Déi ganze Serie vu Video-Portraite vun RTL Télé Lëtzebuerg fannt Dir elo hei am Replay.

Am Luxushotel op Mauritius, am Déngscht vum Vatikan zu Roum oder als Affekot zu Melbourne - e sëlleche Lëtzebuerger hunn hir Heemecht verlooss, fir op enger anerer Plaz op der Welt een neit Liewen unzefänken.

Och wärend dëser Chrëschtsaison hu mir Iech nees nom Journal all Dag Reportagen iwwer Lëtzebuerger, déi hir Heemecht wäit ewech vum Grand-Duché fonnt hunn, gewisen.

12. Portrait: Beim Amanda a François an der Elbphilharmonie

Lëtzebuerger sinn der iwwerall op der Welt vertrueden. Och zu Hamburg an der Elbphilharmonie. Zanter bal zwee Joer ass dëst beandrockend Gebai d’Aarbechtsplaz vum Amanda Kleinbart an dem François Kremer. Mir haten d’Chance, si en Dag ze begleeden a kruten e klengen Abléck hannert d’Kulissen vun der Elbphilharmonie. D’Isabelle Henschen huet si an der Elphi - wéi d’Hamburger hiert neit "Wahrzeechen" nennen - besicht.

11. Portrait: Beim Bänker Alex Steinmetz zu New York

VIDEO: Lëtzebuerger am Ausland: Beim Alex Steinmetz zu New York
De Bänker wier léiwer vu London an Asien gaangen, ma seng Bank huet hie viru 4 Joer op New York geschéckt.

New York – the place to be respektiv to live fir Artisten, Affekoten a Bänker. Just, dass den Alex Steinmetz léiwer vu London an Asien geplënnert wär. An nëmme mëttelméisseg begeeschtert war, fir seng Bank op Manhattan schaffen ze goen. Dat sinn elo ëmmerhin scho 4 Joer hir. D’Raphaelle Dickes huet de jonke Mann vu Steesel zu New York am Subway um Wee op d’Aarbecht getraff a gekuckt, wéi him d’Liewen haut dohanne schmaacht.

10. Portrait: Beim "Pirat" Jos Hames a Polynesien

Selwer bezeechent hie sech als eenzege lëtzebuergesche Robinson Crusoe op der Welt. Virun 28 Joer war de Jos déi éischte Kéier a Polynesien an huet sech direkt an d’Géigend verléift. A wéi en du viru 4 Joer pensionéiert gouf, ass e ganz dohinner geplënnert. Zu Lëtzebuerg war hie jorelaange Ambulancier bei de Beruffspompjeeën an elo lieft hien op der Insel Moorea. Hei gëtt hie vun den Heemesche wéinst sengem Look "de Pirat" genannt. Hien ass begeeschtert vun den Déieren, wéi déi grouss Schildkröten an och den Haien, déi et hei gëtt a bei déi hien ons am Reportage och mathëlt. Hie schnorchelt einfach laanscht déi impressionnant Déieren.

9. Portrait: Beim Stefan a Raquel zu Las Vegas

Las Vegas – d’Stad vun de Casinoen, Zauber-Showen a verréckten Hochzäiten. Eng spannend Destinatioun, wou déi meescht Touriste just kuerz Zäit verbréngen. D’Raquel an de Stefan par conter hunn decidéiert, do ze bleiwen. Déi zwee Lëtzebuerger hunn zu Las Vegas eng italienesch Gelateria opgemaach a bidden en europäesche Feeling an der Wüste-Stad un. Den Yves Trevalec huet déi zwee Lëtzebuerger am Ausland besicht.

8. Portrait: Beim Tun Yegles zu Melbourne


4,5 Milliounen Leit wunnen zu Melbourne an een dovunner ass de Lëtzebuerger Tun Yegles. Hien ass zu Ettelbréck gebuer, ma huet iergendwann decidéiert, un dat anert Enn vun der Welt auszewanderen. Hei schafft hien als Web-Designer. An hei huet hie mat senger Famill och d'Chrëschtfeierdeeg a Silvester gefeiert. Ganz ouni Schnéi, ma dofir mat Plage, Mier an ebe matten am australesche Liewensstil, deen him sou gutt gefält. E vermësst awer och vill zu Lëtzebuerg, vun der Kultur bis bei de Béier an nach e puer Saachen ...

