D'Pony wat e Sonndeg op engem Bauer senger Wiss stoung, deem awer net gehéiert, gouf wuel vum Besëtzer am Virfeld gratis ugebueden.

E Sonndeg war dem Christian Konz jo opgefall, dass 12 amplaz 11 Päerd op senger Wiss stoungen. E klengt schwaarzt Shetlandpony hat sech bei déi aner 11 Päerd gestallt a kee wousst, wou et hir koum.

En RTL-User huet eis kontaktéiert a matgedeelt, dass him dat Pony schonn am Oktober zejoert zu Saarlouis ugebuede gouf. E Mann aus Däitschland hätt dat Pony gratis ofzeginn.

D'Pony gesäit op alle Fall identesch aus, wéi dat wat zu Konz fonnt gouf... et huet och e bloen opfällegen Halfter un.

Ob et sech dann elo ëm dat selwecht Pony handelt, ass awer nach net gekläert. Op alle Fall konnt d'Besëtzerin vum Déier ermëttelt ginn. Den Ulan von Kallersfarm, esou den Numm vum Pony, kënnt aus Birresborn an der Äifel. En Déierendokter konnt och un Hand vum Chip confirméieren, datt et sech ëm d'Déier handelt. Wéi d'Shetlandpony awer elo aus der Äifel bis op Konz koum, ass net gewosst. E gouf e Freideg vu senger Besëtzerin als vermësst gemellt.

D'Déier soll elo iwwert de Weekend nees heem kommen an d'Police vu Konz huet d'Affär elo iwwerholl, fir erauszefannen, wéi de Ulan aka Findus dann op d'Wiss vum Här Konz koum.

Virgeschicht

E Sonndeg de Moie wollt de Christian Konz seng Déieren zielen an huet net schlecht gestaut, datt et der 12 waren, amplaz vun 11. Nach um Samschdeg den Owend hat de Besëtzer kontrolléiert. Do war alles Ok an déi 11 Déiere waren op der Wiss. Géint 9 Auer um Sonndeg de Moien dunn eng weider Kontroll. Ma net nëmme waren zu deem Ament all d'Déieren do, mat hie konnt nach en 12. Pony zielen.

Dat schwaarzt Shetlandpony hat donieft nach en Halfter un, wat opfälleg war. Hien huet den Drot ronderëm direkt kontrolléiert a konnt hei näischt Verdächteges feststellen. Och ware keng Spure vun engem Auto ze fannen. Hien huet an der Regioun nogefrot, iwwer Internet nom Besëtzer gesicht an och bei der Police gemellt, ma bis elo gouf et nach keng Indicen, wien de Besëtzer kéint sinn.

© Steil.tv

Den Hengscht ass an engem gudden Zoustand a mécht e ganz gesonden Androck. De Christian Konz schätzt, datt d'Déier tëscht engem an zwee Joer al ass. De Charakter weist drop hin, datt d'Déier dru gewinnt ass, mat anere Päerd a Ponyen zesummen ze sinn.

Zesumme mat senger Duerschter vun 12 Joer gouf den neien op der Wiss "Findus" gedeeft. Am Laf vun der Woch gëtt d'Pony da vun engem Déierendokter ënnersicht, woubäi och soll gekuckt ginn, ob et gechippt ass.

Dem däitsche Gesetz no ass de Findus eng "Fundsache" an déi Persoun, déi eppes fënnt, ass verflicht, fir gutt drop opzepassen. De Christian Konz hat dann awer en Déierenasyl kontaktéiert, déi d'Ophuele vum Findus awer frëndlech ofgeleent hunn. Donieft falen "Fundsachen" och net an d'Zoustännegkeet vun der Police, esou datt d'Pony fir den Ament dann op der Wiss vum Christian Konz wäert musse bleiwen.