De Lëtzebuerger Journalist schwätzt net manner wéi sechs Sproochen an huet domadder elo Journaliste-Kolleegen an den USA beandrockt.

De Philip Crowther hat rezent op de soziale Medien e Video verëffentlecht, an deem ze gesinn ass, wéi hien a sechs verschiddene Sproochen, dorënner och Lëtzebuergesch, fir verschidde Medien als Korrespondent an den USA täteg ass.

"CBS This Morning" huet de Video an hirer Sendung thematiséiert an d'Journalisten hu sech beandrockt vum Talent vum Philip Crowther gewisen. Ee vun de Presentateure vun der Sendung, Anthony Mason, huet de Video vum Philip Crowther folgendermoosse lancéiert:

"Dës Aarbecht ass deels ganz schwéier, mee ech weisen iech elo ee Journalist, deen eis nees mat de Féiss op de Buedem bréngt. Dëse Journalist huet een impressionante Video vu sech selwer op de soziale Reseaue publizéiert, an deem hien a sechs verschiddene Sprooche vun den US-Wale bericht huet."

D'Presentateuren hunn net schlecht gestaunt, ma ware gläichzäiteg och verwonnert, datt et Lëtzebuergesch als Sprooch gëtt an hunn et fir d'éischt emol iwwer Google gesicht.

De Philip Crowther schwätzt nieft Lëtzebuergesch och nach Franséisch, Spuenesch, Englesch, Däitsch a Portugisesch. Hien ass och reegelméisseg op RTL Télé Lëtzebuerg als US-Korrespondent an den Noriichten ze gesinn.