7. Portrait: Beim Manager Michel Volk am Luxus-Resort op Mauritius


Elo geet et op eng Plaz, déi déi meescht nëmmen aus der Vakanz kennen, ma de Michel Volk a seng Famill wunnen op der Île Maurice a geréieren do e Vakanze Ressort. De lëtzebuergesche Manager weess genee, wéi d'Konzept fonctionnéiert, a setzt sech och fir d'Entwécklung an d'Handwierk dohannen an.

6. Portrait: Beim Viviane Schmit zu Roum

D'Viviane Schmit ass 1987 vum Deputéierte Georgio Napolitano agestallt ginn, deen 19 Joer drop Staatschef an Italien gouf. Eng Karriär, déi elo 31 Joer feiert, an obwuel den Georgio Napolitano 2015 säin Amt ofginn huet, geet et fir d'Viviane mat Häerz a Séil weider zu Roum.

5. Portrait: Beim Christopher Schaub zu Sydney

Zu Sydney lieft a schafft de Christopher Schaub, tëscht impressionnanten Héichhaiser a gréngen Nationalparken. De Lëtzebuerger schafft bei enger internationaler Software-Firma, déi op Banke spezialiséiert ass. Hien huet eis erzielt, wat hie vu Lëtzebuerg vermësst, a wou hien an der australescher Metropol am léifste seng Zäit verbréngt.

4. Portrait: Beim Fotograf Serge Ries op Bali

Als Fotograf ass een ëmmer op der Sich no neien an aussergewéinleche Motiver. Och de Lëtzebuerger Serge Ries ass ëmmer op der Rull, fir déi perfekte Fotoen ze kréien. Allerdéngs net hei am Land, mee op Bali. Hien ass op dës Insel am indeschen Ozean ausgewandert an all Dag op en Neits begeeschtert. Vun der Natur, der Déierewelt a virun allem vun de Mënschen. Renconteren, déi hie mat sengem Fotosapparat festhält. Den Yves Trevalec huet hien op Bali besicht a krut en Abléck an aussergewéinlech Landschaften a Plazen.

3. Portrait: De Jean-Paul Muller am Vatikan

Och am Vatikan schaffe Lëtzebuerger. Een dovunner ass de Jean-Paul Muller. An hei ass hien e geschätzte Mann, deen och gutt mat Geld kann ëmgoen.

Dat läit och an der Charge, déi hien am Vatikan huet. De Jean-Paul Muller hëlt ons Kamera mat op Platzen, déi normalerweis net fir de Public zougänglech sinn. An hei trëfft hien och op en aneren, ganz bekannten, Lëtzebuerger. En exklusive Reportage vum Yves Trévalec.

2. Portrait: Bei der Tennis-Spillerin Lena Dimmer zu New York

An den USA kann ee säi Studium och scho mol mat Leeschtungs-Sport finanzéieren. Fir déi fréier Tennis-Nationalspillerin Lena Dimmer hat dat op jidder Fall geklappt. Lescht Joer ware mer si op hire Campus vum New York Institute of Technology besichen. Deemools war si do am leschte Joer.

Elo am September huet d’Raphaëlle Dickes d’Lëtzebuergerin zu Manhattan erëm gesinn. An do huet sech esou Munches gedoen.

1. Portrait: Beim Affekot Henri Kauthen zu Melbourne

An der éischter Episod geet et dofir op Melbourne an Australien. Déi zweet gréisste Stad um Kontinent no Sidney. Hei huet sech virun iwwer 20 Joer de Lëtzebuerger Henri Kauthen installéiert.

Eng Metropole mat Charme, déi hie vun der éischter Sekonn u begeeschtert huet. Den Yves Trevalec war hie besichen, a sengem neien Doheem am hippste Quartier vu Melbourne, ma huet him och dohannen bei senger Aarbecht als Affekot iwwert d'Schëller gekuckt a war mat him op déi schéinste Platze vun där Stad ënnerwe

D'Episoden aus de leschte Joren