De Weltdag vun der Televisioun gouf den 21. November 1996 vun de Vereenten Natiounen an d'Liewe geruff.

Op dësem Dag gouf an Italien deen éischte Weltfernseeforum organiséiert. Um Weltfernseedag soll ee sech un dat erënneren, wat d'Vereenten Natiounen deemools vun hire Memberlänner gefuerdert hunn. Nämlech d'Ënnerstëtzung vun de Fernseeprogrammer, déi sech mat den Theme Sécherheet, Fridden, sozialer a kultureller Entwécklung beschäftegen.

De 25. September 1995 gouf  eng éischte Kéier d'Emissioun "Eng Stonn fir Lëtzebuerg" op RTL Tëlee Lëtzebuerg diffuséiert. 30 Minutte Magazin an 30 Minutte Journal. Den Oflaf erënnert nach staark un dee vun haut, ma zanterhier huet sech awer Villes verännert. Den Ecran ass méi grouss ginn, d'Bild méi schaarf an de Leit hir Uspréch si geklommen.

Besonnesch d'Funktioune wéi den Zougrëff vum Fernsee op den Internet, op Streaming-Déngschter, an och op de Replay sinn am Ament beléift. Nach haut ass d'Tëlee a ville Stéit e feste Bestanddeel vum Haushalt.

De Steve Schmit, Content Director bei RTL: "Et gëtt haut dacks gesot d'Tëlee ass dout, d'Tëlee ass e Medium vu gëschter. Dat stëmmt einfach net an der Realitéit. Eleng um Lëtzebuerger Marché sinn all Dag 55% vun der Gesamtpopulatioun déi d'Tëlee kucken. Dat si ronn 300.000 Leit. An déi kucken an der Moyenne 3,5 Stonnen Tëlee. Ech menge méi lieweg kann e Medium net sinn.”

Virun 12 bis 15 Joer war d'Consommatioun vun der Tëlee liicht agebrach. Dat well den Internet méi séier ginn ass an aus dem Telefon e Smartphone gouf, mat deem een och Videoen online kucke konnt. Ma dat huet sech awer erëm erkritt an de Leit hier Fernseeconsommatioun ass relativ konstant bliwwen, heescht et weider vum Steve Schmit.

Virun allem Live-Evenementer wéi d'Futtballweltmeeschterschaft, d'Coursen an der Formel 1 oder d'Trauerfeier vun der Queen Elizabeth II. drécken d'Aschaltquot staark an d’Luucht.

D'Tëlee wäert ëmmer weider evoluéieren a sech un aner Videoplattformen adaptéieren. Ma ausstierwe wäert se wuel esou laang nach net an de Welt-Fernsee-Dag dierft nach dacks gefeiert ginn.