Bis virun engem Joer hat d'Sarah Thomas nach Broschtkriibs. Elo ass si ouni Ënnerbriechung direkt 4 Mol duerch den Äermelkanal geschwommen.

Virun hir ass dat nach kengem anere Mënsch gelongen. Bis ewell hu just 3 Schwëmmer den Äermelkanal 3 Mol ouni Paus duerchschwommen. Mat der Aktioun wollt d'Sarah Thomas hir Victoire iwwert de Kriibs feieren. Hire Rekord huet si allen Iwwerliewenden op der Welt dediéiert.

D'Sarah Thomas ass e Sonndeg am fréie Moie gestart an huet de Rekord no 54 Stonnen erreecht, dat mat Schockela a Schampes gefeiert gouf. Ganz einfach wier et net gewiescht, d'Salzwaasser hätt besonnesch am Mond an am Hals fir Problemer a Péng gesuergt, donieft ass hiert Gesiicht mat engem Jelliskapp a Beréierung komm. Am schlëmmste wier den Deel vu Frankräich a Richtung Groussbritannien gewiescht, well do d'Stréimung immens staark war.