D'Tessy de Nassau huet am Live! Planet People op der Tëlee iwwert hiren neien Alldag no der Trennung vum Prënz Louis geschwat.

D’Prinzessin Tessy lieft a schafft och no der Trennung vum Prënz Louis zu London. Si huet sech mëttlerweil selbstänneg gemaach a konzentréiert sech berufflech virun allem op hir sozial Engagementer. Esou engagéiert si sech och weiderhi fir "Professors without Borders". Si ass dobäi vill ënnerwee, a wann et nëmme méiglech ass, ass si zesumme mat hiren zwee Bouwen ënnerwee. De Prënz Gabriel an de Prënz Noah liewen esouwuel bei hir zu London, wéi och bei hirem Papp zu Paräis. "Mir sinn e bësse Patchwork, wéi jidder aner divorcéiert Famill och", esou d’Tessy de Nassau. Den Dan Spogen huet et sech och net huele gelooss, déi eng oder aner méi privat Fro ze stellen. Wéi war d’Relatioun mat der Schwéiermamm? Wéi gesäit haut de Kontakt mam Prënz Louis aus? "Wann ech ze vill ondiskret gëtt, einfach "Joker" soen, an ech stellen déi nächste Fro", esou den Dan Spogen.

D’RTL-Journalistin, Annick Goerens, war viru kuerzem a Russland fir eng gréisser Schlittenhond-Expeditioun. Si war eng Woch um Stéck ënnerwee, bei ënnert -20 Grad, an hat och nuets nëmmen en einfacht Zelt, fir ze schlofen. Virun allem den Ëmgang mat de Schlittenhënn huet si beandrockt. Mä wou den Dan Spogen nom schéinsten Erliefnes gefrot huet, huet d’Annick Goerens net laang missten iwwerleeën. "D’Polarliichter an dass et am Schnéi esou roueg ass", dat wat d'Äntwert vum der Journalistin.