Déi US-amerikanesch TV-Legend ass am Alter vu 87 Joer un de Suitte vu senger Corona-Infektioun gestuerwen.

Dat gouf e Samschdeg op sengem offiziellen Twitter-Account matgedeelt.

Hie gouf Enn Dezember wéinst Covid-19 an de Cedar-Sinai Medical Center zu Los Angeles bruecht, fir do behandelt ze ginn.

A senger iwwer 60 Joer laanger Karriär huet de Larry King ënnert anerem 2 Mol de "Peabody Award" an een "Emmy Award" gewonnen. Hien huet bis kuerz viru sengem Doud nach déi politesch Talkshow "Politicking with Larry King" moderéiert.

Wärend 25 Joer war hie Moderator an der CNN-Talkshow "Larry King Live". Seng Markenzeeche ware säi Brëll, seng Brëttellen a seng faarweg Krawatten.

Déi lescht Jore waren net einfach fir den Talkshow-Moderator. 2020 ass säi Bouf un engem Häerzschlag gestuerwen, seng Duechter Chaia u Longekriibs. Am Joer 2017 gouf hie wéinst Longekriibs behandelt an 2019 hat hien eng Angioplastie an hat och e Schlag gemaach.

Hie gouf a sengem Liewe mat 7 Fraen am Ganzen 8 Mol bestuet. Eng leschte Kéier virun 2 Joer. Enger vu senge Fraen, dem Alene Akins, huet hien esouguer 2 Mol d'Jo-Wuert ginn.