"Pick it up !" nennt sech d‘Aktioun, déi den Didier Picard fir de ganze Mount Mäerz wëlles huet. 30 Minutte Knascht asammelen all Dag bei all Wieder.

Zesumme mat senger Duerschter huet hien aus Zoufall eng Kéier gesinn, wéi vill Knascht laanscht eis Landstroosse läit. Wéi de Grafiker dunn och gesondheetlech gerode krut, sech all Dag 30 Minutten un der frëscher Loft ze beweegen, huet hien zwou nëtzlech Saache matenee verbonnen.

Fir net nëmmen ze sammelen, mä och op dëse Problem ze sensibiliséieren, geet de Grafiker dofir de ganze Mäerz a senger Mëttesstonn all Dag Offall uechtert de Grand Duché asammelen. De Bilan ass leider iwwerall dee selwechten, meeschtens huet hie ganz séier eng Tut voll… Dat féiert hien dann an de Recycling Center.

Wéi vill Kilo Dreck dobäi schonn zesummekomm sinn, kann een op Facebook suivéieren. Seng Recolte verëffentlecht hien nämlech op sengem “Pick it up"-Grupp op Facebook. Bannent 25 Deeg ass hie sou schonn 750 Minutte getrëppelt, eng Streck vun 28 Kilometer an do koumen iwwer 80 Kilo Knascht zesummen!

Net nëmmen d'Quantitéit huet hie schockéiert, mä och, wat hien esou agesammelt huet. Virun allem awer dat en apaart vill Iwwerreschter vun Alkoholeschem Gedrénks fënnt, vu Wodka bis Béier.

Well et sou frappant ass, wäert den Didier Picard och elo Enn des Mounts net ophale mat senger Sensibiliséierungs-Campagne. D’Aktioun soll nach wieder goen. "Pick it up" eng ASBL ginn. Schonn elo hu sech him aner „Pickies“ ugeschloss, an hien hofft op nach méi Leit, déi wéi hie Bësch a Gewaan vu Béchse, Plastik a Verpackungen erëm propper wëlle kréien.

Iwwert seng Facebook Säit „Pickitup“ fënnt een all Informatiounen, wat wou wéini gemaach gëtt. Mä eigentlech brauch all Eenzelen nëmmen eng Tut an e puer Händschen an da kann et lass goen.

E klenge Rappell: E Becher aus Styropor brauch 50 Joer, fir sech ze zersetzen, eng Bécks bis zu 200 Joer a bal 500 Joer dauert et fir eng Plastiksfläsch!

Doriwwer maachen sech déi Leit, déi hire Knascht beim Autofueren einfach aus der Fënster puchen, wuel keng Gedanken.

D’Ekipp vum Magazin huet hie bei enger Botztour begleet.