"Déi Iddi vun deem immersive Stéck ass no der Pandemie komm, wou am Theater- a Film-Milieu vill driwwer geschwat ginn ass, wéi een d’Leit erëm zréckkritt. D’Caféen an d’Bare waren ëmmer iwwerfëllt, soubal mir iergendwéi konnten zesummekommen. Ech sichen ëmmer Themen, déi ech an der Gesellschaft oder ronderëm mech spieren. Vun dohir loung de Schwéierpunkt op deem Zesummen liewen an dem Zesummenkommen."

D’Geschicht vum Shakespeare spillt sech hei an enger Disko of, wou ëmmer erëm e puer Welten openeen treffen. Den Akzent läit op den 3 Gruppen: D’Handwierker, d’Feeën an zwou jonk Koppelen.

“Beim Shakespeare ass näischt kleng. Alles ass enorm," fënnt den Acteur Valéry Plancke. "Wann een ee gären huet, dann enorm gären oder et haasst een een enorm. Et geet iwwert de Mënsch eraus, dat heescht, et adresséiert ee sech un de Kosmos. D’Notioun vun der Léift ass an deem Fall déi universell Léift.»

"Le Songe d’une nuit d’été" léisst Plaz fir vill Komik an Aussergewéinlechkeet. Et ass e Stéck voller Kontraster a fir d’Myriam Muller war et wichteg, de Lien mat haut ze zéien.

"Wat ëmmer spannend ass, wann ee kuckt, wat se viru 500 Joer iwwer verschidden Theme geduecht oder geschriwwen hunn a wat erzielt et nach haut. An dat ass ëmmer e Spagat, dee spannend ass, genau sou fir de Publikum, well da kann een erëm eppes domadder ufänken. Fir elo de Shakespeare an de Schnalleschong ze weisen,  ass fir mech net interessant," seet d'Myriam Muller.

Well d'Virstellungen am Groussen Theater schonn all ausverkaf waren, huet een decidéiert, fir de 27. Januar eng weider Kéier opzetrieden.